Ol Wido Meri na Wido Man​—Ol i Nidim Wanem Samting? Olsem Wanem Yu Inap Helpim Ol?

Insait long kitsen long liklik flet bilong em, Jeanne i putim ol plet samting long tebol. Em i laik kaikai. Wantu em i lukluk long tupela plet em i bin putim long tebol . . . na em i krai. Em i bin putim tupela plet long tebol olsem em i bin mekim planti taim bipo! Inap tupela yia i go pinis, gutpela man bilong em i bin dai.

OL MANMERI em dispela hevi i no bin painim ol, ol i no inap pilim bikpela bel hevi i save kamap taim poroman marit i dai. Taim dispela hevi i painim wanpela, em i no inap bilip hariap olsem dispela samting i bin kamap. Beryl i gat 72 krismas, na man bilong em i dai wantu tasol. Pastaim Beryl i no inap bilip olsem man bilong em i dai pinis. Em i tok: “I olsem dispela samting i no bin kamap tru. Mi no inap bilip olsem em bai no kam bek long haus.”

Taim ol dokta i katim na rausim wanpela lek samting bilong man, sampela taim em bai pilim olsem lek i stap yet. Na olsem tasol, taim wanpela marit i dai, poroman bilong em i ting em i lukim em i wokabaut namel long planti man, o sampela taim em i mekim wanpela tok long poroman, tasol em i no stap moa!

Planti taim ol pren na famili i no save long samting ol i mas mekim long wanpela em poroman marit bilong em i dai. Yu save long wanpela em poroman marit bilong em i dai pinis? Orait yu ken helpim em olsem wanem? Yu mas save long wanem ol samting na bai yu inap helpim ol wido meri na wido man taim ol i krai sori? Olsem wanem yu inap helpim ol na bai isi isi ol i ken kisim amamas gen?

Ol Samting Yu No Ken Mekim

Taim wanpela i karim dispela kain hevi, ating ol pren na famili tu i bel hevi tru long dispela, na ol i laik helpim em na i traim long sotim dispela haptaim bilong em long krai sori long poroman i dai pinis. Tasol wanpela man bilong skelim dispela samting em i bin toktok wantaim 700 wido man na wido meri, na em i tok: “Yumi no inap makim wanpela haptaim stret bilong man o meri i ken krai sori.” Olsem na yu no ken traim long pinisim kwik taim bilong krai sori bilong wanpela em poroman marit bilong em i dai pinis, nogat, givim taim long em long krai sori.​—Stat 37:​34, 35; Jop 10:1.

Sampela taim i stret long helpim ol long stretim ol samting bilong fiuneral, tasol nogut yu ting yu mas bosim olgeta samting. Paul, wanpela wido man i gat 49 krismas, em i tok: “Sampela i bin helpim mi long ol samting, tasol tu mi amamas long ol i larim mi i bosim ol wok bilong planim meri bilong mi. Em i bikpela samting long mi long ol samting i mas wok gut long fiuneral bilong meri bilong mi. Mi pilim olsem em i laspela samting mi inap mekim bilong givim ona long em.”

Tru, planti bai amamas long kisim sampela helpim. Eileen, wanpela wido i gat 68 krismas, em i tok: “Wok bilong stretim fiuneral na stretim ol pepa wok i hatwok tru long mi, long wanem, long dispela taim mi no inap tingting stret. Tasol pikinini man bilong mi na meri bilong em i bin helpim mi gut.”

Na tu, yu no ken pret long stori long poroman i dai pinis. Beryl i tok: “Ol pren bilong mi ol i helpim mi gut tru. Tasol mi lukim olsem planti ol i surik long stori long man bilong mi, John. I olsem em i no bin i stap bipo, na mi bel hevi liklik long dispela.” Bihain, ating ol wido meri na wido man ol i laik stori long poroman bilong ol. Yu inap tingim wanpela gutpela pasin o wanpela pani stori bilong dispela poroman i dai pinis? Orait stori long dispela long poroman i stap laip yet; no ken pret long mekim olsem. Sapos yu ting em bai amamas long harim, tokim em long ol pasin bilong poroman em yu bin amamas long en o yu save tingim yet. Ating dispela bai helpim em long pilim olsem ol narapela tu i krai sori long poroman bilong em i dai pinis.​—Rom 12:15.

