“I Go Inap Long Indai i Pinisim Marit Bilong Yumi”

PLANTI marit i bin amamas long kolim dispela tok long de ol i marit​​—tasol ating ol i no tingim olsem bihain dai bai pinisim marit bilong ol. Pasin bilong go lapun, sik, o wanpela eksiden inap pinisim laip bilong wanpela poroman marit na nau poroman bilong em i stap wanpis na bel hevi.​​—Saveman 9:​11; Rom 5:​12.

Ol ripot i soim olsem klostu 50 pesen bilong ol meri husat i gat 65 krismas o moa, ol i stap wido. Ol i ting ol meri bai kamap wido hariap, winim ol man inap 3-pela taim. Olsem na planti man i ting, bel hevi bilong poroman marit i dai, em samting i save painim ol meri tasol. Tasol ol man tu i karim dispela hevi. Tru tumas, planti milion manmeri i bin karim dispela hevi. Olsem wanem? Yu wanpela bilong ol?

Maski yu wanpela man o meri, yu ken mekim wanem sapos yu karim dispela hevi? Yu ting Baibel inap helpim yu long karim dispela hevi? Sampela wido meri na wido man i bin karim dispela hevi olsem wanem? Maski i no gat wanpela kain rot tasol bilong helpim olgeta wan wan, i gat ol stiatok inap helpim ol.

Ol Samting Yu Ken Mekim Bilong Karim Hevi

Tru, sampela i ting olsem pasin bilong krai em mak bilong man i no gat strong na inap nogutim man. Tasol Joyce Brothers, em wanpela savemeri na em yet i wanpela wido, i tok aiwara i olsem marasin bilong helpim bel na tingting. Pasin bilong krai em nomol samting ol manmeri i save mekim taim wanpela i dai na dispela i mekim isi bel bilong ol. Olsem na no ken sem long krai. Baibel i stori long wanpela man i bin mekim olsem. Abraham i gat strongpela bilip tru na God i kolim em pren bilong Em. Tasol taim gutpela meri bilong Abraham, Sara, i dai, Abraham “i sori tru na i krai long em.”​​—Stat 23:2.

Tru, em nomol long man i no laik stap wantaim ol narapela long dispela kain taim, tasol no ken stap wanpis olgeta. Sindaun 18:1 i tok lukaut olsem: “Man i save stap wanpis, em i save tingting long em yet tasol.” Mobeta yu larim ol famili na ol gutpela pren i helpim yu. Wanpela gutpela rot bilong helpim yu em kongrigesen Kristen, we ol strongpela Kristen man i ken givim helpim na gutpela tok long yu long taim yu nidim.​​—Aisaia 32:​1, 2.

Sampela i tok, taim ol i bekim ol pas na kat em ol narapela i bin salim i kam long ol bilong mekim gut bel bilong ol, dispela i save helpim ol. Dispela i opim rot long yu long rait na stori long ol gutpela samting em yu inap tingim long poroman bilong yu na ol samting yutupela i bin mekim wantaim. Bilong helpim yu long daunim bel hevi, yu ken putim ol poto bilong yutupela, ol pas, na ol kat i gat naispela tok long en long wanpela albam.

Long man o meri em poroman bilong em i dai nau tasol, em nomol olsem tingting bilong em bai paul. Tasol taim yu wok strong long mekim yet ol samting yu save mekim long olgeta taim, dispela bai helpim yu. Olsem: Sapos i gat wanpela taim stret yu bin makim bilong go long slip, kirap long slip, kaikai, o mekim ol narapela wok, bihainim yet dispela pasin. Plenim sampela samting yu inap mekim long ol taim we yu pilim bel sori tru, olsem long ol wiken o long weding anivesari bilong yu. Em i bikpela samting long wok strong long mekim yet ol wok bilong God em yu save mekim.​​—1 Korin 15:58.

Bel hevi inap mekim na man i no inap skelim gut ol samting. Long dispela taim, ating ol man husat i gat tingting nogut na ol i laik inapim laik bilong ol yet, ol inap giamanim yu. Olsem na no ken hariap long wokim disisen long salim haus bilong yu, o investim bikpela mani long wanpela samting, o go sindaun long narapela hap, o marit gen. Wanpela savetok i tok: “Sapos ol man i hariap tumas long mekim wok, bai wok bilong ol i no kamap gutpela na ol bai i sot long ol samting.” (Sindaun 21:5) Sapos yu tingting long mekim sampela bikpela senis long sindaun bilong yu, wet pastaim inap long taim tingting na bel bilong yu i kamap strong gen.

