Skul Bilong Wok Autim Tok Bilong 1999 Inap Helpim Yumi
1 Jisas em i Nambawan Tisa. Ol manmeri ‘i harim tok bilong em, ol i kirap nogut tru.’ (Mk 1:22) I no gat wanpela bilong yumi inap toktok na skulim gut ol man olsem Jisas i bin mekim, tasol yumi ken wok strong long bihainim pasin bilong em. (Ap 4:13) Bilong mekim olsem, yumi ken insait long Skul Bilong Wok Autim Tok, na dispela i helpim yumi bambai pasin bilong yumi long toktok na mekim wok tisa i wok long kamap gutpela moa.
2 Long 1999, bai yumi kisim ol tok bilong Tok Namba 1, long ol stori bilong Wastaua bilong 1997. Sapos yumi kaunim ol dispela tok bilong en paslain na bihain taim yumi harim gen long skul, dispela bai helpim yumi long kisim gut save long ol samting bilong spirit. Ol brata i mekim Tok Namba 1, ol i mas kamapim klia olsem wanem ol brata sista i ken bihainim ol dispela tok, na ol i mas mekim long pasin i kirapim tingting bilong ol na ol i ken amamas long harim. Bilong mekim Tok Namba 3 na Tok Namba 4, ol bai kisim tok long buk Famili o buk Toktok Gut. Paslain long em i makim ol brata sista long mekim tok, wasman bilong skul i mas skelim gut ol tok em i makim bilong ol. Olgeta sumatin i mekim tok bilong buk Famili, ol i mas i gat gutpela nem insait long famili bilong ol.
3 Bihainim Ol Tok Bilong Stretim Yu, na Redi Gut: Yumi olgeta inap kamap gutpela moa long pasin bilong mekim tok na long skulim ol man. (1 Ti 4:13) Olsem na yumi mas i gat laik long kisim sampela tok bilong stretim yumi na yumi no ken ting em samting yumi ken abrusim. (Snd 12:15; 19:20) Bilong yumi kamapim gut ol tok long taim bilong ol miting na long wok autim tok, i no olsem yumi mas stori long tok i tru o kaunim gut ol skripsa na em tasol. Nogat. Yumi mas putim tok i go daun long bel bilong ol man i harim tok na kirapim ol long bihainim dispela tok. Bilong mekim olsem, yumi mas givim bel long autim tok i tru olsem yumi yet i bilip tru long en. (Skelim wantaim Aposel 2:37.) Ol tok yumi kisim bilong stretim yumi long skul, ol dispela tok bai helpim yumi long mekim olsem.
4 Taim yu kisim pepa bilong mekim tok bilong yu, tingim wanem pasin bilong mekim tok yu bai wok long en olsem Buk Bilong Skul i kamapim. Tingim ol samting yu mas mekim bilong bihainim ol tok bilong stretim yu em yu bin kisim bipo. Tingim gut nem bilong tok, na yu bai mekim olsem Baibel-stadi o gobek samting, na olsem wanem yu bai kamapim insait bilong ol skripsa i stap long tok bilong yu. Tingting gut long olsem wanem yu ken mekim gut wok long ol tok bilong skulim ol man na kirapim ol long bihainim.—1 Ti 4:15, 16.
5 Sapos yu pret liklik long insait long skul, beten long dispela samting na kamapim tingting bilong yu long wasman bilong skul. Taim yumi mekim wok long olgeta samting yumi kisim long rot bilong Skul Bilong Wok Autim Tok bilong 1999, dispela bai helpim yumi olgeta.