Bilong Wanem Yumi Mas Bihainim Stret Taim?

SAMPELA taim i hatwok long bihainim stret taim. Sampela samting i givim hatwok long yumi i olsem, yumi gat longpela rot, o ol ka i pas pas long rot, o yumi gat planti wok bilong mekim. Tasol em i bikpela samting long yumi mas bihainim stret taim. Long ples wok, man i save kamap long taim stret, ol bai tingim em olsem man ol inap bilip long em na man bilong wok. Tasol sapos man i save kam leit long wok, dispela inap pasim ol narapela long mekim gut wok bilong ol, o wok i no kamapim gutpela samting olsem kampani i laikim. Sapos sumatin i save kam leit long skul, em bai lusim hap skul em ol narapela sumatin i kisim na em i no skul gut. Sapos yumi kam leit long dokta o dentis, ating em bai no gat taim bilong mekim gut wok bilong em.

Tasol long sampela hap ol man i no ting em i bikpela samting long bihainim stret taim. Sapos yumi stap long kain ples olsem, yumi tu inap kisim dispela kain pasin. Sapos olsem, orait em i bikpela samting long yumi kisim laik bilong bihainim stret taim. Sapos yumi save em i bikpela samting long bihainim stret taim, dispela bai helpim yumi long mekim olsem. I gat wanem sampela as bilong bihainim stret taim? Olsem wanem yumi inap winim hatwok bilong bihainim stret taim? Na yumi inap kisim wanem ol gutpela samting long dispela pasin?

Jehova​—God Bilong Bihainim Stret Taim

Nambawan as na yumi laik bihainim stret taim, em yumi laik bihainim pasin bilong dispela God yumi save lotuim. (Ef. 5:1) Jehova i stap gutpela piksa long pasin bilong bihainim stret taim. Em i no save leit. Em i save bihainim stret sediul bilong em bilong kamapim ol samting em i tingting pinis long mekim. Olsem: Taim Jehova i tingting pinis long kamapim bikpela tait wara bilong bagarapim ol man nogut, em i tokim Noa: “Yu mas kisim plang bilong gutpela diwai na wokim wanpela sip.” Klostu long taim dispela bagarap i laik kamap, Jehova i tokim Noa long go insait long sip na em i tok: “7-pela de i go pinis, orait bai mi salim ren i kam long graun long san na long nait, inap 40 de olgeta. Long dispela ren bai mi pinisim tru olgeta samting i gat laip mi bin wokim.” Em nau, long taim stret, “7-pela de i go pinis, orait bikpela tait i kamap na i stat long karamapim graun.” (Stt. 6:14; 7:​4, 10) Tingim samting nogut bai painim Noa sapos em wantaim famili bilong em i no bin go insait long sip long taim stret. Olsem dispela God ol i save lotuim, ol i mas bihainim stret taim.

Inap olsem 450 yia bihain long Bikpela Tait, Jehova i tokim Abraham olsem em bai kamapim wanpela pikinini man na bihain Pikinini bilong promis bai kamap insait long lain bilong en. (Stt. 17:​15-17) God i tok Sara bai karim Aisak “long kain taim olsem long yia bihain.” Yu ting dispela samting i bin kamap tru? Baibel i tok: “Sara i gat bel na i karim pikinini man long taim Abraham i lapun pinis . . . long dispela taim bipo God i bin makim.”​—Stt. 17:21; 21:2.

Baibel i gat planti stori i soim pasin bilong God long bihainim stret taim. (Jer. 25:​11-13; Dan. 4:​20-25; 9:25) Baibel i tokim yumi long wetim de bilong Jehova long mekim kot bihain. Maski i luk olsem dispela de “i no inap kamap kwik,” yumi ken bilip tru olsem “em bai i kamap” long taim stret.​—Hab. 2:3.

Em i Bikpela Samting Long Lotu

Olgeta man Israel i mas i go bung long ples Jehova i makim long taim bilong “ol bikpela de bilong lotu,” na ol i mas kamap long taim stret. (Wkp. 23:​2, 4) Na Jehova i bin makim tu taim bilong mekim ol ofa. (Kis. 29:​38, 39; Wkp 23:​37, 38) Dispela i makim olsem Jehova i laik bai ol wokboi bilong em i mekim ol wok lotu long taim stret.

Long bipo, taim aposel Pol i tokim ol Korin long pasin bilong mekim ol miting Kristen, em i tokim ol: “Yupela i mas bihainim stret ol gutpela pasin bilong lotu.” (1 Ko. 14:40) Olsem na ol bung Kristen bilong mekim lotu i mas kirap long taim ol i bin makim. Tingting bilong Jehova long pasin bilong bihainim stret taim i no senis. (Mal. 3:6) Orait yumi ken mekim wanem na bai yumi kamap long taim stret long ol dispela miting Kristen?

