“Daunim Pasin Nogut” Long Rot Bilong Bosim Belhat

“No ken bekim rong ol i mekim long yupela. . . . [Yupela i] mas mekim gutpela pasin na bai [yupela i] daunim pasin nogut.”​—RO. 12:19, 21.

1, 2. Sampela Witnes i bin mekim wanem na ol i stap olsem gutpela piksa long ol narapela?

INAP 34 Witnes Bilong Jehova i kalap long balus long i go long dedikesen bilong wanpela brens ofis, tasol sampela hevi i kamap long balus. Ol i laik stop inap wanpela aua tasol long wanpela ples balus bilong kisim petrol, tasol ol i stap long dispela hap inap 44 aua. No gat gutpela kaikai, wara, o toilet samting. Planti pasindia i belhat na ol i hatim ol woklain bilong ples balus. Tasol ol brata na sista i stap isi.

² Bihain, ol dispela Witnes i kamap long ples bilong dedikesen long laspela hap bilong program. Maski ol i taiet, ol i stap yet bihain long program i pinis na ol i amamas long bungim ol bratasista bilong dispela hap. Sampela taim bihain ol i kisim save olsem sampela i bin luksave long pasin bilong ol long stap isi na bosim gut bel. Wanpela pasindia i tokim kampani bilong balus, “Sapos ol dispela 34 Kristen i no bin stap, bai i gat bikpela kros pait i kirap long ples balus.”

Stap Namel Long Ol Manmeri Bilong Kros na Belhat

3, 4. (a) Olsem wanem pasin bilong kros na belhat i bin mekim nogut long ol manmeri? Dispela pasin i stap inap longpela taim olsem wanem? (b) Yu ting Kein inap bosim belhat bilong em? Stori long dispela.

³ Nau long dispela taim nogut, ol hevi bilong laip inap mekim na ol man i belhat. Planti taim, pasin bilong belhat i mekim man i bel nogut long narapela na kamapim pait. Ol woa i save kamap namel long ol kantri na insait long ol kantri yet, na kros insait long ol famili i save kamapim hevi long planti famili. Pasin bilong kros na pait i stap long bipo yet na i kam inap long nau. Kein, fesbon pikinini bilong Adam na Iv, i bin bel nogut long brata bilong em Abel na kilim em i dai. Paslain long Kein i mekim dispela samting, Jehova i bin tokim em long bosim belhat bilong em na em i promis long mekim gut long Kein sapos em i mekim olsem.​—Ritim Stat 4:​6-8.

⁴ Maski Kein i bin kisim sin long papamama bilong em, em inap makim samting em i laik mekim. Em inap bosim belhat bilong em, tasol em i no mekim olsem. Olsem na em i gat asua long kilim man i dai. Wankain long yumi tu, sin i mekim na i hatwok long yumi long abrusim pasin bilong kros na pait. Na i gat ol narapela bikpela hevi i save givim hatwok long yumi long dispela ‘taim nogut.’ (2 Ti. 3:1) Olsem: Hevi bilong mani inap givim hevi long bel na tingting bilong yumi. Ol polis na welfe samting i tok, hevi bilong mani i as bilong kros pait i kamap insait long famili.

5, 6. Wanem tingting bilong dispela graun long pasin bilong belhat inap kalap long yumi?

⁵ Na tu, planti manmeri yumi save bungim, ol i gat pasin bilong “laikim ol yet tasol,” “hambak,” na pasin bilong “pait na bagarapim ol man nabaut.” I no hatwok long ol kain pasin olsem i kalap long yumi na i mekim yumi belhat. (2 Ti. 3:​2-5) Planti taim ol muvi na TV i kamapim olsem pasin bilong bekim rong em i gutpela samting, na pasin bilong pait em rot bilong stretim ol hevi. Ol stori bilong ol muvi i kirapim ol man long amamas long lukim man nogut i “kisim strafe bilong em”​—planti taim gutpela man i paitim em nogut tru na kilim em i dai.

