Kisim Pasin Bilong Mekim Ol Samting Stret Long Taim
1. Olsem wanem Jehova i stap gutpela piksa long pasin bilong mekim ol samting stret long taim?
1 Long olgeta taim Jehova i save mekim ol samting stret long taim. Olsem, em i save givim helpim long ol wokman bilong em “long taim stret.” (Hib. 4:16) Na tu, em i save givim yumi ol tok, olsem ‘kaikai long taim stret.’ (Mat. 24:45) Olsem na yumi ken bilip olsem de bilong belhat bilong em bai kamap stret long taim em i makim. (Hab. 2:3) Pasin bilong Jehova long mekim ol samting stret long taim i helpim yumi! (Sng. 70:5) Tasol yumi gat sin, na yumi save bisi, na i hatwok tru long yumi mekim ol samting stret long taim. Wai na yumi mas kisim pasin bilong mekim ol samting stret long taim?
2. Olsem wanem pasin bilong bihainim stret taim i givim ona long Jehova?
2 Long dispela taim bilong las de ol man i laikim ol yet tasol na i no bosim laik bilong bodi, na pasin bilong leit i kamap nomol pasin tasol. (2 Tim. 3:1-3) Tasol taim ol narapela i lukim pasin bilong ol Kristen long kamap stret long taim bilong wok, lukim dokta samting, kam long ol miting, ol i givim biknem long Jehova. (1 Pita 2:12) Olsem wanem? Yu save go long ples wok long taim stret, tasol yu save kam leit long ol miting samting? Taim yumi kamap long taim stret bilong ol miting, insait long singsing na beten, dispela i kamapim olsem yumi laik bihainim pasin bilong Papa bilong yumi long heven.—1 Kor. 14:33, 40.
3. Olsem wanem pasin bilong mekim ol samting long taim stret i soim olsem yumi tingim ol narapela?
3 Pasin bilong bihainim stret taim i soim olsem yumi tingim ol narapela. (Fili. 2:3, 4) Olsem, taim yumi kamap long taim stret bilong ol miting Kristen na long grup bilong autim tok, yumi no pulim ai bilong ol bratasista. Tasol sapos yumi gat pasin bilong kam leit oltaim, yumi givim tingting long ol narapela olsem taim bilong yumi i bikpela samting moa winim taim bilong ol. Pasin bilong mekim ol samting stret long taim i soim olsem yu man bilong mekim gut wok, na ol i ken trastim yu, em ol pasin we ol man i save laikim.
4. Sapos planti taim yu save kam leit, olsem wanem yu inap stretim dispela hevi?
4 Sapos planti taim yu kam leit, orait skelim gut wanem as na yu leit. Stretim gut ol wok bilong yu na dispela bai helpim yu long mekim ol dispela wok long taim stret. (Sav. 3:1; Fili. 1:10) Beten long Jehova i helpim yu. (1 Jon 5:14) Pasin bilong bihainim stret taim em i wanpela rot i soim olsem yumi pilim tru dispela tupela bikpela Lo—laikim Jehova na laikim ol narapela.—Mat. 22:37-39.