Yu Pilim Tru Samting Jehova i Bin Mekim Bilong Kisim Bek Yu?

“Yumi litimapim nem bilong God, Bikpela bilong Israel. Em i kam na i helpim yumi manmeri bilong en, na em i kisim bek yumi.”​​—LU. 1:​68.

1, 2. Olsem wanem stori bilong ol sikman long wod i makim samting i save painim yumi olgeta long nau? Bai yumi stori long wanem ol askim?

TINGIM olsem yu slip long wanpela bet long haus sik. Yu stap long wanpela wod we olgeta sikman i gat wankain sik olsem yu na i no gat marasin bilong oraitim. Taim yu kisim save olsem wanpela dokta i go pas long mekim wok painimaut bilong painim wanpela marasin bilong stretim dispela sik, yu amamas. Yu laik save long olgeta samting dokta i painimaut. Bihain yu kisim save olsem em i painim pinis! Dokta i bin wok strong tru na lusim planti samting bilong em yet long mekim dispela wok painimaut. Bai yu pilim olsem wanem? Ating yu bai tenkyu tru na rispek long dispela man husat i bin stretim rot bilong kisim bek yu na planti narapela long indai.

² Dispela stori i makim wanpela samting i save painim yumi olgeta long nau. Em samting i nogut moa yet, winim dispela sik yumi stori pinis long en. Yumi stap nogut tru na i mas i gat wanpela man bilong kisim bek yumi. (Ritim Rom 7:​24.) Bilong kisim bek yumi, Jehova i bin mekim planti bikpela samting. Pikinini bilong em tu i bin mekim olsem. Orait nau yumi ken tingim 4-pela bikpela askim. Bilong wanem i mas i gat man bilong kisim bek yumi? Jisas i bin mekim wanem bilong kisim bek yumi? Jehova i bin mekim wanem? Na olsem wanem yumi inap soim olsem yumi pilim tru dispela samting God i bin mekim bilong kisim bek yumi?

Bilong Wanem i Mas i Gat Man Bilong Kisim Bek Yumi?

3. Olsem wanem sin i kain olsem wanpela bikpela sik?

³ Wanpela bikpela sik i nogut tru, winim planti narapela sik i bin kamap bipo, em bikpela sik kus bilong Spen i bin kamap long 1918 na i kilim i dai planti milion manmeri long planti hap. I gat sampela narapela sik i no save kilim i dai planti manmeri tumas, tasol klostu olgeta manmeri husat i kisim dispela kain sik ol i dai.a Tasol olsem wanem sapos yumi skelim sin wantaim ol dispela sik? Tingim tok bilong Rom 5:​12: “Wanpela man i bin mekim sin, na long dispela pasin sin i kamap long graun. Na sin i bringim dai i kam. Na dai i kisim olgeta man, long wanem, olgeta man i bin mekim sin.” Sin i kisim olgeta manmeri; olgeta i save mekim sin. (Ritim Rom 3:​23.) Na hamas ol i dai long sin? Pol i tok, sin i bringim dai i kam long “olgeta man.”

4. Wanem tingting bilong Jehova long ol yia yumi stap laip? Olsem wanem dispela tingting bilong em i narapela kain long tingting bilong planti man long nau?

⁴ Planti manmeri long nau i tingim sin na dai i olsem wanpela “nomol” samting. Ol i wari taim ol yangpela i dai, tasol ol i no wari tumas taim wanpela lapun i dai, long wanem, ol i ting em nomol samting tasol. Tasol dispela i no tingting bilong Man Bilong Wokim yumi. Yumi stap sotpela taim tru, aninit long mak God i bin putim bilong yumi stap laip. Long tingting bilong Jehova, i no gat wanpela man i bin stap laip inap “wanpela de” olgeta. (2 Pi. 3:8) Baibel i tok yumi save pinis hariap olsem gras o olsem win em man i winim long maus. (Sng. 39:5; 1 Pi. 1:​24) Yumi mas tingim gut dispela samting. Bilong wanem? Sapos yumi kliagut olsem dispela “sik” i kisim yumi em samting i nogut tru, bai yumi pilim tru “marasin bilong oraitim” yumi​—samting God i mekim bilong kisim bek yumi.

