Emmy Zehden Rot—Em i Kisim Nem Olsem Wanem?

LONG Me 1992, ol i givim nem Emmy Zehden long wanpela rot long biktaun Belin long Jemani. Emmy em wanpela Witnes Bilong Jehova.

Mama i karim Emmy long yia 1900. Em i maritim wanpela bisnisman Juda, em Richard Zehden. Em i dai long banis kalabus nogut bilong Auswis long taim gavman Natsi i bosim Jemani. Richard na Emmy i gat wanpela pikinini man ol i bin lukautim, nem bilong em Horst Schmidt. Horst wantaim tupela narapela yangpela Witnes Bilong Jehova ol i bin hait, long wanem, ol Natsi i laik bai ol i insait long ami.

Emmy i bin haitim Horst wantaim tupela poroman bilong em. Tasol bihain, ol Natsi i painim ol. Kot i tok, fopela wantaim i mas i dai​—⁠tripela manki i mas i dai, long wanem, ol i no laik insait long ami, na Emmy i mas i dai, long wanem, em i bin haitim ol. Ol i bin katim nek bilong tupela poroman bilong Horst. Emmy i bin askim kot long ol i mas marimari long em, tasol ol i no mekim. Long Jun 9, 1944,a ol i katim nek bilong Emmy long Plotsense long Belin. Horst Schmidt i no bin bagarap long banis kalabus nogut bilong ol Natsi, na bihain em i maritim wanpela Witnes, em tu i bin i stap long banis kalabus nogut bipo.

Long Me 7, 1992, ol i givim nem Emmy Zehden Rot long wanpela rot bilong Belin. Long tok wanpela bikman bilong Jemani i mekim, em i litimapim nem bilong Emmy, long wanem, em i bin sanap strong, na em i tok, Emmy i wanpela bilong ol planti manmeri i dai long taim bilong bikpela pait tasol yumi lusim tingting long ol.

[Futnot]