Hevi i Stap Long Olgeta Hap, Stretim Hevi Long Olgeta Hap
YUMI lukim pen na hevi i stap long olgeta hap, na planti man i save sori na helpim ol man i karim hevi. Ol dokta na nes i save wok planti aua long olgeta de bilong helpim ol man husat i gat sik o ol i bin kisim sampela bagarap long bodi. Ol paiaman, polis, ol lain bilong kamapim lo, na ol lain bilong ambiulens samting, ol i save wok strong long daunim o pasim rot bilong sik na pen long painim ol man. Dispela wok i save helpim gut ol wan wan man, tasol i no gat wanpela man o oganaisesen inap pinisim pen na hevi long olgeta hap. Tasol God inap mekim olsem, na em bai pinisim pen na hevi long olgeta hap.
Laspela buk bilong Baibel i strongim dispela tok. Em i tok: “[God] bai i mekim drai wara i stap long ai bilong olgeta bilong ol. Na ol manmeri bai i no i dai moa, na ol bai i no bel hevi moa na krai moa, na ol bai i no inap kisim pen gen. Ol dispela samting bilong bipo ol i pinis olgeta.” (KTH 21:4) Dispela tok promis i go long planti manmeri moa yet. Em i kamapim klia samting em God i tingting pinis long mekim, olsem em bai pinisim olgeta pen na hevi long graun. Bilong mekim olsem, em bai pinisim woa, hangre, sik, pasin i no stret, na olgeta man nogut. I no gat wanpela man inap mekim olsem.
Samting Em Kingdom Bilong God Bai Mekim
God bai inapim ol tok promis bilong em long rot bilong nambatu strongpela man bilong heven na graun—em Jisas Krais, em i bin kirap bek pinis. Taim bai kamap na Jisas bai stap King bilong olgeta hap bilong graun, na i no gat wanpela man inap daunim em. Bai i no gat moa ol king, o presiden, o ol lain politik bilong dispela graun i stap bilong bosim ol man. Nogat. Bai i gat wanpela King na wanpela gavman i bosim ol—em Kingdom Bilong God.
Dispela Kingdom bai pinisim olgeta gavman bilong graun. Long bipo yet Baibel i tok profet olsem: “God bai i kirapim wanpela kingdom na dispela kingdom bai i stap oltaim oltaim. Ol arapela king i no inap daunim kingdom bilong God, tasol em bai i daunim ol na bagarapim ol arapela king na kingdom bilong en bai i stap oltaim.” (Daniel 2:44) Olgeta lain bilong graun bai stap wanbel aninit long wanpela stretpela gavman—em Kingdom Bilong God.
Taim Jisas i stap olsem man long graun, planti taim em i bin toktok long dispela Kingdom. Em i kolim dispela gavman long beten bilong em, na em i skulim ol disaipel long beten olsem: “Kingdom bilong yu i mas i kam. Mipela i mas bihainim laik bilong yu long graun olsem ol i save bihainim long heven.” (Matyu 6:10) Em nau, Jisas i soim olsem Kingdom bai kamapim laik bilong God long graun, na em laik bilong God long pinisim pen na hevi long olgeta hap bilong graun.
Stretpela gavman bilong God bai kamapim planti gutpela samting we i no gat wanpela gavman bilong ol man inap kamapim. Jehova i bin givim Pikinini bilong em olsem ofa bilong baim bek ol man na bai ol inap kisim laip i stap oltaim oltaim. Taim Kingdom i bosim graun, isi isi ol manmeri bai wok long kamap nambawan olgeta. Orait wanem samting bai kamap long dispela? Jehova “bai i pinisim dai tru na bai dai i no kamap moa long ol. God, Bikpela bai i pinisim krai bilong ol na mekim drai wara bilong ai bilong olgeta manmeri.”—Aisaia 25:8.