Taim yu laik helpim wanpela em poroman bilong em i dai pinis, yu no ken givim planti tok tumas long em long ol samting em i mas mekim. No ken subim em long wokim ol disisen hariap.a Nogat. Bihainim savetingting na askim yu yet olsem, ‘Wanem ol gutpela samting mi inap mekim bilong helpim pren o wanblut long karim hevi bilong dispela taim nogut i bin painim em?’

Samting Yu Inap Mekim

Long ol de bihain long wanpela marit i dai, ating poroman bai amamas long sampela i helpim em. Ating yu inap kukim sampela kaikai, o givim rum slip long sampela wanblut i kam lukim em, o lusim hap taim bilong stap wantaim em.

Yu mas save tu olsem ol man na meri i no gat wankain pasin long karim hevi bilong poroman marit i dai na long i stap wanpis. Olsem: Long sampela hap, winim 50 pesen bilong ol wido man ol i save marit gen insait long 18 mun bihain long taim meri i dai​—tasol planti wido meri i no save marit gen hariap. Wanem samting i mekim na ol i narapela kain?

Planti ol i ting olsem ol man i save marit gen bambai ol i gat meri bilong lukautim ol o bilong inapim laik bilong mekim maritpasin, tasol dispela i no tru. Ol man i save kamapim tingting i stap long bel bilong ol long meri bilong ol tasol, olsem na taim meri bilong ol i dai, ol i bel hevi tru long i stap wanpis. Tasol ol wido meri inap toktok wantaim ol pren bilong ol na kamapim ol tingting i stap long bel, maski sampela taim ol pren bilong man bilong ol i lusim tingting long ol dispela wido meri. Dispela pasin bilong ol wido man i kamapim klia as na planti ol i ting ol i mas marit gen bilong pinisim bel hevi bilong i stap wanpis, maski ol i hariap tumas long kisim nupela poroman. Olsem na i luk olsem ol wido meri inap karim gut hevi bilong i stap wanpis.

Maski pren o wanblut em i man o meri, yu ken mekim wanem bilong helpim em long karim hevi bilong i stap wanpis? Helen, wanpela wido meri i gat 49 krismas, em i tok: “Planti ol i gat laik long helpim mi, tasol ol i no go pas long mekim sampela samting. Ol i save tok, ‘Sapos i gat sampela samting mi ken mekim bilong helpim yu, orait toksave long mi.’ Tasol mi amamas taim sampela i tokim mi, ‘Mi laik go long stua. Yu laik kam wantaim mi?’ ” Paul, em meri bilong em i dai long sik kensa, em i tok long as na em i amamas taim sampela i singautim em long i go kaikai samting. Em i tok: “Sampela taim mi no laik toktok wantaim ol narapela o toktok long hevi bilong mi. Tasol taim mi bung wantaim ol, bel bilong mi i gutpela na mi no pilim olsem mi stap wanpis olgeta. Mi save olsem ol i tingim mi tru, na dispela i helpim mi long karim bel hevi bilong mi.”b

Taim Ol i Pilim Hevi Bilong Yu

Helen i lukim olsem taim ol wanblut i go bek long ol wok samting bilong ol, long dispela taim em i laik bai i gat sampela bilong strongim bel bilong em. Em i tok: “Taim poroman marit i dai, ol pren na famili i stap wantaim yu bilong helpim yu, tasol bihain ol i kirap mekim gen ol wok bilong ol yet. Tasol i stap bilong yu i senis.” Ol pren tru i save long dispela, olsem na ol bai mekim yet ol samting bilong helpim na strongim bel bilong man o meri em poroman i dai pinis.

Ating wido man o wido meri i laik bai sampela i stap wantaim em long de bilong weding aniveseri bilong em o de poroman marit i bin i dai. Eileen i tok, bikpela pikinini man bilong em i save helpim em long karim hevi bilong i stap wanpis long de bilong weding aniveseri bilong em. Em i tok: “Long olgeta yia, pikinini bilong mi Kevin i save kisim mi i go raun long sampela hap. Mi save lans wantaim em, na em i de bilong mama na pikinini i stap wantaim.” Gutpela sapos yu tingim ol de o taim we wanpela wanblut o pren i save bel hevi long poroman marit i bin i dai. Yu ken stretim rot bambai yu o ol narapela i ken stap wantaim em long dispela taim bilong bel hevi.​—Sindaun 17:17.