5. Sin i mekim na yumi olgeta wan wan i lus long wanem samting?

⁵ Bilong helpim yumi long kliagut sin em i samting nogut tru, yumi mas save long ol samting sin i bin mekim long yumi. Ating pastaim dispela bai hatwok, long wanem, samting sin i bin tekewe long yumi, em samting tupela tumbuna bilong yumi bilong pastaim i bin holim, tasol yumi yet nogat. Pastaim Adam tupela Iv i gutpela olgeta. Tingting na bodi bilong ol i nambawan tru​—ol inap bosim gut tingting, ol samting ol i pilim long bel, na ol samting ol i mekim. Olsem na dispela tupela wokboi bilong God Jehova i gat rot long kisim moa moa yet ol gutpela pasin bilong em. Tasol ol i no mekim olsem, ol i tromoi dispela gutpela presen bilong i stap olsem man na meri i gutpela olgeta. Adam na Iv i mekim sin long Jehova, olsem na tupela wantaim ol pikinini bilong ol i lus long kisim dispela kain laip Jehova i bin makim bilong ol. (Stt. 3:​16-​19) Ol i bringim dispela sik nogut long ol yet, na long yumi tu. Olsem na i stret Jehova i tok ol i mas i dai. Tasol long yumi ol pikinini bilong tupela, Jehova i wokim rot bilong kisim bek yumi.​​—Sng. 103:10.

Samting Jisas i Mekim Bilong Kisim Bek Yumi

6, 7. (a) Wanem namba wan taim Jehova i soim olsem pe bilong kisim bek yumi bai i bikpela tru? (b) Ol ofa em Abel na ol narapela bilipman i bin stap paslain long Lo ol i bin mekim, i givim wanem skul long yumi?

⁶ Jehova i save pe bilong kisim bek ol lain tumbuna pikinini bilong Adam na Iv bai i bikpela tru. Tok profet i stap long Stat 3:​15 (NW) i helpim yumi long save long dispela pe bilong kisim bek yumi. Jehova bai kamapim wanpela “pikinini,” olsem wanpela man bilong helpim yumi. Bihain dispela man bai bagarapim Satan na pinisim em olgeta. Tasol paslain long dispela man i mekim olsem, em yet bai kisim hevi. Olsem tok profet i makim, em bai kisim bagarap long lek. Dispela bagarap i makim wanem samting? Dispela Man Jehova i Bin Makim i mas karim wanem kain hevi?

⁷ Bilong kisim bek ol man long sin, man bilong helpim ol i mas pinisim ol samting nogut em sin i bin kamapim na helpim ol long kamap wanbel gen wantaim God. Em bai mekim dispela samting olsem wanem? Ol samting i bin kamap bipo i soim olsem i mas i gat wanpela ofa. Taim namba wan gutpela man, Abel, i mekim ofa long ol animal long Jehova, God i orait long em i mekim olsem. Bihain, ol bilipman olsem Noa, Abraham, Jekop, na Jop, ol tu i mekim ofa long ol animal na Jehova i amamas long dispela. (Stt. 4:4; 8:​20, 21; 22:13; 31:54; Jop 1:5) Sampela handet yia bihain, Lo Bilong Moses i helpim ol man long kisim save moa yet long wok bilong givim ol ofa.

