Baibel i Go Kamap Long Madagaska

MADAGASKA em namba 4 bikpela ailan long graun, na em i stap 400 kilomita long hap Saut-is bilong Afrika. Inap longtaim pinis lain Malagasi i bin save long nem Jehova, long wanem, nem bilong God i bin stap long Baibel bilong tokples Malagasi winim 170 yia. Ol i bin wok strong na givim bel olgeta long tanim tok bilong Baibel long tokples Malagasi.

Wok bilong tanim tok bilong Baibel long tokples Malagasi i bin kirap pastaim long ailan i stap klostu, em Marisas. Long 1813, Bikman Robert Farquhar, em gavena bilong Briten i bosim Marisas, em i kirapim wok bilong tanim tok bilong ol Gutnius i go long tokples Malagasi. Bihain em i kirapim King Radama Namba 1 bilong Madagaska long singautim ol tisa bilong London Misineri Sosaiti (LMS) long i kam long Madagaska, em ailan planti man i save kolim olsem Bikpela Retpela Ailan.

Long Ogas 18, 1818, tupela misineri bilong Wales, em David Jones na Thomas Bevan, i lusim Marisas na i kam kamap long biktaun Toamasina. Long dispela hap ol i lukim olsem ol man i save tingim tru ol samting bilong lotu, olsem pasin bilong lotuim ol tumbuna na pasin bilong kisim tok long maus bilong ol tumbuna, em samting ol i save mekim long olgeta de. Ol Malagasi i save mekim tokples i gat kain kain ol naispela tok long en, em ol tok ol i kisim long tokples Malayo-Polinesia.

Bihain liklik long Jones na Bevan i kirapim wanpela liklik skul, tupela i go kisim ol meri na pikinini bilong ol long Marisas na bringim ol i kam long Toamasina. Tasol sori tru, olgeta i kisim sik malaria, na meri na pikinini bilong Jones i dai long Disemba 1818. Tupela mun bihain, malaria i kilim i dai Bevan na meri na pikinini bilong em tu. Long dispela grup, David Jones wanpela tasol i stap laip.

Tasol Jones i no larim dispela hevi i pasim em. Em i tingting strong long mekim wok na bai ol manmeri bilong Madagaska i ken kisim Tok Bilong God. Bihain long Jones i go long Marisas bilong kamap orait gen long sik bilong em, em i kirap lainim tokples Malagasi em wanpela wok i gat hatwok bilong en. Bihain tasol long en, em i kirapim wok bilong tanim tok bilong Gutnius Bilong Jon.

Long Oktoba 1820, Jones i go bek long Madagaska. Em i go kamap long biktaun Antananarivo na em i kamapim wanpela nupela skul bilong ol asples pikinini, em skul ol misineri i ronim. Tasol i hatwok, long wanem, i no gat ol teks buk, blakbot, o tebol na sia samting. Tasol ol program bilong skul i gutpela tru na ol pikinini i amamas long lainim samting.

Bihain long Jones wanpela tasol i bin mekim wok inap 7-pela mun, em i kisim wanpela poroman husat i kisim ples bilong Bevan, wanpela misineri nem bilong em David Griffiths. Tupela i givim taim na strong olgeta bilong ol bilong tanim tok bilong Baibel i go long tokples Malagasi.

Wok Bilong Tanim Tok Bilong Baibel i Kirap

Long 1820 samting, i gat wanpela rot tasol long raitim ol tok long tokples Malagasi, ol i kolim sorabe​—ol i raitim ol tok Malagasi long ol leta Arabik. I gat liklik lain tasol inap ritim dispela tok. Olsem na bihain ol misineri i go lukim King Radama Namba I, na em i givim tok orait long ol i yusim ol leta alfabet olsem ABC, bilong senisim ol rait sorabe.

