Stori Nating 4: God Em i God Triwan

Wanem as bilong dispela stori nating? “Yumi inap ting olsem bilip bilong God Triwan i bin kamap klostu long yia 395 C.E. samting. Ating dispela tok em i tru. . . Paslain long yia 395 samting, dispela tok olsem ‘tripela Man long wanpela God,’ i no bin kamap strong, na ol Kristen i no bin kisim dispela tok olsem wanpela tok ol i bilip long en.”​—Buk New Catholic Encyclopedia (1967), Volium 14, pes 299.

“Ol i bin mekim Kibung Bilong Naisia long Me 20, 325 [C.E.]. Konstantin yet i bosim dispela kibung na em i stiaim toktok, na em i kamapim . . . bikpela tok long Krais i wanem kain na God i wanem kain, em ol bisop i kamapim long tokaut bilong ol olsem ‘Krais em i God wankain olsem Papa.’ . . . Ol bisop i pret long empera, olsem na maski planti bilong ol i no ting dispela tok i stret, olgeta i sainim nem bilong ol bilong orait long dispela tokaut; tupela bisop tasol i no sainim nem bilong ol.”​—Buk Encyclopædia Britannica (1970), Volium 6, pes 386.

Baibel i tok wanem? “Holi Spirit i pulap long Stiven, na em i lukluk i go antap long heven. Em i lukim gutpela lait na bilas bilong God long heven, na em i lukim Jisas i sanap i stap long han sut bilong God. Na Stiven i tok olsem, ‘Harim. Mi lukim heven i op, na Pikinini Bilong Man em i sanap i stap long han sut bilong God.’ ”​—Aposel 7:​55, 56.

Dispela piksa olsem driman i kamapim klia wanem samting? Spirit bilong God i pulap long Stiven na em i lukim Jisas i “sanap i stap long han sut bilong God.” I klia tru olsem taim Jisas i kirap bek na i go antap long heven, em i no kamap God gen, nogat; em i kamap wanpela spirit, em i gat bodi spirit bilong em yet. Long dispela driman Stiven i lukim, i no gat namba 3 man i stap wantaim God. Maski pris Dominiken, em Marie-Émile Boismard, i wok strong long painim sampela ves long Baibel bilong helpim bilip bilong God Triwan, em i raitim tok long buk bilong em olsem: “Dispela tok olsem i gat tripela man long wanpela God . . . yumi no inap painim long Nupela Testamen.”​—Buk Àl’aube du christianisme​​—La naissance des dogmes (Taim Lotu Kristen i Kirap​​—Ol Nupela Bilip i Kamap).

Dispela bilip em Konstantin i strong long kamapim, em i bilong pinisim ol tok pait i kamap insait long Misin long dispela taim bipo. Tasol dispela i kamapim narapela bikpela tok: Maria, em meri i bin karim Jisas, em i “Mama Bilong God” o nogat?

Skelim ol dispela ves bilong Baibel: Matyu 26:39; Jon 14:28; 1 Korin 15:​27, 28; Kolosi 1:​15, 16

TOK TRU:

Ol i kamapim bilip bilong God Triwan long yia 395 C.E. samting

[Piksa Kredit Lain long pes 7]

Museo Bardini, Florence