8. Hetpris i mekim wanem long Bikpela De Bilong God i Tekewe Sin Bilong Ol Manmeri?

⁸ Sampela bikpela ofa em Lo i tokim ol Israel long mekim, em ol ofa ol i givim long Bikpela De Bilong God i Tekewe Sin Bilong Ol Manmeri. Dispela de i save kamap wanpela taim tasol long yia. Long dispela de, hetpris i mekim sampela samting i olsem piksa. Em i givim ol ofa long Jehova bilong tekewe sin​​—pastaim bilong lain pris, na bihain, ol lain i no bilong lain pris. Em i go insait long Rum Tambu Tru bilong tempel we em wanpela tasol inap i go, na em i mekim olsem long dispela wanpela de tasol bilong yia. Long dispela hap em i tromoi blut klostu long fran bilong bokis kontrak. Antap long dispela bokis holi i gat wanpela klaut i lait i stap i makim olsem God Jehova i stap.​​—Kis. 25:22; Wkp. 16:​1-​30.

9. (a) Long Bikpela De Bilong God i Tekewe Sin Bilong Ol Manmeri, hetpris i makim husat? Ol ofa i makim wanem samting? (b) Hetpris i go insait long Rum Tambu Tru i makim wanem samting?

⁹ Aposel Pol i kamapim mining bilong ol dispela samting hetpris i mekim. Hetpris i makim Mesaia, Jisas Krais, na ol ofa i makim dai bilong Krais. (Hi. 9:​11-​14) Dispela ofa i nambawan ofa tru na em bai tekewe sin bilong tupela lain​​—lain pris bilong Krais, em 144,000 brata bilong em, na “ol arapela sipsip.” (Jo. 10:16) Taim hetpris i go insait long Rum Tambu Tru, dispela i makim Jisas i go insait long heven stret na givim God Jehova pe bilong baim bek man.​​—Hi. 9:​24, 25.

10. Ol tok profet bilong Baibel i tok wanem samting bai painim Mesaia?

¹⁰ Tru tumas, pe bilong baim bek ol pikinini bilong Adam na Iv i bikpela tru. Mesaia i mas givim laip bilong em yet! Ol profet long Ol Skripsa Hibru i kamapim sampela tok moa bilong dispela samting. Olsem: Profet Daniel i tok ol bai “kilim bikman God i bin makim,” em Mesaia, bilong “lusim olgeta sin bilong ol manmeri na pinisim olgeta pasin nogut bilong ol.” (Dan. 9:​24-​26) Aisaia i tok profet olsem ol bai sakim Mesaia, mekim nogut tru long em, na kilim em i dai bilong em i ken karim sin bilong ol manmeri.​​—Ais. 53:​4, 5, 7.

11. Long wanem ol rot Pikinini Bilong Jehova i bin soim olsem em i amamas long givim em yet olsem ofa bilong kisim bek yumi?

¹¹ Taim Pikinini bilong God i no kam yet long graun, em i save pinis long samting em i mas mekim bilong baim bek yumi. Em i mas kisim bikpela pen na hevi na bihain ol bai kilim em i dai. Taim Papa i tokim em long ol dispela samting, yu ting em i surik bek o bikhet? Nogat tru. Em i orait long ol samting Papa i tokim em long mekim. (Ais. 50:​4-6) Na tu, taim Jisas i stap long graun, long dispela taim tu Jisas i bihainim laik bilong Papa bilong em. Bilong wanem em i mekim olsem? Jisas i kamapim wanpela as, olsem: “Mi laikim tru Papa.” Na narapela as: “Sapos wanpela man i laikim tumas ol pren bilong en na i lusim laip bilong em yet bilong helpim ol, orait dispela pasin bilong laikim ol arapela i winim tru ol arapela pasin bilong laikim ol arapela manmeri.” (Jo. 14:31; 15:13) Olsem na pasin laikim bilong Pikinini Bilong Jehova i insait long wok bilong kisim bek yumi. Maski em i mas givim gutpela laip bilong em, em i bin amamas long mekim olsem bambai em inap kisim bek yumi.

