Mi Painim Pinis As Bilong i Stap Bilong Mi

Stori bilong Gaspar Martínez

Stori bilong mi em stori bilong wanpela liklik mangi bilong ples, em i stap rabis na bihain em i kisim gutpela sindaun long biktaun. Tasol bai yu lukim olsem gutpela sindaun bilong mi long dispela biktaun i no wankain olsem sindaun em mi bin ting mi bai kisim.

LONG ol yia namel long 1930 na 1939 samting, mi kamap bikpela long wanpela ples i no gat planti man i stap long en, long hap bilong Rioja long noten Spen. Taim mi gat 10-pela krismas mi mas lusim skul, tasol long dispela taim mi lain pinis long rit rait. Mi wantaim 6-pela bratasusa bilong mi i save lukautim ol sipsip na wok gaden long ol hap graun bilong mipela.

Mipela i stap rabis, olsem na mani kago i stap olsem bikpela samting tru long mipela. Mipela i bel kaskas long ol man i gat planti samting moa winim mipela. Tasol wanpela taim bisop i tok, insait long ol ples em i save lukautim, ples bilong mipela “i tingim tru ol samting bilong lotu winim ol narapela ples.” Long dispela taim em i no save olsem bihain planti bai lusim lotu Katolik.

Painim Samting i Gutpela Moa

Mi maritim Mercedes, em wanpela yangpela meri long ples bilong mi. I no longtaim na mipela i gat wanpela pikinini man bilong lukautim. Long 1957, mipela i go sindaun long Logroño, em biktaun i stap klostu, na bihain olgeta famili bilong mi i mekim olsem. Mi no gat save long mekim sampela kain wok, olsem na i no longtaim mi luksave olsem mi no inap painim wok i gat gutpela pe. Mi tingting, mi inap painim we samting bilong soim rot long mi. Mi kirap long sekim laibreri, tasol mi no klia gut long samting mi wok long painim.

Bihain mi harim olsem wanpela redio program i invaitim ol man long mekim Baibel stadi kos long rot bilong pas. Taim mi pinisim dispela kos, sampela lain bilong lotu Evanjelikal Protestan ol i bungim mi. Mi go sampela taim long haus lotu bilong ol na mi lukim olsem i gat pasin resis i stap namel long ol man i holim namba na biknem insait long lotu. Mi no go bek moa long dispela lotu; mi kisim tingting olsem olgeta lotu i wankain tasol.

I Olsem Mi Inap Lukluk Gen

Long 1964, wanpela yangpela man, nem bilong em Eugenio, em i kam long haus bilong mipela. Em i wanpela Witnes Bilong Jehova, em wanpela lotu mi no bin save long en. Tasol mi amamas long toktok long Baibel. Mi ting mi gat gutpela save long Baibel. Mi kamapim sampela ves bilong Baibel mi lainim long kos mi bin mekim bipo. Mi strong long sambai long sampela bilip bilong ol Protestan, tasol long bel bilong mi, mi no bilip tru long ol dispela tok.

Tupela taim mi toktok wantaim Eugenio inap longpela taim liklik, na mi lukim olsem Eugenio i gat gutpela save tru long tok bilong Baibel. Mi kirap nogut long pasin bilong em, em inap painim kwik ol ves bilong Baibel na kamapim klia as bilong ol dispela tok, tasol skul em i bin kisim i liklik long skul mi bin kisim. Eugenio i soim mi long Baibel olsem yumi stap long taim bilong las de, na klostu nau bai Kingdom Bilong God i kamapim Paradais long graun. Mi kirap nogut long dispela tok.​—Sng. 37:​11, 29; Ais. 9:​6, 7; Mt. 6:​9, 10.

Kwiktaim mi tok orait long stadi long Baibel. Klostu olgeta samting mi lainim i nupela long mi, na bel bilong mi i pilim tru. Nau mi inap tingim gutpela samting bai kamap bihain, na mi amamas long wetim dispela taim i kamap. Mi no gat wok moa long painim as bilong i stap bilong mi. Nau mi no tingting moa long kisim nem o namba samting, na hevi bilong mi long painim gutpela wok mani i no bikpela samting moa long mi. Na hevi bilong sik na dai tu bai pinis.​—Ais. 33:24; 35:​5, 6; KTH 21:4.

Kwiktaim mi kirap tokim ol wanblut long ol tok mi lainim, na mi tokim ol olsem God i promis long kamapim Paradais long graun, na ol manmeri i stap gut long God ol inap i stap oltaim oltaim long en.

Famili Bilong Mi i Kisim Tok i Tru

I no longtaim na mipela 12-pela i pasim tok long bung wantaim long haus bilong ankol bilong mi long olgeta Sande apinun bilong stori long ol tok promis bilong Baibel. Mipela i lusim 2-pela o 3-pela aua long olgeta wik long mekim olsem. Taim Eugenio i lukim olsem bikpela lain wanblut bilong mi i gat laik long kisim save long Baibel, em i stretim rot bilong stadi wantaim olgeta wan wan famili.

Mi gat sampela wanblut moa long Durango, em wanpela liklik taun i stap longwe olsem 120 kilomita, na i no gat ol Witnes i stap long dispela hap. Olsem na 3-pela mun bihain, mi kisim malolo inap sampela de bilong i go lukim ol na kamapim nupela bilip bilong mi long ol. Long dispela taim, mipela 10-pela olgeta, ol man, meri, na pikinini, mipela i save bung wantaim long olgeta apinun, na mi save stori wantaim ol i go abrusim biknait. Olgeta i amamas long harim. Taim mi laik lusim ol, mi givim sampela Baibel na ol buk na nius bilong Baibel long ol. Bihain long en, oltaim mipela i save toktok wantaim long rot bilong pas samting.

