Wanpela Spesel Wok Bilong Autim Tok Long Balgeria i Kamap Gutpela
“Planti kaikai tumas i mau pinis long gaden, tasol i no gat planti wokman i stap bilong kisim. Olsem na yupela i mas beten long Papa bilong gaden, bai em i salim ol wokman i go bungim kaikai bilong en.”—MT. 9:37, 38.
DISPELA tok bilong Jisas i stret tru long Balgeria, em wanpela naispela kantri Bolkan i stap long saut-is Yurop! Ol i sot long ol wokman bilong bringim gutnius i go long 7,000,000 manmeri i stap long Balgeria. I gat olsem 1,700 pablisa long Balgeria, tasol ol i no inap pinisim olgeta hap teritori bilong ol. Olsem na Gavening Bodi i givim tok orait long singautim ol Witnes long sampela kantri bilong Yurop ol i save mekim tok ples Balgeria na bai ol i ken insait long wanpela spesel wok bilong autim tok long 2009. Ol i makim 7-pela wik bilong taim bilong san long mekim dispela wok, na long pinis bilong en bai i gat “Was i Stap!” Kibung Distrik i kamap long Sofia, long Ogas 14-16, 2009.
Planti Ol i Bihainim Dispela Singaut
Ol brata bilong brens ofis long Sofia ol i tingting: Hamas brata sista long Frans, Grik, Itali, Jemani, Polan, na Spen bai bihainim dispela singaut? Ol i mas go long Balgeria long taim ol i gat malolo long wok na ol yet i mas baim rot bilong go mekim dispela wok autim tok. Long olgeta wan wan wik ol i wok long kisim nem bilong planti pablisa, na bihain i gat 292! Em nau, planti volantia i laik mekim dispela wok, olsem na brens ofis inap makim ol dispela lain i go long 3-pela biktaun bilong Balgeria, em Kazanlak, Sandanski, na Silistra. Ol wasman sekit long Balgeria i singautim ol painia na pablisa bilong dispela hap long helpim dispela spesel wok. Bihain i gat 382 volantia i mekim save autim tok long ol teritori em gutnius i no bin go long en bipo.
Ol brata bilong ol kongrigesen i stap klostu ol i go pas bilong painim ples slip bilong ol dispela lain. Ol i rentim sampela flet na kisim sampela rum long ol haus pasindia samting i no gat bikpela pe. Taim ol volantia i kamap, ol dispela brata i wok strong tru long bringim ol i go long ples slip na helpim ol long ol samting ol i mas i gat. Long 3-pela biktaun hia ol i rentim ol ples bilong bung wantaim. Ol i stretim rot bambai ol brata i bin kam long ol narapela kantri ol i ken lukautim ol miting bilong kongrigesen. I gutpela tru long lukim olsem, long ol ples i no gat wanpela Witnes i sindaun long en, i gat 50 pablisa i bung bilong litimapim nem bilong Jehova.
Ol dispela lain em ol i bin kam long ol narapela kantri bilong mekim dispela wok, ol i taitim bun tru. Long taim bilong san, Balgeria em i ples hat tru, winim mak olsem 40 digri. Tasol i no gat wanpela samting inap pasim ol dispela strongpela bratasista long autim tok. Silistra em wanpela biktaun i stap long arere bilong wara Danube na i gat 50,000 manmeri, tasol insait long 3-pela wik ol bratasista i autim tok inap tru long dispela biktaun. Olsem na ol brata i go autim tok long ol ples klostu, na ol i go kamap long Tutrakan, em i stap longwe inap 55 kilomita long hap wes bilong Silistra. Ol i kirap autim tok long 9:30 long moningtaim. Long belo ol i kaikai na malolo liklik, na planti taim ol i kirap autim tok gen i go inap 7 klok long apinun tru o bihain long en. Ol volantia i givim bel tru, olsem na ol i pinisim ol teritori long Kazanlak na Sandanski na ol i go autim tok long ol ples na taun i stap klostu.
Wanem Samting i Kamap Long Dispela?
Ol i mekim bikpela wok tru long autim tok insait long dispela 7-pela wik. Olsem ol i bin tok long taim bilong ol aposel, ol lain bilong ol dispela biktaun ol tu inap tok, ‘Ol manmeri long olgeta hap bilong taun bilong mipela i harim pinis tok bilong yupela.’ (Ap. 5:28) Ol Witnes i insait long dispela spesel wok ol i tilim 50,000 nius na ol i kirapim 482 Baibel stadi. Kirap long Septemba 1, 2009, wanpela nupela kongrigesen i kamap long Silistra, na i gat ol grup long Kazanlak na Sandanski. I gutpela tru long lukim sampela manmeri em ol i bin harim gutnius long namba wan taim insait long ol dispela wik, ol i wok long kamap strong long ol samting bilong spirit.
Long namba wan wik bilong dispela spesel wok, wanpela sista painia salim bilong Spen i save mekim tok Balgeria em i autim tok long Karina, em wanpela meri bilong Silistra i bin mekim wok bilong salim ol niuspepa long rot. Karina i laikim dispela tok na em i kam long wanpela miting. Em i orait long stadi long Baibel. Man bilong em i no bilip long God, olsem na em i tok em i laik stadi long wanpela pak. Tupela pikinini meri bilong em ol tu i insait long stadi. Pikinini i bikpela, em Daniela, em i laikim moa yet tok i tru bilong Baibel. Insait long wanpela wik tasol em i ritim buk Baibel i Tok na kwiktaim em i kirap bihainim ol tok bilong Baibel long yumi no ken mekim wok long ol imis bilong mekim lotu. Orait bihain em i kirap autim tok i tru long ol pren bilong em. Tripela wik tasol bihain long namba wan miting bilong em, em i tokim sista i lukautim stadi: “Mi pilim olsem mi stap wanlain bilong yupela. Mi mas mekim wanem na bai mi tu i ken kirap long autim tok?” Daniela i wok yet long kamap strong, na mama wantaim yangpela sista bilong em tu.