Em bai no isi taim yu stretim ol samting bilong poroman bilong yu, moa yet sapos yutupela i bin stap wantaim inap planti yia. Tasol sapos yu wok long surikim taim bilong mekim ol dispela samting, bel hevi bilong yu bai stap longpela taim. (Song 6:6) Sampela i laik mekim ol dispela samting taim ol yet i stap wanpis, tasol sampela i laik bai wanpela gutpela pren i helpim ol na bai ol i ken stori wantaim long ol gutpela samting i bin kamap. Na tu, ating yu ken askim wanpela pren o famili long helpim yu long stretim ol pepa wok, olsem kisim dai setifiket; toktok wantaim ol wok lain bilong gavman, go long beng; senisim taitol bilong haus samting, na baim ol medikal bil.

Tingim: Yumi stap namel long ol man i save mekim ol kain kain pasin nogut. Nau yu stap wanpis, na ating dispela bai traim pasin bilong yu long wok strong long bihainim stretpela pasin. Tok bilong aposel Pol i stret tru long taim bilong yumi, winim olgeta taim bipo, em i tok: “Yupela i mas bosim ol laik na tingting nogut i save kamap long bel bilong yupela, bai yupela i bihainim ol gutpela pasin na ol pasin God i laikim. Nogut ol dispela laik na tingting nogut i pulim yupela na yupela i go mekim olkain pasin pamuk.” (1 Tesalonaika 4:​4, 5) Olsem na em savepasin long abrusim ol muvi i stori long man na meri i laikim narapela narapela o ol muvi bilong maritpasin, na ol buk na musik i stori long ol dispela samting.

Na tu, bilong kamap orait gen, sampela haptaim i mas lus. Nius USA Today i tok olsem wok painimaut em wanpela lain (University of Michigan Institute for Social Research) i mekim, i soim olsem man o meri em poroman bilong em i bin dai, bikpela haptaim liklik, olsem 18 mun samting, i mas lus pastaim bambai tingting na bodi bilong em i ken kamap orait gen. Beten askim God long givim yu pasin bilong karim hevi​—ol pasin holi spirit i kamapim, ol tu inap helpim yu. (Galesia 5:​22, 23) Ating long nau yu ting yu no inap orait gen, tasol yu bai pilim orait isi isi bihain long sampela haptaim moa i lus.

Ol Samting Sampela i Bin Mekim Bilong Karim Hevi

Anna na man bilong em i bin marit inap 40 yia, na ol i stap amamas wantaim. I no longtaim i go pinis, man bilong em i dai, na Anna i bel hevi tru. Em i tok: “Mama bilong mi i bin dai taim mi gat 13 krismas, bihain papa na tupela brata bilong mi, na tu, sista bilong mi, ol i dai. Tasol bel hevi mi pilim taim man bilong mi i dai, i winim tru bel hevi mi bin pilim taim famili i dai. Em kain olsem naip i katim mi long tupela hap na mi pilim bikpela pen nogut tru.” Wanem samting i helpim em long karim dispela pen? Em i tok: “Mi kisim wanpela bikpela buk na putim ol kat long en na ol naispela tok ol pren i bin raitim long E-meil bilong soim olsem ol i laikim na pilim tru olgeta gutpela pasin bilong Darryl. Olgeta wan wan kat na E-meil i stori long sampela gutpela pasin bilong em. Mi save tru olsem Jehova tu i tingim Darryl na em bai kirapim em bek.”

Esther i gat 88 krismas i stori long samting i bin helpim em. Em i tok: “Mitupela man bilong mi i bin stap wantaim inap 46 yia. Mi hatwok tru long karim hevi bilong stap wanpis. Tasol mi luksave olsem taim mi bisi long mekim ol wok bilong God, dispela i bin helpim mi tru. Mi no bin lusim pasin bilong go long ol miting Kristen, toktok wantaim ol narapela long tok bilong Baibel, na ritim Baibel. Pasin bilong bung wantaim ol narapela, dispela tu i bin helpim mi. Mi laik bung wantaim ol pren em ol i save putim gut yau long mi. Tru, i no olgeta taim ol inap mekim sampela gutpela tok bilong mekim gut bel bilong mi, tasol mi save tenkyu tru long ol i givim taim bilong ol long mi na putim yau long tok bilong mi.”