⁶ Ol kain stori olsem i no kamapim pasin bilong God, nogat, ol i kamapim “spirit [olsem “tingting,” NW] bilong dispela graun,” na bilong hetman bilong en, em Satan, man bilong belhat. (1 Ko. 2:12; Ef. 2:2; KTH 12:12) Dispela spirit o tingting i kirapim ol man long inapim ol laik nogut bilong bodi na i birua olgeta long holi spirit bilong God na ol pasin bilong en. Wanpela bikpela samting em lotu Kristen i lainim ol man long en em ol i no ken bekim rong long man i mekim nogut long ol. (Ritim Matyu 5:​39, 44, 45.) Orait, olsem wanem yumi ken bihainim tru ol tok Jisas i skulim ol man long en?

Ol Man i Stap Olsem Gutpela Piksa na Piksa Nogut

7. Wanem samting i kamap taim Simeon na Livai i no bosim belhat bilong ol?

⁷ Baibel i givim planti tok long pasin bilong bosim belhat, na tu, em i stori long ol samting inap kamap taim yumi bosim belhat na taim yumi no bosim belhat. Tingim samting i bin kamap taim tupela pikinini man bilong Jekop, em Simeon na Livai i bekim rong long Sekem husat i bin bagarapim Daina, susa bilong ol. “Ol i belhat na ol i kros nogut tru.” (Stt. 34:7) Na bihain, ol narapela pikinini bilong Jekop i go insait long taun bilong Sekem na stilim ol samting na kisim ol meri na pikinini na karim ol i go olsem ol kalabus. Ol i mekim olgeta dispela samting, long wanem, ol i tingim Daina, na tu, ating ol i gat pasin antap na ol i no laik kisim sem long ai bilong ol narapela. Ol i pilim olsem Sekem i bin semim ol wantaim papa bilong ol, Jekop. Tasol Jekop i ting olsem wanem long pasin bilong ol?

8. Stori bilong Simeon na Livai i kamapim klia wanem samting long pasin bilong bekim rong?

⁸ Samting nogut i bin painim Daina i bagarapim tru bel bilong Jekop; tasol em i krosim ol pikinini man bilong em long ol i bin bekim rong. Tasol Simeon na Livai i strongim sait bilong ol na tok: “Olsem wanem? Ating mipela bai i larim ol i mekim susa bilong mipela i kamap olsem wanpela pamukmeri, a?” (Stt. 34:31) Tasol sampela hevi moa i kamap long dispela, long wanem, Jehova i no amamas long pasin tupela i bin mekim. Planti yia bihain, Jekop i tok profet olsem, Simeon na Livai i bin kamapim belhat bilong ol, na long dispela as, ol tumbuna pikinini bilong tupela bai i stap nabaut namel long ol narapela lain bilong Israel. (Ritim Stat 49:​5-7.) Tru tumas, ol i no bosim belhat bilong ol na dispela i mekim na God na papa bilong ol tu i no amamas long ol.

9. Long wanem taim klostu Devit i larim belhat i bosim em?

⁹ Tasol King Devit i no mekim kain pasin olsem. I gat planti rot i op long em i ken bekim rong, tasol em i no mekim olsem. (1 Sml. 24:​3-7) Wanpela taim, klostu em i larim belhat i bosim em. Wanpela maniman, nem bilong em Nabal, i toknogutim ol soldia bilong Devit maski ol i bin lukautim gut ol sipsip na ol wasman bilong Nabal. Ating Devit i belhat long Nabal i tok nogutim ol soldia bilong em, olsem na Devit i laik mekim save long Nabal. Taim Devit wantaim ol soldia bilong em i wok long i go bilong mekim nogut long Nabal wantaim lain bilong em, wanpela yangpela man i go tokim Abigel, gutpela meri bilong Nabal, long samting i bin kamap na em i kirapim Abigel long mekim sampela samting hariap. Kwiktaim Abigel i bungim planti samting olsem presen na i go givim long Devit. Long pasin daun, em i tok sori long pasin nogut Nabal i bin mekim na i tokaut long pasin bilong Devit long pret na aninit long Jehova. Devit i kisim stretpela tingting na em i tok: ‘God i ken mekim gut tru long yu, long wanem, nau yu bin pasim mi na mi no kilim i dai sampela man.’​—1 Sml. 25:​2-35.