Wok bilong tanim tok i kirap long Septemba 10, 1823. Jones i tanim tok bilong Buk Stat na Buk Matyu, na Griffiths i tanim tok bilong Buk Kisim Bek na Buk Luk. Tupela i wok strong tru. Ol i mekim wok bilong tanim tok na long wankain taim ol i skulim ol pikinini long olgeta moning na apinun. Na tu, ol i redim tu ol tok bilong lotu long tripela tokples bilong skulim ol manmeri long taim bilong lotu. Maski ol i mekim olgeta dispela samting, ol i putim wok bilong tanim tok i stap namba wan samting long ol narapela wok bilong ol.

Twelpela man i helpim tupela misineri, na tupela i tanim Ol Skripsa Grik olgeta na planti buk bilong Ol Skripsa Hibru insait long 18 mun tasol. Long yia bihain, ol i pinisim wok bilong tanim tok bilong Baibel olgeta. Tasol i gat wok bilong stretim stretim ol tok bilong en. Olsem na ol i salim tupela saveman bilong tokples, em David Johns na Joseph Freeman long Inglan i kam bilong helpim dispela wok.

Karim Ol Hevi

Taim ol i pinisim wok bilong tanim Baibel long tokples Malagasi, lain London Misineri Sosaiti i salim Charles Hovenden i kam bilong sanapim na mekim wok long namba wan masin bilong prinim ol buk samting long Madagaska. Hovenden i kam kamap long Novemba 21, 1826. Tasol insait long dispela mun yet, em i kisim malaria na em i dai, na i no gat man bilong mekim wok long masin bilong prinim ol buk. Long yia bihain, ol i salim James Cameron long Skotlan i kam, em man husat i gat save long mekim dispela wok. Em i yusim liklik buk bilong masin, na em i joinim ol pats bilong masin wantaim na masin inap wok gut. Bihain long Cameron i traim traim na mekim planti popaia, em i prinim hap bilong Buk Stat sapta 1 long Disemba 4, 1827.a

Narapela samting i laik pasim wok bilong ol i kamap long Julai 27, 1828, taim Radama Namba 1 i dai. King Radama i bin sapotim tru dispela projek bilong tanim tok. David Jones i bin tok long dispela taim olsem: “King Radama i gat gutpela pasin na em i save mekim gutpela pasin pren long ol narapela. Em i save tingim tru pasin bilong kisim gutpela skul na em i laik tru bai ol lain bilong em i kisim olkain nupela save, winim tru pasin bilong kisim Gol na Silva.” Tasol taim king i dai, meri bilong em, Ranavalona Namba 1, i kisim wok king bilong em na i klia tru olsem em i no gat wankain tingting olsem man bilong em long sapotim dispela wok.

Bihain tasol long kwin i kisim dispela wok, wanpela man i kam long Inglan i askim long toktok wantaim em long wok bilong tanim tok. Kwin i no orait long dispela. Orait long narapela taim, ol misineri i tokim kwin olsem i gat planti samting yet ol i mas skulim ol manmeri long en, na tu, wok bilong skulim ol long tok Grik na tok Hibru, kwin i tok: “Mi no wari long tok Grik na tok Hibru, tasol mi laik save sapos yupela inap skulim ol lain bilong mi long sampela gutpela samting, olsem skulim ol long wokim sop.” Ol i luksave olsem kwin inap subim ol long lusim kantri paslain long ol i pinisim wok bilong tanim Baibel long tokples Malagasi, olsem na Cameron i askim kwin long givim ol 1-pela wik long tingting gut long samting kwin i bin askim ol long mekim.

Long wik bihain, Cameron i givim ol wokman bilong kwin tupela hap sop ol i bin wokim long ol samting bilong dispela ples. Dispela wok na ol narapela wok em ol misineri i mekim i amamasim kwin, dispela i mekim na ol i gat taim bilong prinim klostu olgeta buk bilong Baibel, tasol ol i no bin prinim sampela buk bilong Ol Skripsa Hibru.