Taim ol Witnes i kamap long Durango​—i no gat Witnes i bin autim tok long dispela hap bipo​—​ol i lukim olsem i gat 18 manmeri i wet long stadi long Baibel. Ol Witnes i amamas long stretim rot bilong stadi wantaim olgeta wan wan famili.

I kam inap long dispela taim, Mercedes i no laik kisim save long tok i tru, long wanem, em i pret long ol man​—i no olsem em i no laik bilip long ol tok bilong Baibel, nogat. Long dispela taim i gat tambu long wok bilong ol Witnes Bilong Jehova long Spen, olsem na em i ting olsem gavman bai rausim tupela pikinini bilong mipela long skul, na ol lain bilong ples bai givim baksait long mipela. Tasol taim em i lukim olsem olgeta long famili i wok long kisim tok i tru bilong Baibel, em tu i laik stadi.

Insait long tupela yia, 40 long famili bilong mi ol i kamap Witnes na ol i kisim baptais bilong makim olsem ol i dediket long mekim wok bilong God. Em nau, famili bilong mi i gat wankain tingting olsem mi long putim wok bilong God olsem namba wan samting long laip bilong ol. Mi pilim olsem mi bin inapim wanpela samting i gat as tru bilong en. Jehova i blesim tru mipela long planti samting bilong spirit.

Mi Kisim Planti Moa Gutpela Samting

Insait long narapela 20 yia, mi wok strong long mekim bikpela long tupela pikinini man bilong mipela na helpim tu kongrigesen. Taim mitupela Mercedes i go sindaun long Logroño, i gat olsem 20 Witnes tasol long dispela biktaun i gat olsem 100,000 manmeri long en. I no longtaim na mi kisim planti wok insait long kongrigesen.

Orait taim mi gat 56 krismas, kampani i pasim faktori mi wok long en, na nau mi no gat wok mani. Oltaim mi gat bikpela laik long insait long fultaim sevis, na nau rot i op long mi ken mekim wok painia. Mani mi kisim long pensen i liklik tasol, na mipela i hatwok long baim kaikai samting. Mercedes i kisim wok bilong klinim ol haus samting na dispela i helpim mipela. Mipela i gat mani inap long lukautim famili na mipela i no sot long ol samting mipela i nidim. Mi mekim yet wok painia, na sampela taim Mercedes i save mekim wok painia haptaim, na em i kisim bikpela amamas long wok autim tok.

Inap sampela yia i go pinis, oltaim Mercedes i save lusim sampela nius long wanpela yangpela meri nem bilong en Merche husat i bin stadi long Baibel long taim em i liklik. Merche i ritim ol nius bilong yumi na em i laikim, na Mercedes i lukim olsem Merche i laikim yet ol tok i tru i stap long Baibel. Bihain Merche i orait long stadi long Baibel na em i wok long kamap strong. Tasol man bilong em, Vicente, em man bilong dring planti na em i no inap holim gut wanpela wok mani. Olsem na em i no lukautim Merche long mani samting, na pasin bilong em long dring oltaim i laik bagarapim marit bilong tupela.

Meri bilong mi i tokim Merche, i gutpela sapos Vicente i toktok wantaim mi, na Vicente i mekim olsem. Mi go lukim em 3-pela taim samting na em i orait long stadi long Baibel. Nau em i kirap long senisim pasin bilong em, na em i lusim dring inap sampela de. Bihain em i lusim dring inap wanpela wik samting. Orait bihain em i lusim dring olgeta. Isi isi em i luk nais, na famili bilong em i kamap wanbel. Meri bilong em na pikinini meri bilong tupela, na ol narapela long famili bilong em, ol i save helpim tru liklik kongrigesen long Canary Islands, em ples nau ol i sindaun long en.

Mi Tingim i Stap Bilong Mi i Gat As Bilong En

Sampela wanblut bipo ol i bin kisim save long tok bilong Baibel ol i dai pinis, tasol ol hap famili bilong mipela i wok long i go bikpela yet, na God i bin blesim tru mipela. (Snd. 10:22) Mi amamas tru long lukim olsem klostu olgeta manmeri husat i bin kirap stadi long Baibel 40 yia i go pinis​—wantaim ol pikinini na bubu pikinini bilong ol​—​ol i stap gut yet long wok bilong Jehova!

Long nau, mi gat planti wanblut ol i Witnes, na planti ol i mekim wok olsem elda, na kongrigesen sevan, na painia. Namba wan pikinini man bilong mi na meri bilong em ol i wok long brens ofis bilong ol Witnes Bilong Jehova long Madrid, Spen. Taim mi bin kamap Witnes, i gat olsem 3,000 Witnes long Spen. Long nau namba bilong ol i winim 100,000. Mi save amamas tru long mekim wok painia, na mi tenkyu long God long mi bin mekim wok bilong em inap planti yia nau. Maski mi no bin skul gut, sampela taim mi inap mekim wok olsem helpim bilong wasman sekit.

I no longtaim i go pinis, mi kisim save olsem liklik ples mi bin kamap bikpela long en i no gat man moa i sindaun long en. Ol i stap rabis tru, olsem na olgeta i mas lusim fam na haus bilong ol na i go painim gutpela sindaun long narapela hap. Gutpela tru, planti bilong ol dispela lain​—na mi tu​—i bin painim ol gutpela samting bilong spirit. Mipela i lain pinis olsem i stap bilong yumi i gat as bilong en, na taim yumi mekim wok bilong Jehova yumi kisim bikpela amamas moa yet.

[Piksa long pes 32]

Klostu olgeta long famili bilong Brata Martinez em ol i stap long tok i tru