Pasin Kristen

10. Long samting bilong bekim rong, ol Kristen i mas mekim wanem kain pasin?

¹⁰ Samting i bin kamap long Simeon na Livai na long Devit na Abigel i kamapim klia olsem Jehova i no save laikim pasin bilong larim belhat i bosim man na pasin bilong pait, na em i save blesim ol man husat i wok strong long kamapim pasin wanbel. Aposel Pol i tok: “Oltaim yupela i mas painim rot bilong i stap wanbel wantaim olgeta man. Ol pren tru bilong mi, yupela yet i no ken bekim rong ol i mekim long yupela. Yupela i mas larim God i belhat long ol. Yupela i save, buk bilong God i gat tok olsem, ‘Bekim rong, em i wok bilong mi. Mi yet bai mi bekim rong bilong ol na mekim save long ol. Tasol sapos birua bilong yu em i hangre, orait yu mas givim kaikai long em. Sapos em i dai long wara, orait yu mas givim wara long em. Sapos yu mekim olsem, bai yu mekim em i sem tru long ol pasin nogut bilong em [“i olsem yu putim hatpela sit bilong paia antap long het bilong em,” NW].’ Yu no ken larim pasin nogut i winim yu. Nogat. Yu mas mekim gutpela pasin na bai yu daunim pasin nogut.”​—Ro. 12:​18-21.a

11. Olsem wanem wanpela sista i lain long bosim belhat bilong em?

¹¹ Yumi inap bihainim dispela tok. Olsem: Wanpela sista i go long wanpela elda na i komplein long nupela bosmeri bilong em long ples wok. Em i tok dispela meri i no save mekim gutpela pasin na i save wan sait tumas. Sista i belhat long dispela meri na i laik lusim wok. Tasol elda i kirapim sista long em i no ken hariap long mekim wanpela samting. Elda i luksave olsem sista i belhat long bos na i soim belhat bilong em, na dispela i mekim hevi i go bikpela. (Ta. 3:​1-3) Elda i kamapim klia long sista olsem maski em i kisim narapela wok, em yet i gat wok long senisim pasin bilong em taim narapela i mekim nogut long em. Elda i tokim em long mekim gutpela pasin long bos olsem em i laik bai ol narapela i mekim long em, em pasin Jisas i bin skulim yumi long mekim. (Ritim Luk 6:31.) Sista i tok em bai mekim olsem. Wanem samting i kamap? Sampela taim bihain, bos i no mekim hatpela pasin moa, na em i tok tenkyu long sista long wok em i mekim.

12. Bilong wanem ol hevi namel long ol Kristen inap mekim yumi bel hevi moa yet?

¹² Yumi no kirap nogut taim kain hevi olsem i kamap long wanpela man o meri ausait long kongrigesen Kristen. Yumi save olsem long dispela graun bilong Satan, planti taim ol manmeri i no save mekim pasin i stret na yumi mas wok strong bambai ol man nogut i no ken mekim yumi belhat. (Sng. 37:​1-11; Sav. 8:​12, 13; 12:​13, 14) Tasol taim ol hevi i kamap namel long yu wantaim brata o sista wanbilip bilong yu, dispela bai mekim yu bel hevi moa yet. Wanpela Witnes sista i tok: “Taim mi kam insait long tok i tru, nambawan samting mi hatwok long kisim, em long save olsem lain bilong Jehova i no gutpela olgeta.” Yumi lusim ol manmeri bilong dispela graun em ol i no gat pasin laikim na ol i no save tingim ol narapela, na yumi gat laik olsem olgeta bratasista insait long kongrigesen bai mekim gutpela pasin Kristen long narapela narapela. Olsem na sapos wanpela wanbilip Kristen, na moa yet wanpela husat i holim bikpela wok insait long kongrigesen, em i no tingting gut o em i no mekim pasin Kristen, dispela inap mekim yumi bel hevi moa yet o i mekim yumi belhat. Ating bai yumi askim: ‘Hau na kain pasin olsem i kamap insait long lain bilong Jehova?’ Tasol long taim bilong ol aposel tu, kain pasin olsem i bin kamap namel long ol Kristen God i bin makim. (Ga. 2:​11-14; 5:15; Jem. 3:​14, 15) Yumi mas mekim wanem sapos dispela samting i kamap long yumi?

