Kudu i Tingim Em
WANPELA MAN LONG SAUT AFRIKA I RAITIM DISPELA STORI BILONG KIRAP!
KUDU em wanpela antelop. Kudu man i gat longpela kom i krungut na bikpela yau, na taim em i bikpela pinis, longpela bilong en long lek i go antap long sol i olsem 150 sentimita. Kudu meri i no gat kom, tasol em tu i gat bikpela yau. Kudu i animal bilong sem, na olgeta taim em i lukluk nabaut na redi long ranawe na hait. Olsem na samting i bin painim Karen long Simbabwe i narapela kain tru.
Nius African Wildlife i tok, wanpela liklik pikinini kudu i pas long banis waia na em i no inap ranawe. Ol man i painim em ol i givim long Karen. Inap sampela wik Karen i lukautim dispela kudu na givim susu bilong botol long en. Skin bilong en i go patpela na em i bin stap klostu long fam bulmakau bilong Karen na famili bilong em. Planti taim kudu i pilai wantaim ol pikinini bilong Karen na ol dok. Tasol taim kudu i wok long i go bikpela, sampela taim em i go bek long bus na bihain liklik, em i kam bek long fam. Tasol taim em i klostu long kamap bikpela pinis, em i no kam moa long fam.
Tupela yia bihain, Karen i draivim ka long rot bilong fam na em i kirap nogut long lukim wanpela kudu meri i gat bel na em i no ranawe taim ka i kam klostu long en. Na em i no ranawe taim Karen i wokabaut i go klostu long en. Nau Karen i save, dispela kudu em kudu em i bin givim susu bilong botol long en taim em i liklik, olsem na taim Karen i wokabaut i go klostu long en, em i tok isi isi long en. Kudu i luksave long Karen tu, long wanem, em i daunim het na rapim skin bilong Karen long nus bilong en, na em i larim Karen i holim em!
Tupela mun bihain, kudu meri i stap gen klostu long rot—dispela taim wanpela liklik pikinini kudu i stap wantaim em. Karen i pilim olsem kudu mama i laik soim pikinini long em na olsem bipo, em i larim Karen i putim han long en. Wankain samting i bin kamap sampela wik bihain na i olsem kudu meri i wetim Karen.
Narapela tupela mun bihain, sampela leba bilong fam i tok, ol i bin lukim dispela kudu meri na rop i pas long nek bilong en. Ol leba i bin wok long go klostu long em bilong rausim rop, tasol kudu i ranawe. Olsem na Karen i wokabaut insait long bus bilong painim em, na em i singaut taim em i wokabaut i go. I no longtaim na kudu i sanap long ai bilong Karen. Karen i bin bringim liklik hap bret wantaim em, em wanpela samting bipo kudu i bin amamas long kaikai. Taim kudu i kisim bret long Karen, man bilong Karen i rausim rop long nek bilong en.
Inap longtaim liklik dispela kudu na famili bilong Karen i pas gut tru na famili i bin kisim bikpela amamas long dispela samting.