Was Gut Long Ol Wok Yu Mekim Bilong Skulim Ol Manmeri
1 Nupela sedyul bilong Skul Bilong Wok Autim Tok bai kirap long Janueri 1995. Wanem samting i nupela long dispela sedyul? Ol brata i mekim Tok Namba Wan, planti taim bai ol i stori long ol samting i bin kamap long oganaisesen bilong Jehova long nau. Long dispela yia bai ol i kamapim ol tok inap long pes 178 bilong buk Jehovah’s Witnesses—Proclaimers of God’s Kingdom (tok Inglis).
2 Bai ol i tanim ol tok bilong dispela buk i go long tok Motu na tok Pisin, na long olgeta mun bai yumi inap kisim hap bilong dispela buk long pepa ol i putim insait long Wok Kingdom Bilong Yumi. Brata i mekim Tok Namba Wan, bai em i kisim ol tok long dispela pepa. Sosaiti i no gat tingting long wokim dispela buk long tok Motu na tok Pisin olsem wanpela buk i gat strongpela karamap. Olsem na taim ol pablisa i kisim dispela gutpela pepa long olgeta mun, gutpela sapos olgeta wan wan i holim bilong putim long laibreri bilong ol yet—no ken tromoi. Ating bai sampela i gat laik long putim ol dispela pepa insait long strongpela karamap bilong putim ol magasin long en (magazine file case) o kain samting olsem. Olgeta wan wan kongrigesen tu i ken mekim olsem, na putim long laibreri bilong ol long Haus Kingdom. Long dispela rot, olgeta wan wan pablisa inap kisim olgeta tok bilong dispela buk long tok Motu o tok Pisin insait long 4-pela yia samting, na bihain ol i ken lukim ol dispela tok.
3 Brata i mekim Tok Namba Wan na i kisim ol tok long buk Proclaimers bai em i no kamapim ol askim, olsem na yumi ken mekim wanem na bai ol tok bilong dispela buk i ken helpim yumi long was gut long ol wok yumi mekim bilong skulim ol narapela?—1 Ti 4:16.
4 Maski planti brata sista i kaunim pinis buk Proclaimers, taim yumi stadi long ol tok bilong dispela buk olsem sedyul bilong Skul i makim, dispela bai helpim yumi olgeta long laikim tru oganaisesen bilong God. (Sng 71:17, 18) Gutpela sapos yu makim hap taim long olgeta wik bilong kaunim ol tok bilong dispela buk olsem sedyul i makim.
5 Tok Namba Wan i Mas Kirapim Tingting Bilong Ol Brata na Bai Ol i Amamas Long Harim: Brata i mekim Tok Namba Wan na i kisim ol tok long buk Proclaimers, em i mas kamapim gut na bai ol brata sista inap amamas long harim, na tok em i mekim i mas kirapim tingting bilong ol. Na brata i mas helpim kongrigesen long save olsem wanem ol inap mekim wok long ol dispela tok. Na tu, em i mas mekim wok long dispela buk bilong helpim yumi long daun moa long oganaisesen bilong Jehova na pilim tru ol gutpela wok God i bin givim long yumi ol wokboi bilong Em. Olgeta brata sista i mas bringim pepa bilong buk Proclaimers i kam long miting, na bai ol i ken lukim taim brata i stori long dispela hap. Sapos sampela i gat buk Proclaimers long tok Inglis, ol i ken bringim i kam na bai ol inap lukim ol piksa i stap long en; laik bilong wan wan. Pepa bilong dispela buk long tok Motu na tok Pisin bai i no gat piksa long en.
6 Kaunim Bilong Baibel i Mas Kirapim Tingting Bilong Ol Brata: Sapos yumi laik skulim gut ol man, yumi mas kaunim gut tok. Olsem: Yumi mas kolim strong ol bikpela tok na givim bel long mekim tok. Tok Namba 2 i no gat planti ves bilong kaunim, olsem na brata i mekim dispela tok em i gat hap taim bilong kamapim sampela tok bilong kirapim tok na bilong pinisim tok. Kirap bilong tok i mas kirapim tingting bilong ol brata na bai ol i gat laik long harim ol tok brata i kaunim, na tu, kirap bilong tok i mas helpim ol brata long tingim olsem wanem dispela tok inap helpim ol. Bilong pinisim tok, em i ken kamapim gut as bilong sampela tok em i kaunim, na em i ken stori long olsem wanem dispela tok inap helpim ol brata na ol i ken bihainim. Brata i mekim tok i mas inapim ol minit bilong tok; nogut tok i sotpela tumas.
7 Bilong kisim sampela save moa long lo bilong Skul na long pasin bilong mekim ol tok, yumi ken lukim “Sedyul Bilong Skul Bilong Wok Autim Tok Bilong 1995.” Bilong helpim yumi long was gut long ol tok yumi mekim bilong skulim ol man, yumi mas kaunim ol dispela lo, na redim gut ol tok yumi mekim, na bihainim ol tok wasman bilong Skul i givim long yumi; ol dispela samting inap helpim yumi stretim pasin bilong yumi long mekim toktok na lainim man. Sapos yu no insait yet long dispela Skul, mipela laik singautim yu long putim nem na insait long Skul.