Laikim Tru Haus Bilong God
1 Long taim bilong Baibel, Jehova i tokim lain bilong em long oltaim ol i mas bung wantaim long haus bilong em. (Wkp 23:2) Taim ol i bung wantaim, dispela i helpim ol long tingim Tok Bilong God, na i gat hap taim bilong ol i ken tingim gut ol dispela tok long bel bilong ol, na bung wantaim ol narapela na toktok wantaim ol long Lo bilong Jehova. Tingting bilong Jehova i pulap long bel bilong ol, na long dispela rot Jehova i blesim gut ol. Ol dispela bung ol i taim bilong amamas na i kirapim ol man long stap wanbel wantaim na lotuim God long klinpela pasin. Long nau tu em bikpela samting long yumi mas bung wantaim ol brata long haus bilong God.
2 Yumi Ken Mekim Wanem Bilong Kamapim Klia Olsem Yumi Laikim Tru Ol Miting? Long sampela kongrigesen planti brata sista i no save kam long ol miting. Tru, ating sampela taim sampela samting i kamap na i pasim yumi long go long miting. Tasol olsem wanem? Yu save larim ol liklik liklik samting i pasim yu long kam oltaim long miting? Sampela i no save kam long miting sapos het i pen liklik, o ol i bin mekim planti wok long san na skin i les. Na tu, sampela i no bin kam long miting, long wanem, taim ol wanblut i kam lukim ol, ol i pilim olsem ol i mas wokim kaikai samting bilong ol. Na sampela i no kam long miting, long wanem, ol i laik lukim spot samting long televisen. Ol dispela samting i makim olsem ol i no gat strongpela laik long kam long ol miting. Tingting bilong ol i no wankain olsem bilong ol lain bilong Kora, em ol i gat dispela laik long bel bilong ol olsem: “Mi laikim tumas bai mi stap long [haus bilong yu]. Olgeta laik bilong mi i laikim tumas haus bilong yu.”—Sng 84:2.
3 Tru, yumi inap kisim planti kaikai bilong spirit taim yumi kam long ol miting, tasol sampela i hatwok long putim gut yau long ol tok ol brata i mekim. Ating ol i tingting nabaut, o ol i tingting long ol hevi i bin kamap long dispela de, o ai i hevi na ol i slip. Planti brata sista i save, sapos ol i raitim ol liklik hap tok long notbuk samting, dispela i helpim ol long putim gut yau na harim tok. Sapos yumi raitim hap tok long notbuk samting, dispela bai helpim yumi long tingim ol tok ol brata i mekim. Na sapos yumi redi gut pastaim, dispela tu bai helpim yumi long kisim gut ol tok. Pasin bilong redi gut bai helpim yumi long “holim strong [tok] long tingting na bihainim gut.”—Hi 2:1.
4 Ol man i bikpela pinis, na ol pikinini tu, ol i mas kisim gut ol tok bilong miting. Tasol sapos papamama i larim ol pikinini i bringim ol samting bilong pilai o ol buk bilong rait nabaut i kam long ol miting bilong helpim ol pikinini long sindaun gut na stap isi, ating bai ol pikinini i no inap lainim planti samting. Sapos papamama i larim ol pikinini i pilai, toktok, krai, o mekim sampela narapela samting bilong pulim tingting bilong ol narapela i sindaun klostu, yumi save, dispela kain papamama i no save stretim gut pikinini bilong ol. Na sapos planti taim pikinini i laik go toilet o dring wara, ating bai em i no gat bikpela laik tumas long go sapos em i save papa o mama bai go wantaim em, a?
5 Pasin Bilong Kam Long Miting Long Taim Stret Em i Bikpela Samting: Sampela taim, ating sampela samting i save kamap na i pasim yumi long kam long miting long taim stret bilong en. Tasol sapos olgeta taim yumi kam long miting bihaintaim, olsem taim ol i mekim pinis singsing na beten bilong kirapim miting, ating dispela i makim olsem yumi no tingim God yet i bin putim ol miting. Na sapos yumi kam long miting bihaintaim, dispela inap mekim pairap na ol narapela i no harim gut miting. Yu mas save: Pasin bilong mekim singsing na beten wantaim ol brata bilong yumi, em hap wok lotu bilong yumi. Sapos olgeta taim yumi kam bihaintaim, dispela i makim olsem yumi no bihainim pasin bilong stretim gut ol samting na redi gut pastaim. Pasin bilong kam long taim stret i makim olsem yumi tingim na laikim tru ol miting bilong yumi.
6 De bilong Jehova i kam klostu, olsem na em bikpela samting long yumi mas bung wantaim. (Hi 10:24, 25) Bilong kamapim bel bilong yumi olsem yumi laikim tru ol miting, yumi mas mekim ol dispela samting: kam long olgeta miting, redi gut pastaim, kam long taim stret, putim yau na harim gut tok, bihainim ol samting yumi kisim save long en.