Yu Ting Graun Bai Pinis?

“PINIS bilong dispela graun, em samting planti taim ol muvi i save kamapim stori bilong en, na em samting ol man i save laikim,” em tok bilong John Scalzi, man bilong raitim ol stori samting. Bilong wanem ol man i save laikim ol muvi i stori long pinis bilong dispela graun? Scalzi i tok, “Long wanem, ol i stori long ol samting yumi save pret long en.” Yu wanbel long dispela tok? Yu ting i gat as na yumi mas pret long olsem wanem, na long wanem taim graun na olgeta samting i stap laip long en bai pinis?

Klostu long olgeta de, yumi harim stori bilong ol bikpela bagarap olsem guria na saiklon samting i kamap long planti hap na i bagarapim tru ol samting. Planti taim ol i soim piksa bilong ol dispela bagarap long TV na Intenet, na piksa bilong ol dispela bagarap i mekim yumi pret. Taim yumi lukim piksa bilong ol man na ol ples tru tru i bagarap, i no hatwok long yumi kisim tingting olsem pinis bilong dispela graun em wanpela bikpela hevi tru na i no wanpela stori nating i kamap long muvi.

Na tu, ol man i pret moa yet long tok ol saientis i mekim long graun bai pinis olsem wanem. Sampela saientis i kolim det stret bilong graun bai pinis. Long Mas 2008, wanpela nius (Monthly Notices of the Royal Astronomical Society) i tok olsem sampela saveman bilong skelim ol sta i tok, bihain long 7 bilion yia samting, san bai kukim graun olgeta na graun bai kamap wara na pinis olgeta.

Yu ting tru tru graun bai pinis olgeta long bihain?

I Gat Det Stret Bilong Makim Graun Bai Bagarap?

Baibel i tok: “Ol manmeri i save dai na nupela lain i save kamap na senisim ol. Tasol graun i no save senis. Oltaim em i stap olsem tasol.” (Saveman 1:4) God Jehova i putim gut “dispela graun i stap long ples bilong en” na em i wokim bilong “i stap strong olgeta. Em i no inap surik liklik.” (Song 104:5) Yu ting dispela tok bilong God bai kamap tru? I gat wanem as na yu bilip olsem graun bilong yumi i no inap bagarap, maski sampela saientis i tok olsem em bai pinis?

Orait, tingim ol kaikai samting i stap long wanpela bikpela stua. Sampela i gat det stret i makim taim bilong ol long bagarap. Husat i makim dispela det? Yu ting maneja bilong stua i makim det? Nogat! Lain bilong wokim ol dispela kaikai samting ol i skelim na ol i makim det stret em ol kaikai bai bagarap. Yumi no gat tupela tingting long dispela det, long wanem, ol i save gut long dispela samting, winim ol narapela man. Olsem na yumi ken bilip tru long dispela Man Bilong Wokim graun bilong yumi! Baibel i tokaut klia olsem em i ‘putim graun i stap long ples bilong en, na i no inap surik,’ em bai i stap oltaim oltaim. I no gat det bilong makim olsem graun bai bagarap, nogat tru!​​—Song 119:90.

Tasol yu ting ol man bai bagarapim dispela graun olgeta na i no gat rot bilong stretim gen? Nogat tru! Jehova i no olsem ol lain bilong wokim ol kaikai samting, nogat, em “inap mekim olgeta samting.” (Jop 42:2) Long dispela as na em i tok stret olsem: “Tok bilong mi bai i . . . kamapim ol samting mi gat laik long ol i mas kamap.” (Aisaia 55:11) Yumi ken bilip tru olsem Man Bilong Wokim yumi bai i no inap larim wanpela samting i pasim em long kamapim laik bilong em long dispela graun. (Song 95:6) Wanem dispela laik, na olsem wanem God bai inapim dispela laik?

Kingdom Bilong God Bai Kamapim Laik Bilong Em

Baibel i tok olsem graun bai i no inap bagarap, nogat tru, na tu, em i tok, God i “wokim [graun] bilong olgeta samting i ken i stap long en.” (Aisaia 45:18) Tru, ol man, ol animal, na ol diwai na purpur samting, i stap long graun inap planti tausen yia pinis, tasol dispela samting tasol i no inapim olgeta laik bilong God, nogat.