Putim Nupela Lo, na Bihain Em i Senisim

Maski kwin i bin sakim ol misineri, long Me 1831, em i putim wanpela nupela lo. Em i orait long ol lain bilong em ol i ken kisim baptais na kamap Kristen! Tasol dispela disisen i no stap longpela taim. Buk A History of Madagascar, i tok: “Planti man i kisim baptais na dispela i mekim ol man insait long haus king i tingting planti, olsem na ol i tok strong long kwin olsem sapos olgeta man i kisim baptais ol i no inap aninit moa long em na ol bai aninit long gavman bilong Briten.” Olsem na long pinis bilong 1831, kwin i tambuim pasin bilong kisim baptais, em 6-pela mun tasol bihain long em i bin givim tok orait.

Kwin i gat tupela tingting, na tu, ol man long gavman bilong em i laik bihainim yet pasin bilong ples, dispela i kirapim ol misineri long pinisim wok bilong prinim Baibel. Ol i pinisim wok bilong prinim Ol Skripsa Grik na ol i tilim planti tausen kopi long ol manmeri. Tasol i gat narapela hevi i kamap long Mas 1, 1835, taim Kwin Ranavalona Namba 1 i putim tambu long lotu Kristen na i tok long ol i mas bringim olgeta buk Kristen i kam long gavman.

Dispela lo bilong kwin i makim olsem ol Malagasi i no inap helpim moa wok bilong prinim ol buk. Olsem na i gat liklik lain misineri tasol bilong pinisim wok, so ol i wok long san na nait i go inap long Jun 1835, ol i kamapim Baibel olgeta. Em nau, ol i kamapim Baibel bilong tokples Malagasi!

I gat tambu yet long ol buk Kristen, olsem na kwiktaim ol i tilim ol Baibel, na inap 70 kopi bilong dispela Baibel ol i bin digim graun na haitim bilong lukautim Baibel na bai em i no ken pinis olgeta. I gutpela na ol i bin mekim olsem, long wanem, i no winim wanpela yia yet na i gat tupela misineri tasol i stap long ailan. Tasol tok bilong God i go long olgeta hap bilong dispela Bikpela Retpela Ailan.

Ol Malagasi i Laikim Tru Baibel

Ol manmeri bilong Madagaska i amamas tru long ritim Tok Bilong God long tokples bilong ol yet! Dispela Baibel i gat sampela popaia long en na tokples ol i bin raitim Baibel long en em i bilong bipo. Maski i olsem, klostu olgeta haus i gat Baibel long en na planti Malagasi i save ritim Baibel long olgeta taim. Wanpela gutpela samting long dispela Baibel em ol i bin raitim nem bilong God, em Jehova, long planti hap bilong Ol Skripsa Hibru. Long ol olpela rait, nem bilong God i bin stap tu long Ol Skripsa Grik. Olsem na planti Malagasi, ol i save long nem bilong God.

Taim Mista Baker​—em man i save mekim wok long masin bilong prinim ol buk​—i bin prinim ol namba wan kopi bilong Ol Skripsa Grik, em i lukim ol Malagasi i amamas tru na em i tok: “Mi no mekim tok profet, tasol mi no ting ol bai pinisim tok bilong God long dispela kantri!” Tok bilong em i kamap tru. Maski i gat sik malaria, hatwok bilong lainim tokples, o ol strongpela lo bilong gavman, dispela olgeta samting i no inap pasim ol long kamapim Baibel long tokples bilong ol Madagaska.

Nau ol samting i kamap gutpela moa. Olsem wanem? Long 2008, ol i kamapim New World Translation of the Holy Scriptures, Baibel olgeta long tokples Malagasi. Dispela Baibel i bikpela samting tru, long wanem, ol i raitim ol tok bilong en long tokples bilong nau we ol man i kliagut long en. Olsem na nau Tok Bilong God i stap strong moa long dispela Bikpela Retpela Ailan.​​—Ais. 40:8.

[Futnot]

[Piksa long pes 31]

Baibel “New World Translation” long tokples Malagasi i litimapim nem bilong God, em Jehova