Ating sampela bai askim olsem: ‘Bilong wanem God i no bin kirap kwik long mekim olsem? Em i wetim wanem samting?’ Long bipo yet Jehova inap pinisim o pasim olgeta pen na hevi. Tasol em i larim i stap, na i no olsem em i tingim em yet, nogat, em i laik helpim ol pikinini bilong em long graun i go inap oltaim oltaim. Ol gutpela papamama bai larim ol pikinini i karim sampela hevi pastaim sapos ol i save olsem dispela bai helpim ol inap longpela taim. Na olsem tasol, i gat sampela as na Jehova i larim ol manmeri i karim pen na hevi inap sotpela taim, na Baibel i stori gut long ol dispela samting. Sampela as em olsem: Ol man i stap fri long makim rot ol i laik bihainim, sin i bin kamap, na wanpela bikpela tok i bin kamap olsem i no stret Jehova i stap nambawan bos. Na Baibel i tok, inap liklik haptaim Jehova i larim wanpela ensel nogut i bosim dispela graun.a
Yumi no gat spes long kamapim ol dispela as insait long dispela stori, tasol i gat tupela tok i tru we inap strongim bel bilong yumi na yumi ken wetim gutpela samting bai kamap bihain. Namba wan: Jehova bai givim planti blesing moa yet long yumi, olsem bekim bilong ol pen na hevi i bin painim yumi nau long dispela taim. Na tu, God i tok promis olsem: “Ol man bai i no inap tingim moa ol samting i bin kamap bipo.” (Aisaia 65:17) God bai stretim na pinisim tru ol bikpela pen na hevi i bin kamap insait long dispela haptaim em i bin larim pasin nogut i stap.
Namba tu: God i makim pinis wanpela taim stret bilong pinisim ol pen na hevi, na em i no inap senisim dispela taim. Tingim, Habakuk i bin askim Jehova long em bai larim pasin bilong pait na kros i stap inap long wanem taim. Jehova i bekim tok olsem: “Taim bilong ol dispela samting i mas kamap, em i no yet. . . . Yu mas wet liklik na em bai i kamap.” (Habakuk 2:3) Long stori i kamap bihain long dispela, bai yumi lukim olsem, “taim bilong ol dispela samting i mas kamap” em i klostu pinis.
[Futnot]
a Bilong kisim sampela save moa long as na God i larim pen na hevi i stap, lukim sapta 11 bilong buk Tru Tru Baibel i Tok Wanem?, ol Witnes Bilong Jehova i wokim.
[Blok long pes 7]
Ol Skripsa i Makim Gutpela Taim Bai Kamap Bihain
NO GAT PAIT MOA:
“Kaman! Yupela lukim wok Bikpela i mekim. Bai bel bilong yupela i kirap nogut long planti narakain samting em i mekim long graun. Em i save mekim i dai pait long olgeta hap graun.” —Song 46:8, 9.
OL FAMILI BILONG YUMI BAI KAM BEK:
“God bai i kirapim bek ol man i dai pinis, em ol stretpela man na ol man nogut wantaim.” —Aposel 24:15.
OLGETA MAN BAI I GAT KAIKAI:
“Planti rais na wit samting i ken kamap long ol gaden bilong ol manmeri.”—Song 72:16.
NO GAT MOA SIK:
“I no gat man . . . bai i tok olsem, ‘Mi gat sik.’ ”—Aisaia 33:24.
OL MAN NOGUT BAI I NO STAP MOA:
“God bai i rausim ol man i save mekim pasin nogut . . . Em bai i kamautim ol, olsem man i kamautim kaikai long gaden bilong en.” —Sindaun 2:22.
STRETPELA PASIN TASOL BAI STAP:
“Harim. I gat wanpela king [Krais Jisas] bai i kamap, na dispela king wantaim ol bikman bilong kantri bai ol i bihainim gutpela na stretpela pasin tasol na bosim gut ol manmeri.”—Aisaia 32:1.
[Ol Piksa long pes 7]
Kingdom Bilong God bai stretim olgeta kain pen na hevi i bin painim yumi