Sampela wido i lukim olsem ol inap mekim gut bel bilong sampela i gat wankain hevi. Annie, em man bilong em i dai inap 8-pela yia i go pinis, em i stori long pasin bilong em long pren wantaim narapela wido meri. Em i tok: “Em i no larim bel hevi i daunim em, na dispela i kirapim tingting bilong mi na strongim mi long i stap strong i go yet.”

Yes, taim man o meri i winim taim bilong krai sori tru na bel bilong em i strong liklik, em inap long helpim na strongim ol narapela. Baibel i stori long tupela wido meri, em Rut wantaim tambu meri bilong em, Naomi, em tupela i kisim helpim taim narapela i helpim narapela. Dispela gutpela stori i soim olsem wanem pasin bilong narapela long tingim gut narapela i helpim dispela tupela meri long daunim bel hevi na karim ol hevi i painim ol.​—Rut 1:​15-17; 3:1; 4:​14, 15.

Taim Bilong Kamap Orait

Bilong kirap mekim gen ol wok samting bilong olgeta de, ol wido man na wido meri i mas skelim gut ol samting na bai ol i balensim pasin bilong tingting long poroman i dai pinis na lukautim ol yet long ol samting ol i nidim long nau. Saveman King Solomon i tok, i gat “taim bilong krai.” Tasol em i tok tu olsem i mas i gat taim bilong “oraitim” man.​—Saveman 3:​3, 4.

Paul i tok piksa long hatwok bilong daunim pasin bilong tingting i go bek long taim bipo. Em i tok: “Mi na meri bilong mi i kain olsem tupela yangpela diwai i pas wantaim na i go bikpela. Tasol bihain wanpela diwai i dai na ol i rausim, na nau narapela diwai i luk krungut. Mi pilim narapela kain stret taim mi stap wanpis.” Sampela i ting ol i mas i stap gut long poroman i dai pinis, olsem na oltaim ol i tingting long em. Na sampela i ting, sapos ol i kisim liklik amamas, i olsem ol i givim baksait long poroman, olsem na ol i no laik raun o bung wantaim ol narapela. Olsem wanem yumi inap helpim ol na isi isi ol i ken winim bel hevi bilong ol, na kirap gen long amamas na mekim ol wok samting?

Namba wan samting yumi ken mekim, em yumi ken helpim em long kamapim ol tingting i stap long bel bilong em. Herbert, em i stap wido inap 6-pela yia, i tok: “Mi save tingting yet long taim sampela i kam lukim mi na ol i sindaun isi na putim yau taim mi stori long ol samting mitupela i bin mekim bipo, o mi kamapim sampela tingting em mi wok long tingim long dispela taim stret. Mi save sampela taim i hatwok long ol narapela i stap wantaim mi, tasol mi amamas long ol i pilim gut hevi bilong mi.” Paul i pilim tru gutpela pasin bilong wanpela pren husat i askim Paul planti taim long em i stap olsem wanem. Paul i tok: “Mi pilim tru gutpela pasin na tok isi bilong em, na planti taim mi save kamapim bel bilong mi long em.”​—Sindaun 18:24.

Taim wido man o wido meri i kamapim kain kain tingting, olsem bel hevi long pasin em i bin mekim long poroman, o bel i gat tok, o em i bel kros, orait em i kirap long lain long karim hevi bilong nupela sindaun bilong em. Yumi ken tingim King Devit, taim em i krai sori na kamapim bel hevi bilong em long God Jehova, dispela i givim strong long em long “kirap” gen na long bilip olsem tru tru pikinini bilong em i dai pinis.​—2 Samuel 12:​19-23.

