Ol i No Pret Moa Long Pinis Bai Kamap
LONG 1978 samting, Gary na Karen i bilip strong olsem pinis bilong dispela graun i klostu. Olsem na ol i lusim biktaun na i go sindaun long liklik ples na tingting long wokim gaden na ol i no ken baim kaikai long stua. Ol i laik abrusim bagarap na i stap laip.
Bilong save gut long mekim ol dispela wok, ol i baim ol buk, kisim sampela skul, na toktok wantaim planti man. Ol i wokim gaden na planim 50 sotpela diwai prut. Ol i bungim planti sid bilong kaikai na ol tul. Ol i lain long kamapim kaikai na pulimapim long ol botol samting bilong putim i stap. Wanpela pren i lainim ol long kilim abus na smokim bambai abus i ken i stap longpela taim. Karen i lain long luksave long ol lip samting bilong bikbus em ol inap kaikai sapos kaikai bilong ol i pinis. Gary i lain long mekim petrol long kon, na wokim stov bilong kukim kaikai long paiawut, na wokim haus long ol samting bilong bus.
Karen i tok: “Long dispela taim bipo i gat planti hevi i kamap long graun, na mi ting klostu nau na olgeta samting bilong graun bai pinis.” Gary i tok: “Olsem planti narapela yangpela, mi insait long sampela grup i traim long stretim pasin bilong bel nogut long ol narapela lain, Pait Bilong Vietnam, na korapsen. Tasol i no longtaim na mi pilim olsem hatwok bilong mi i lus nating. I luk olsem ol man bai bagarapim ol yet sapos ol samting i stap wankain na i no senis.”
Gary i tok: “Long wanpela nait mi sindaun nating, olsem na mi kisim wanpela Baibel na mi kirap ritim Buk Matyu i go inap long Buk Kamapim Tok Hait. Insait long 4-pela nait, mi ritim gen. Long moningtaim bilong namba 5 de, mi tokim Karen: ‘Nau yumi stap long taim bilong las de. Klostu nau God bai mekim samting bilong klinim graun. Yumi mas painim ol lain ol bai abrusim dispela bagarap.’” Em nau, Gary na Karen i go long ol narapela narapela lotu bilong painim ol lain i laik redi long pinis bai kamap.
I no longtaim na wanpela Witnes Bilong Jehova i kam long haus bilong tupela na i kirapim Baibel stadi wantaim ol. Karen i tingim dispela taim, na em i tok: “Bel bilong mi i kirap tru, long wanem, em i kamapim gut as bilong ol tok bilong Baibel long mi. Tok i tru long ol samting bai kamap long las de em samting mi bin wok long painim, na nau mi painim pinis. I gat gutpela samting mipela inap wetim bai kamap tru long bihain. Tasol gutpela samting moa i olsem, mi kamap pren bilong Papa bilong mi i stap long heven, em God bilong wokim heven na graun.”
Gary i tok: “Nau i stap bilong mi i gat as bilong en. Taim mi kirap stadi long Baibel, mi laik mekim olsem moa yet. Mi ritim ol tok profet bilong Baibel, na skelim olsem ol dispela tok profet i wok long kamap tru, na nau mi bilip tru olsem klostu nau God bai pinisim ol pasin nogut. Mi tingting: ‘Ol man i mas redi, i no long bagarap bai painim ol, tasol long kisim dispela kain laip God i laik bai yumi kisim.’” Gary na Karen i kisim stretpela tingting long ol samting bai kamap bihain. Ol i no tingting planti moa long pinis bai kamap, nogat. Nau ol i bilip tru olsem God bai pinisim ol hevi i painim ol man na kamapim bek Paradais long graun.
Orait nau, inap 25 yia bihain, Gary na Karen i mekim wanem? Karen i tok: “Mi wok long strongim pasin bilong mi long laikim tru God Jehova na bilip strong long em, na mi helpim ol narapela long mekim olsem. Mi na Gary i save strongim narapela narapela bambai famili bilong mipela i ken stap strong na i stap wanbel long lotuim God. Mipela i traim stretim gut ol wok bilong mipela, na holim ol samting em inap tasol long mipela bambai mipela i ken putim tingting i go long helpim ol narapela long ol samting ol i nidim.”
Gary i tok moa olsem: “Oltaim mi save beten long Kingdom Bilong God i mas i kam na pinisim ol pen na hevi bilong planti milion manmeri. Taim mi autim gutnius bilong Kingdom Bilong God long ol narapela, mi beten long mi ken helpim wanpela long bilip na wetim ol gutpela samting Baibel i tok bai kamap bihain. Winim 25 yia pinis, Jehova i bin harim dispela beten bilong mi. Mitupela Karen i bilip olsem klostu nau Jehova bai kamapim ol bikpela senis long graun, tasol mipela i no pret moa long pinis bai kamap.”—Matyu 6:9, 10; 2 Pita 3:11, 12.
[Piksa long pes 9]
Long nau, Gary na Karen i amamas long helpim ol man long wetim gutpela samting Baibel i tok bai kamap bihain