Samting Jehova i Mekim Bilong Kisim Bek Yumi

12. Em laik bilong husat tru long givim pe bilong baim bek man, na bilong wanem em i mekim olsem?

¹² Jisas i no As bilong dispela ofa bilong baim bek man. Wok bilong kisim bek yumi em i wanpela bikpela samting insait long laik bilong Jehova. Tok bilong aposel Pol i soim olsem alta long tempel, we ol i mekim ol ofa, em i makim laik bilong Jehova. (Hi. 10:10) Olsem na Jehova i As bilong dispela wok bilong kisim bek yumi long rot bilong ofa bilong Krais. (Lu. 1:​68) Dispela wok bilong kisim bek yumi em i laik bilong God na i kamapim olsem em i laikim tumas ol man.​​—Ritim Jon 3:​16.

13, 14. Samting Abraham i mekim, olsem wanem dispela inap helpim yumi long pilim tru samting Jehova i bin mekim bilong helpim yumi?

¹³ Taim Jehova i kamapim pasin laikim bilong em long dispela rot, dispela i mekim wanem long em yet? Em samting i hatwok long kisimgut. Tasol i gat wanpela stori long Baibel em bai helpim yumi long kliagut moa. Jehova i askim bilipman Abraham long mekim wanpela samting i gat hatwok tru long en​​—mekim ofa long pikinini man bilong em Aisak. Tingim, Abraham i gutpela papa. Jehova i stori long Aisak olsem em i pikinini Abraham i ‘laikim tumas.’ (Stt. 22:2) Tru, Abraham i laikim tumas Aisak, tasol em i luksave olsem pasin bilong bihainim laik bilong Jehova em i bikpela samting moa. Olsem na Abraham i mekim dispela samting God i tokim em long mekim. Tasol Jehova i no larim Abraham long mekim samting Jehova yet bai mekim bihain. God i salim wanpela ensel i kam pasim Abraham taim em i laik kilim pikinini bilong em. Abraham i bin strong tru long bihainim tok bilong God long dispela bikpela traim. Em i bin ting olsem long rot bilong kirap bek em bai lukim gen pikinini bilong em. Em i bilip tru olsem God bai kirapim em bek. Tru tumas, Abraham i kisim bek Aisak long indai, na Pol i tok, dispela i “piksa bilong wanpela samting.”​​—Hi. 11:​19, NW.

¹⁴ Tingim bikpela pen tru Abraham i pilim taim em i redi long givim pikinini bilong em olsem ofa. Samting Abraham i mekim em i piksa bilong samting Jehova i mekim taim em i givim Pikinini bilong em yet, em Pikinini em i ‘laikim tumas.’ (Mt. 3:​17) Tasol tingim, pen Jehova i kisim i mas bikpela moa. Em na Pikinini bilong em i bin stap wantaim inap planti milion yia, o ating planti bilion yia. Pikinini i bin amamas long wok wantaim Papa bilong em olsem “saveman i bosim wok” na olsem “Tok,” o Mausman, bilong em. (Snd. 8:​22, 30, 31; Jo. 1:1) Jehova i kisim bikpela pen tru taim em i lukim ol birua i mekim nogut long Pikinini bilong em, tok bilas long em, na kilim em i dai olsem wanpela man nogut. Yes, wok bilong baim bek yumi i bin givim bikpela pen tru long Jehova! Orait olsem wanem yumi ken soim olsem yumi pilim tru dispela wok bilong kisim bek yumi?

Yu Ken Mekim Wanem Bilong Soim Olsem Yu Pilim Tru Wok Bilong Kisim Bek Yu?

15. Jisas i mekim wanem bilong pinisim bikpela wok bilong tekewe sin bilong ol man? Dispela i opim wanem rot?

¹⁵ Jisas i pinisim dispela bikpela wok bilong tekewe sin, taim em i kirap bek na go long heven. Em i stap gen wantaim gutpela Papa bilong em na i givim pe bilong dispela ofa bilong em long Papa. Dispela i kamapim ol bikpela blesing. Nau i gat rot long fogivim sin bilong ol man​—pastaim em ol brata bilong Krais God i bin makim, na bihain, “olgeta manmeri i stap long graun.” Long rot bilong dispela ofa, olgeta man long nau husat i tanim bel na kamap disaipel bilong Krais, ol inap stap gut long ai bilong God Jehova. (1 Jo. 2:2) Olsem wanem yu insait long dispela samting?

