Pasin Bilong Yumi i Mas Bihainim Stret Gutnius
1 Yumi ol Witnes Bilong Jehova i laik litimapim nem bilong Jehova. Pasin, toktok, bilas, na klos bilong yumi inap kirapim ol man long laikim lotu i tru o nogat. Dispela i tru moa yet taim yumi go long ol miting. Olgeta toktok na samting yumi mekim i mas bihainim gutnius na givim biknem long Jehova.—Fl 2:4.
2 Long nau planti lo ol man bilong dispela graun i save bihainim long pasin bilong bilasim skin, i no stret long ol Kristen i ken bihainim. Olsem na lain bilong autim gutnius ol i mas was gut long kain klos na bilas ol i pasim. Wastaua (tok Inglis), Jun 1, 1989, pes 20, i tok: “I no olsem yumi mas pasim klos i gat bikpela pe bilong en, nogat; tasol klos i mas klinpela na i stret. Ol su tu i mas klinpela, nogut ol i bruk. Olsem na long olgeta miting, na long Buk-Stadi tu, skin bilong yumi i mas klin, na yumi mas pasim klos yumi bin stretim gut na i stret long miting.”
3 Pasin bilong kam long miting long taim stret bilong en, i makim olsem yumi tingim na laikim tru ol brata. Sampela taim, ating sampela samting i kamap na i pasim yumi long kam long miting long taim stret. Tasol sapos oltaim yumi kam long miting bihaintaim, i olsem yumi no tingim wok holi bilong God ol dispela miting i mekim, na yumi pulim ai na tingting bilong ol narapela na ol i no harim gut miting. Olsem na pasin bilong kam long miting long taim stret i kamapim klia olsem yumi tingim gut ol brata.
4 Sapos yumi laikim tru ol brata, bai yumi no mekim ol samting i pulim ai na tingting bilong ol long miting. Pasin bilong toktok wantaim narapela, kaikai pike samting, mekim pepa i pairap, na go nating long toilet, em inap pulim tingting bilong ol narapela na daunim gutnem bilong haus lotu bilong Jehova. Long taim bilong miting, i no stret sapos brata i go toktok wantaim narapela long ol samting bilong kongrigesen. Olsem na sapos i no gat wanpela bikpela samting i kamap na brata i mas lusim sia bilong em, gutpela sapos olgeta i sindaun na putim yau long ol tok na bai ol i ken helpim ol yet wantaim famili bilong ol. Man i givim bel long narapela “em i no save bikhet nabaut,” olsem na long Haus Kingdom yumi mas mekim gutpela pasin tasol long ol narapela.—1 Ko 13:4, 5; Ga 6:10.
5 Sapos ol pikinini i bihainim stretpela pasin long miting, dispela tu bai litimapim nem bilong Jehova. Papamama i mas bosim gut pikinini bilong ol. Ol i mas kirapim ol long putim yau na bekim sampela tok. Planti papamama i save sindaun klostu long dua, na taim ol i mas kisim liklik pikinini i go ausait, bai ol i no hatwok na pulim tumas ai na tingting bilong ol narapela.
6 Pol i tok: “Wokabaut bilong [yumi] i mas i stap stret na bihainim tru gutnius.” (Fl 1:27) Olsem na long miting yumi mas mekim gutpela pasin long ol narapela na tingim gut ol. Sapos yumi olgeta i mekim olsem, dispela bai “strongim bel bilong yumi olgeta wantaim.”—Ro 1:12.