Jehova em i ‘God bilong amamas’ na em “i save laikim tumas stretpela pasin.” (1 Timoti 1:​11; Song 37:28) Em i laik bai olgeta manmeri i stap amamas na ol i no ken karim ol hevi bilong pasin i no stret. Bilong inapim laik bilong em, God bin tok profet olsem em bai kamapim wanpela Kingdom long heven we bai bosim olgeta hap bilong graun. (Daniel 2:​44) Taim Jisas i stap long graun, oltaim em i bin autim tok long Kingdom o gavman bilong God. Em i kirapim ol disaipel bilong em long beten long dispela Kingdom, long wanem, em i save olsem taim Kingdom i bosim graun, em bai kamapim planti blesing. (Matyu 6:​9, 10; 24:14) Wanem sampela bilong ol dispela blesing?

▪ Gutaim na bel isi bai i stap, long wanem, God i promis long mekim i dai olgeta pait.​​—Song 46:9.

▪ Bai i gat planti kaikai bilong olgeta manmeri.​​—Song 72:16.

▪ Bai i no gat hevi bilong sik, long wanem, ‘i no gat man bai i tok olsem, “Mi gat sik.” ’​​—Aisaia 33:24.

▪ Bai i no gat hevi bilong krai sori, long wanem, “ol manmeri bai i no i dai moa.” ​​—KTH 21:4.

▪ God i promis olsem ol manmeri bilong em bai i wokim ol haus bilong ol, na sindaun gut na “amamas oltaim.”​​—Aisaia 65:​17-​24.

Yu tu i gat laik long kisim kain sindaun olsem, a? Jehova i gat strongpela laik long inapim olgeta dispela samting em i bin tok profet long en. (Aisaia 9:​6, 7) Tasol ating yu bai tingting: ‘Ol man i bin raitim ol dispela tok promis bilong God long Baibel inap planti tausen yia i go pinis. Bilong wanem na ol dispela tok promis i no kamap tru yet?’

Pasin Bilong God Long Wet i Opim Rot Long Em i Kisim Bek Yumi

Yumi save olsem “Bikpela i no save wok isi isi long kamapim samting em i bin promis long mekim.” Baibel i tok God i wet i stap na i isi long yumi. Olsem na dispela i mas kirapim yumi long tingim dispela: “Bikpela i wet yet na em i isi long yumi . . . long wanem, em i laik kisim bek yumi.” (2 Pita 3:​9, 15) Tasol bilong wanem na pasin bilong God long wet em i bikpela samting long em i ken kisim bek yumi?

Namba wan samting em olsem: God i save olsem, paslain long em i ken givim gutpela sindaun na gutpela ples long ol stretpela manmeri, em i mas “bagarapim ol man i bin bagarapim graun.” (KTH 11:18) Tasol Jehova i laikim tru yumi ol manmeri, olsem na “em i no laik bai wanpela man i lus.” Papa bilong yumi long heven i no les long givim tok lukaut long ol ‘man i mekim pasin nogut long senisim tingting na pasin bilong ol.’ I go inap long dispela taim i kamap, Jehova i kirapim lain bilong em long autim yet tok bilong Kingdom bilong em long olgeta hap bilong graun.a (Esekiel 3:​17, 18) Olgeta man husat i harim tok lukaut bilong God na i senisim pasin bilong ol bambai i stret wantaim ol stretpela stiatok bilong em, em bai kisim bek ol na ol bai i stap laip oltaim long Paradais long graun.

Go Long God na Bai Yupela i Stap Gut

Tru tumas, Baibel i gat “gutnius” bilong amamasim yumi. (Matyu 24:14) Em i kamapim ol tok promis bilong God olsem graun bilong yumi bai i no inap pinis! Tasol olsem ol tok profet bilong Baibel i kamapim, yumi ken bilip tru olsem “i no longtaim na bai ol man nogut i lus olgeta.” Klostu nau, ol man em ol i stap stret long ai bilong God, “bai God i givim olgeta graun long ol. Bai ol i sindaun gutpela tumas na amamas i stap.” (Song 37:​9-​11, 29; Matyu 5:5; KTH 21:​3, 4) I go inap long dispela taim, God i wet i stap yet na i singautim ol manmeri, olsem: “Yupela ol manmeri bilong olgeta hap bilong graun, yupela i mas kam long mi, na bai yupela i stap gut.” (Aisaia 45:22) Bai yu mekim wanem?

I gutpela sapos yu tingting strong long i go long God. Buk Song 37:34 i tok: “Yu mas bilip long Bikpela na prea long em na bihainim pasin bilong em. Sapos yu mekim olsem, bai em i givim biknem long yu, na yu ken holim dispela graun em i givim yu.” Ol Witnes Bilong Jehova i amamas long helpim yu long kisim save long samting God i tingting pinis long mekim long dispela graun na olsem wanem yu inap i stap na lukim dispela samting i kamap tru.

[Futnot]

[Piksa Kredit Lain long pes 22]

NASA photo