13. Bilong wanem yumi mas stretim hevi i kamap namel long yumi? Olsem wanem yumi inap mekim olsem?

¹³ Dispela sista yumi bin stori pinis long en, em i tok: “Mi lain long beten long Jehova long marimari long man i mekim mi i bel hevi. Long olgeta taim dispela i save helpim mi.” Olsem yumi bin ritim pinis, Jisas i skulim yumi long beten long God i ken marimari long ol man i mekim nogut long yumi. (Mt. 5:44) Na moa yet yumi mas mekim ol beten long God i ken marimari long ol brata na sista wanbilip bilong yumi! Olsem papa i laik bai ol pikinini bilong em i soim pasin laikim namel long ol yet, Jehova tu i laik bai ol wokman bilong em long graun i stap gut wantaim narapela narapela. Yumi wetim taim we yumi olgeta bai sindaun gut wantaim na bel isi i stap inap oltaim oltaim, na Jehova i wok long skulim yumi long mekim olsem long nau. Em i laik bai yumi wok gut wantaim long mekim bikpela wok bilong em. Olsem na yumi mas stretim ol hevi i kamap namel long yumi, o lusim tingting long rong bilong narapela na pas gut wantaim. (Ritim Sindaun 19:11.) Yumi no ken stap longwe long ol bratasista bilong yumi taim hevi i kamap, nogat, yumi mas helpim narapela narapela long stap yet namel long lain bilong Jehova, na yumi stap seif long “han” bilong em inap oltaim oltaim.​—Lo 33:27.

Pasin Isi i Save Kamapim Gutpela Kaikai

14. Olsem wanem yumi ken sakim wok bilong Satan long brukim lain?

¹⁴ Bilong stopim yumi long autim gutnius, Satan wantaim ol spirit nogut i wok strong long bagarapim amamas insait long famili na kongrigesen. Ol i traim long brukim lain, long wanem, ol i save sapos i no gat pasin wanbel i stap, dispela bai bagarapim famili na kongrigesen. (Mt. 12:25) Bilong daunim wok nogut bilong ol, yumi mas bihainim tok bilong Pol: “Wokman bilong Bikpela i no ken tok pait na tok kros. Nogat. Em i mas mekim gutpela pasin [“isi,” NW] long olgeta man.” (2 Ti. 2:24) Yumi save, yumi ‘no pait long ol manmeri. Nogat. Yumi pait long olgeta spirit nogut.’ Bilong winim dispela pait, yumi mas kisim klos pait bilong spirit, na yumi mas “redi long autim gutnius bilong God i laik wanbel wantaim ol manmeri.”​—Ef. 6:​12-18.

15. Sapos ol birua long ausait long kongrigesen i mekim nogut long yumi, yumi mas mekim wanem kain pasin?

¹⁵ Long ausait long kongrigesen, ol birua bilong Jehova i mekim nogut tru long ol manmeri bilong em i stap isi. Sampela bilong ol dispela birua i paitim ol Witnes Bilong Jehova. Sampela i bagarapim nem bilong yumi long niuspepa o long ol kot. Jisas i bin tokim ol disaipel bilong em olsem dispela samting bai painim ol. (Mt. 5:​11, 12) Bai yumi mekim wanem? Long toktok na long pasin bilong yumi, yumi no ken tru “bekim pasin nogut long ol. Nogat.”​—Ro. 12:17; ritim 1 Pita 3:16.

