Tingim Gut Haus Bilong Lotuim Jehova
1 Taim yumi go long haus bilong wanpela man, yumi save tingim gut ol samting bilong dispela man, yumi no mekim wanpela samting bilong bagarapim, na yumi no save bagarapim sedyul bilong ol long mekim gut ol samting. Yumi mas mekim moa yet ol dispela samting taim yumi stap long haus bilong Jehova! Yumi mas save long pasin yumi mas bihainim taim yumi stap long haus bilong em. (Sng 15:1; 1 Ti 3:15) Maski yumi mekim ol miting Kristen bilong yumi long Haus Kingdom, o long haus bilong wanpela brata, o long haus bung samting, planti bilong yumi i save tingim gut dispela haus yumi bung long en bilong lotu. Yumi ting em i haus bilong Jehova, em “Biknem bilong en i antap tru, i winim heven na graun.”—Sng 148:13.
2 Sampela brata i no save tingim gut miting; ol i mekim planti nois o mekim ol samting i kamapim olsem ol i no ting ol tok i kamap long miting i bikpela samting. Long taim bilong miting, sampela brata sista i bikpela pinis ol i save sanap klostu long dua, o long toilet, o ausait long Haus Kingdom na stori. Taim ol papamama i larim bikpela pikinini i was long liklik bilong em, sampela taim tupela i kirap long pilai pilai na tupela i no harim gut ol tok bilong miting. Bihain long miting, mipela i bin lukim sampela yangpela i save pilai ausait long Haus Kingdom, o mekim planti nois, na sampela ol i bin tromoi nabaut han lek long narapela olsem ol i pilai kung-fu samting.
3 Ol Samting Yumi No Ken Mekim: Sapos yumi pilim tru olsem lotu bilong yumi em samting holi, bai yumi no mekim ol dispela pasin i pulim tingting bilong ol narapela, olsem: Toktok isi isi long narapela, kaikai, kaikai PK samting, mekim pepa i pairap, i go nating nating long toilet, o kam bihaintaim long ol miting. Ol papamama i save tingim gut haus bilong God, ol i no save larim ol pikinini i tromoi ol pipia long plua, na rait nabaut long ol sia o banis bilong Haus Kingdom o haus bilong mekim Buk-Stadi. Na tu, ol i save skulim pikinini bilong ol long yusim gut toilet na bai toilet i ken i stap klin. Na tru tumas, yumi olgeta i wanbel olsem, em i no stret long mekim ol pasin i no gutpela, tok kranki, o tok pilai nogut long taim bilong ol miting bilong yumi.—Ef 5:4.
4 Sapos oltaim yumi tingim as bilong ol miting Kristen bilong yumi, bai yumi yet na ol pikinini bilong yumi i tingim gut lotu yumi mekim long Jehova long haus yumi laik tumas long i stap long en.—Sng 84:10.