Robert i bin marit inap 48 yia na meri bilong em i kisim kensa na i dai. Em i tok: “I hatwok tru taim poroman bilong mi i dai, em poroman mi save toktok wantaim, wokim ol disisen wantaim, raun na holide wantaim, na mekim ol samting wantaim long wan wan de. Em hatwok tru, tasol mi pasim strong tingting olsem mi mas mekim yet ol samting na mi no ken givap. Mi no stap nating tasol, mi mekim wok long bodi na tingting bilong mi, na dispela i bin helpim mi. Beten tu i bin mekim gut bel bilong mi.”

Laip i Gat As Bihain Long Poroman Marit i Dai

Tru, taim wanpela gutpela poroman marit i dai, dispela em wanpela bikpela hevi tru, tasol i no olsem laip bilong yu i no gat as moa bilong en, nogat. Ating nau yu inap mekim ol samting em bipo yu no gat bikpela haptaim long mekim, olsem mekim sampela liklik wok yu bai amamas long mekim o go raun lukim ol narapela ples. Ol dispela samting inap mekim na yu no misim tumas poroman bilong yu. Long sampela, ating rot i op long ol inap insait moa long ol wok Kristen. Ol i amamas na belgut tru taim ol i helpim ol narapela, long wanem, Jisas i bin tok: “Amamas bilong man i givim samting long ol arapela man, dispela i winim amamas bilong man i kisim samting bilong em yet.”​​—Aposel 20:35.

No ken ting yu no inap stap amamas gen. Yu ken save olsem God Jehova bai tingim yu tru sapos yu go klostu long em. Devit, man bilong raitim song i tok: “[God] i save helpim ol meri, man bilong ol i dai pinis.” (Song 146:9) Yumi belgut taim yumi save olsem Baibel i kolim Jehova olsem “Papa bilong yumi, na em i as bilong olgeta pasin marimari na pasin sori . . . [na] em i God bilong mekim isi bel bilong olgeta man i gat hevi,” na tu, Baibel i tok long Jehova olsem: “Yu save opim han bilong yu na inapim laik bilong olgeta samting i gat laip.” (2 Korin 1:3; Song 145:​16, NW) Tru tumas, Jehova, God bilong pasin laikim, em inap na i gat laik na i redi long helpim ol man husat i go long em bilong kisim helpim. Ating yu bai pilim wankain olsem lain Israel long bipo, em ol i bin singsing olsem: “Mi lukluk i go long ol maunten. Tasol man bilong helpim mi bai i kamap long wanem hap? Bikpela i bin wokim heven na graun, em wanpela tasol i save helpim mi.”​​—Song 121:​1, 2.

[Rait long pes 19]

Planti milion manmeri i bin karim bikpela bel hevi, long wanem, poroman marit i dai. Olsem wanem? Yu wanpela bilong ol?

[Blok long pes 21]

Olsem Wanem Long Marit Gen?

Baibel i tok dai i save pinisim marit, olsem na dispela i givim rot long poroman long marit gen. (1 Korin 7:​39) Tasol em samting bilong poroman yet long makim. Tasol em bikpela samting long ol pikinini i save long disisen bilong papa o mama na sapotim em sapos ol inap mekim. (Filipai 2:4) Tingim Andrés, pastaim em i no amamas taim papa bilong em i marit gen. Em i bin laikim tru mama bilong em na em i pilim olsem i no gat narapela meri inap kisim ples bilong mama. Em i tok: “Tasol i no longtaim na mi luksave olsem papa bilong mi i bin mekim gutpela disisen. Marit bilong em i bin mekim em i amamas gen. Em i kirap long mekim ol samting em longpela taim liklik em i no bin mekim, olsem go raun lukim ol narapela ples. Na tu, mi amamas tru long nupela meri bilong em i lukautim em gut long sait bilong bodi na tingting.”

[Ol Piksa long pes 20,21]

Mekim sampela samting na oltaim beten long God long helpim yu karim dispela hevi, dispela bai helpim yu long kamap orait