Ol Samting Yumi Ken Mekim

Sampela i bin lukim olsem pasin bilong stretim gut ol samting pastaim em i helpim gut ol. (Snd. 21:5) Olsem: Sapos yumi gat longwe rot bilong kamap long wanpela hap long taim stret, yu ting i gutpela yumi lusim haus long wanpela taim we klostu yumi abrusim taim stret bilong kamap long dispela hap? Em savepasin long lusim haus sampela minit paslain na bai yumi no leit, maski sapos ‘taim nogut i painim yumi’ long rot. (Sav. 9:11) Yangpela man José i save bihainim stret taim, em i tok: “Bilong kamap long wanpela hap long taim stret, yumi mas save gut long hamas minit yumi mas lusim long rot.”a

Ating sampela i mas stretim rot bilong lusim ples wok hariap liklik bambai ol inap kamap long taim stret long ol miting Kristen. Wanpela Witnes long Itiopia i bin mekim olsem taim em i kisim save olsem long ol wik ol i senisim taim bilong em long wok, em bai kam 45 minit leit long ol miting bilong kongrigesen. Olsem na em i stretim rot na bai wanpela wanwok i kam paslain liklik long wok bilong kisim ples bilong em long ol nait i gat miting. Bilong bekim dispela samting, em i orait long wok inap 7-pela aua moa bilong helpim wanwok.

Sapos yumi gat ol liklik pikinini, ating bai yumi hatwok moa long kamap long miting long taim stret. Mama i gat wok long redim ol pikinini, tasol ol narapela insait long famili i mas helpim em. Wanpela mama long Meksiko, em Esperanza, em i gat 8-pela pikinini na em wanpela tasol i bin lukautim ol. Nau ol dispela pikinini i gat 5-pela i go inap 23 krismas. Esperanza i stori long olsem wanem famili bilong em inap kamap long miting long taim stret. Em i tok: “Ol bikpela pikinini meri i save helpim mi long redim ol liklik pikinini. Dispela i givim rot long mi long pinisim ol wok bilong haus na redim mi yet na bai mipela i ken lusim haus long taim stret olsem mi bin makim.” Dispela famili i gat wanpela taim stret bilong lusim haus, na olgeta i save wok gut wantaim bambai ol inap mekim olsem.

Gutpela Samting Bilong Pasin Bilong Bihainim Stret Taim

Taim yumi tingim ol gutpela samting yumi save kisim taim yumi kamap long ol miting Kristen long taim stret, dispela inap strongim laik na tingting bilong yumi long wok strong long kamap long taim stret long ol miting. Wanpela yangpela meri nem bilong en Sandra, em i bin kisim pasin bilong kamap long miting paslain long taim miting i kirap, em i tok: “Mi save laik long kamap hariap na bai mi gat taim bilong sekanim ol brata na sista, toktok wantaim ol, na save gut long ol.” Taim yumi kamap long Haus Kingdom paslain long miting i kirap, yumi kisim helpim taim yumi harim stori bilong sampela em ol i bin karim hevi na sanap strong na stap gut long wok bilong Jehova. Taim yumi stap na toktok wantaim ol long ol gutpela samting, yumi tu inap strongim ol brata na sista na “kirapim ol long laikim ol arapela na mekim ol gutpela pasin long ol.”​—Hi. 10:​24, 25.

Singsing na beten bilong kirapim olgeta miting Kristen i bikpela samting long lotu bilong yumi. (Sng. 149:1) Ol singsing bilong yumi i save litimapim nem bilong Jehova, na kirapim yumi long tingim ol gutpela pasin yumi mas kisim, na i strongim yumi long amamas long mekim wok autim tok. Na olsem wanem long beten bilong kirapim miting? Long bipo tru, Jehova i bin kolim tempel olsem ‘haus bilong mi long mekim beten.’ (Ais. 56:​7, NW) Long nau, yumi save bung wantaim bilong beten long God long ol miting bilong yumi. Beten bilong kirapim miting i bilong askim Jehova long stiaim miting na givim holi spirit, na bilong redim tingting na bel bilong yumi long kisim ol tok bai kamap long miting. Yumi mas tingting strong long kam long miting long taim stret bilong harim singsing na beten bilong kirapim miting.

Helen i gat 23 krismas, na em i stori long as na em i laik kamap hariap long ol miting, em i tok: “Mi ting em i wanpela rot bilong mi long soim Jehova olsem mi laikim em tru, long wanem, em yet i save givim yumi olgeta tok i kamap long miting, wantaim ol singsing na beten bilong kirapim miting.” Yumi mas i gat wankain tingting long dispela, laka? Olsem na yumi mas wok strong long kisim pasin bilong mekim olgeta wok long taim stret, na moa yet ol wok bilong yumi long lotuim God tru.

[Futnot]

[Piksa long pes 26]

Redim gut ol samting pastaim

[Piksa long pes 26]

Taim yu skelim taim bilong yu, tingim olsem hevi inap kamap

[Ol Piksa long pes 26]

Ol gutpela samting bilong kamap long miting long taim stret