16, 17. Wanem samting i bin kamap bilong traim ol brata bilong wanpela kongrigesen?

¹⁶ Maski wanem wanem samting Satan i putim long yumi, taim yumi wok yet long ‘mekim gutpela pasin na daunim pasin nogut,’ dispela i litimapim nem bilong God. Olsem: Wanpela kongrigesen long wanpela ailan long Pasifik i rentim wanpela haus bung bilong mekim Memorial. Taim ol bikman bilong sios long dispela hap i save long dispela, ol i tokim ol memba bilong ol long bung long dispela haus bilong mekim lotu bilong ol long dispela taim em Memorial bai kamap long en. Tasol bikman bilong polis i tokim ol bikman bilong sios long lusim dispela haus bung paslain long bung bilong ol Witnes i kamap. Tasol long taim stret bilong Memorial i mas kirap, dispela haus i pulap yet long lain bilong dispela sios na ol i kirapim lotu bilong ol.

¹⁷ Taim ol polis i redi long rausim ol, hetman bilong sios i kam long wanpela elda bilong yumi na askim: “Yu bai mekim wanpela spesel samting long dispela nait, a?” Brata i tokim em long Memorial, na dispela man i tok: “O, mi no bin save!” Tasol wanpela polisman i tokim em: “Mipela i bin tokim yu tete long moning!” Dispela hetman bilong sios i tanim lukluk long elda na smail na i tok: “So bai yu mekim wanem? Mipela i gat planti lain bilong mipela i pulap long dispela haus bung. Yu bai tokim ol polis long rausim mipela, a?” Em i bin giaman long mekim olsem na bai i luk olsem ol Witnes i man nogut. Ol brata bai mekim wanem?

18. Ol brata i mekim wanem taim wanpela sios lain i sikirapim bel bilong ol? Wanem samting i kamap long dispela?

¹⁸ Ol Witnes i larim dispela sios lain i mekim lotu bilong ol inap 30 minit, na bihain long dispela ol brata bai mekim Memorial. Tasol ol i mekim lotu i go ovataim, na bihain ol i lusim dispela haus bung na ol brata i mekim Memorial. Long de bihain, gavman i wokim wanpela bung bilong skelim dispela samting. Taim ol i skelim pinis as bilong dispela samting, ol i tokim sios long ol i mas tokaut olsem hetman bilong sios yet i as bilong dispela hevi na i no ol Witnes. Na tu, ol lain bilong gavman i tok tenkyu long ol Witnes Bilong Jehova long ol i bin stap isi na stretim dispela hevi. Ol Witnes i wok strong long “stap wanbel wantaim olgeta man” na dispela i bin kamapim gutpela samting.

19. Wanem narapela samting i ken kamapim pasin bilong stap wanbel wantaim ol narapela?

¹⁹ Narapela samting i helpim yumi long stap wanbel wantaim ol narapela em pasin bilong mekim gutpela tok. Stadi i kamap bihain long dispela bai i stori long gutpela tok em wanem samting, na olsem wanem yumi ken kisim dispela pasin na bihainim.

[Futnot]

Yu Inap Stori Long Dispela?

• Bilong wanem ol manmeri long nau i save belhat?

• Baibel i gat wanem ol stori bilong soim wanem samting inap kamap taim man i bosim belhat o em i no bosim belhat?

• Bai yumi mekim wanem taim wanpela wanbilip Kristen i bagarapim bel bilong yumi?

• Bai yumi mekim wanem taim ol manmeri ausait long kongrigesen i mekim nogut long yumi?

[Piksa long pes 16]

Simeon na Livai i kam bek​—tasol pastaim ol i kamapim belhat bilong ol

[Ol Piksa long pes 18]

Gutpela pasin inap kirapim ol narapela na ol i no mekim hatpela pasin moa