16. Olsem wanem stori bilong dokta na ol sikman i makim olsem yumi mas tenkyu long dispela wok Jehova i bin mekim bilong kisim bek yumi?

¹⁶ Orait nau yumi ken tingim gen dispela stori em pastaim yumi bin stori long en. Tingim olsem dispela dokta bilong mekim wok painimaut bilong marasin em i go lukim ol sikman long wod yu stap long en, na i tok: “Olgeta man husat i kisim dispela marasin na i bihainim tok bilong mi, ol bai kamap orait gen.” Olsem wanem sapos klostu olgeta sikman i no laik bihainim tok bilong dokta; ol i tok em hatwok tumas long kisim dispela marasin o bihainim tok bilong dokta. Bai yu tu i mekim olsem, maski yu save olsem dispela marasin bai oraitim sik bilong yu? Nogat! Yu bai tenkyu tru long dispela marasin na bihainim gut tok bilong dokta, na ating yu bai tokim ol narapela tu long dispela samting yu mekim. Na olsem tasol, yumi olgeta wan wan i gat laik long soim Jehova olsem yumi pilim tru wok bilong kisim bek yumi em i bin mekim long rot bilong ofa bilong Pikinini bilong em bilong baim bek yumi.​​—Ritim Rom 6:​17, 18.

17. Wanem sampela samting yu ken mekim bilong soim olsem yu pilim tru ol samting Jehova i bin mekim bilong kisim bek yu?

¹⁷ Sapos yumi pilim tru samting Jehova na Pikinini bilong em i bin mekim bilong kisim bek yumi long sin na dai, bai yumi kamapim long ples klia dispela samting. (1 Jo. 5:3) Bai yumi strong long sakim sin. Bai yumi no kirap bihainim pasin bilong sin na giaman long bihainim stretpela pasin, nogat. Kain pasin olsem bai tokaut olsem yumi no pilim tru dispela pe bilong baim bek yumi. Bilong soim olsem yumi pilim tru wok bilong kisim bek yumi, bai yumi wok strong long stap klin long ai bilong God. (2 Pi. 3:​14) Bai yumi tokim ol narapela long dispela gutpela wok bilong kisim bek yumi, bambai ol tu inap stap klin long ai bilong Jehova na wet long kisim laip oltaim long bihain. (1 Ti. 4:​16) Tru tumas, Jehova na Pikinini bilong em ol inap tru long yumi givim taim na strong bilong yumi bilong litimapim nem bilong ol! (Mk. 12:​28-​30) Tingim! Yumi inap wetim taim we sin bai tekewe olgeta long yumi. Yumi inap stap laip olsem God i laikim long pastaim​—bai yumi kamap gutpela olgeta na stap oltaim oltaim​​—long wanem, Jehova i bin mekim bikpela wok bilong kisim bek yumi!​​—Ro. 8:​21.

[Futnot]

Bai Yu Bekim Olsem Wanem?

• Bilong wanem i mas i gat man bilong kisim bek yu?

• Bikpela samting Jisas i mekim, dispela i mekim wanem long yu?

• Yu pilim olsem wanem long dispela presen Jehova i givim bilong baim bek yumi?

• Jehova i bin mekim planti samting bilong kisim bek yu, na dispela i kirapim yu long mekim wanem?

[Piksa long pes 27]

Long Bikpela De Bilong God i Tekewe Sin Bilong Ol Manmeri, hetpris long Israel i makim Mesaia

[Piksa long pes 28]

Abraham i orait long givim pikinini bilong em olsem ofa, na dispela i lainim yumi long bikpela samting Jehova yet i bin mekim