Tru, pastaim i hatwok, tasol bihain wido man o wido meri i mas kirap mekim ol wok samting bilong olgeta de olsem bipo em i bin mekim. Olsem wanem? Yu inap singautim em long mekim sampela samting wantaim yu, olsem raun long ol stua o go wokabaut liklik? Yu inap askim em long helpim yu long mekim wanpela wok? Em wanpela rot bilong helpim em na em i no stap wanpis. Olsem: Ating wido meri inap lukautim ol pikinini bilong yu o soim yu long pasin bilong kukim wanpela gutpela kaikai. O wido man inap helpim yu long stretim sampela samting long haus. Long dispela rot ol bai insait long ol gutpela wok, na tu, ol bai pilim olsem i stap bilong ol i gat as tru bilong en.

Taim dispela man o meri wanpis i kirap toktok gen wantaim ol narapela na kamapim bel bilong em, ating em bai kisim bek laik bilong mekim ol wok na kisim amamas, na ating em inap putim ol nupela mak bilong winim. Dispela samting i bin painim Yonette, em wanpela wido mama i gat 44 krismas. Em i tok: “Mi hatwok tru long kirap mekim gen ol wok bilong olgeta de! Mekim ol wok bilong haus, skelim gut mani bilong baim ol samting, na lukautim 3-pela pikinini, em i hatwok tru!” Tasol isi isi Yonette i lain long stretim gut ol wok bilong em na toktok gut wantaim ol pikinini. Na em i lain long larim ol gutpela pren bilong em i helpim em long ol samting.

‘Laip Em Wanpela Gutpela Presen’

Bilong helpim gut man o meri em poroman bilong em i dai pinis, ol pren na famili i mas i gat stretpela tingting. Inap sampela mun o yia, wido bai wok long winim bel hevi bilong em, sampela taim em i stap bel isi na bihain em i bel hevi gen. Tru tumas, “dispela hevi i bin kamap long em” inap bagarapim tru bel bilong em.​—1 King 8:​38, 39.

Long taim em i bel hevi olsem, em i taim bilong stiaim em isi isi na strongim em bambai em i no ken surik long i stap wantaim ol narapela. Dispela kain helpim i bin mekim na planti wido meri na wido man i kisim nupela strong long stiaim gut laip bilong ol. Claude, wanpela wido man i gat 60 krismas, na nau em i mekim wok bilong autim gutnius fultaim long Afrika. Em i tok: “Mi tingim laip olsem wanpela gutpela presen, maski mi bel hevi tru long poroman bilong mi i no stap moa wantaim mi.”

Taim poroman marit i dai pinis, i stap bilong ol wido i no wankain moa olsem bipo. Tasol ol man na meri i stap yet bihain long poroman bilong ol i dai, ol i gat planti samting yet em ol i ken mekim bilong helpim ol narapela.​—Saveman 11:​7, 8.

[Ol Futnot]

[Rait long pes 11]

Ol pren tru bai mekim yet ol samting bilong helpim na strongim bel bilong ol wido

[Blok/Piksa long pes 12]

Gutpela Samting Bilong Holim o Inap Pasim Yu Long Winim Bel Hevi?

Helen, em man bilong em i dai inap sampela yia i go pinis, em i tok: “Mi holim planti samting bilong man bilong mi. Mi lukim olsem ol dispela samting i kirapim mi long tingim ol amamas mitupela i bin kisim. Mi no laik tromoi hariap ol samting bilong em, long wanem, taim ol yia i kam na i go pinis, tingting inap senis.”

Tasol Claude, em meri bilong em i dai winim 5-pela yia i go pinis, em i tok: “Mi no gat wok long holim i stap ol samting bilong em bambai mi ken tingim em. Mi bin tromoi ol samting bilong em na mi ting dispela i bin helpim mi long kisim stretpela tingting olsem em i no stap moa, na i helpim mi long karim hevi bilong krai sori.”

Tok bilong tupela i soim olsem ol man i no gat wankain tingting long samting ol i laik mekim long ol samting bilong poroman i dai pinis. Olsem na ol pren na wanblut i gat gutpela tingting, ol bai no strong long kamapim tingting bilong ol yet long dispela samting.​—Galesia 6:​2, 5.

[Ol Piksa long pes 9]

I gat sampela de stret we ol i laik bai yu helpim ol?

[Piksa long pes 9]

Singautim ol i go mekim ol samting wantaim yu

[Ol Piksa long pes 10]

Singautim ol wido long insait wantaim yu long sampela wok o amamas