Long Kazanlak wanpela brata Balgeria nem bilong en Orlin, em i bin lusim Itali na i kam bilong mekim dispela wok, em i pinis long autim tok na em laik i go bek long ples slip bilong em. Em i wokabaut i go na em i autim tok long tupela yangpela man i sindaun long pak. Orlin i tilim buk Baibel i Tok long tupela na em i stretim tok long kam bek lukim ol long tumora. Orait Orlin i go bek na em i kirapim stadi wantaim Svetomir na em i mekim gen long neks de. Insait long 9-pela de Orlin i stadi wantaim Svetomir inap 8-pela taim. Svetomir i tok: “Tupela de paslain long mi bin bungim yu, mi beten askim God long helpim mi long save gut long em. Na mi tok promis olsem sapos em i helpim mi, bai mi dediketim laip bilong mi long em.” Taim Orlin i go bek long Itali, ol brata bilong dispela hap ol i wok yet long stadi wantaim Svetomir na em i wok long kamap strong long tok i tru.
Ol i Kisim Ol Gutpela Blesing
Ol dispela lain volantia ol i bin baim rot bilong ol yet na kam long narapela kantri long taim bilong malolo bilong ol bilong autim gutnius, na ol i gat wanem tingting long dispela? Wanpela elda i save mekim wok long Spen em i tok: “Dispela bikpela wok i mekim na ol brata long Spen husat i save autim tok long ol Balgeria, ol i pas gut moa wantaim. Dispela wok i mekim gutpela samting tru long ol brata i bin insait long en.” Tupela marit long Itali i tok: “Dispela em i nambawan gutpela mun tru long laip bilong mipela!” Na ol i tok moa: “Dispela spesel wok i senisim tru i stap bilong mipela. Nau mitupela i kamap narapela kain man na meri.” Dispela tupela marit i kirap tingting strong long lusim ples na i go sindaun olgeta long Balgeria bilong autim tok long ol hap i sot long ol pablisa. Carina em i wanpela singel sista i mekim wok painia oltaim long Spen, na em i bin i go bilong helpim dispela spesel wok long Silistra. Bihain long en, Carina i lusim wok mani bilong em long Spen na em i go long Balgeria bilong helpim nupela kongrigesen i kamap long dispela biktaun. Em i bin bungim sampela mani inap long em i ken i stap wanpela yia long Balgeria. Carina i toktok long samting em i bin mekim, em i tok: “Mi amamas tru long Jehova i larim mi i mekim wok autim tok hia long Balgeria, na mi laik bai mi inap i stap long dispela hap inap longpela taim. Mi gat 5-pela Baibel stadi pinis, na 3-pela ol i save kam long ol miting.”
Wanpela sista bilong Itali i laik insait long dispela spesel wok, tasol em i bin kisim wanpela nupela wok mani na em i no gat sampela holide em inap kisim long wok. Tasol em i no larim dispela samting i pasim em. Em i askim bos long em i ken lusim wok inap wanpela mun na em i no ken kisim pe, na em i redi long lusim wok olgeta sapos bos i no orait long dispela. Em i kirap nogut long tok bilong bos bilong em, em i tok: “I orait, tasol yu mas mekim wanpela samting. Taim yu stap long Balgeria yu mas salim wanpela kat long mi.” Sista i pilim tru olsem Jehova i bin harim beten bilong em.
Stanislava em wanpela yangpela sista bilong biktaun Varna long Balgeria na em i wok fultaim long wanpela wok i gat bikpela pe. Em i kisim malolo bambai em i ken insait long dispela spesel wok long Silistra. Em i lukim bikpela amamas bilong planti ol painia i bin lusim kantri bilong ol na i kam longwe bilong autim gutnius long kantri bilong em, na em i krai. Em i kirap long tingim i stap bilong em yet, em i save mekim wok mani fultaim. Taim em i autim tok inap tupela wik pinis na em i go bek long ples, em i lusim wok mani bilong em na em i kamap painia oltaim. Nau em i amamas tru, long wanem, long taim em i yangpela yet em i tingim Man bilong wokim em.—Sav. 12:1.
Em i gutpela samting tru long mekim wok bilong Jehova. I no gat wanpela samting i winim pasin bilong givim taim na strong bilong yu long mekim dispela bikpela wok bilong autim gutnius na skulim ol man. Olsem wanem? Yu gat sampela rot bilong mekim bikpela wok moa long dispela wok bilong autim tok em inap kisim bek ol man? Ating i gat sampela hap long kantri bilong yu yet i sot long ol man bilong autim gutnius. Yu inap lusim ples na i go sindaun long dispela hap? O yu ken tingting long lainim narapela tokples bilong helpim ol man long kantri bilong yu ol i gat bikpela laik long kisim save long tok i tru bilong Baibel. Sapos yu inap stretim rot bambai yu ken mekim bikpela wok moa long autim tok, yu ken bilip olsem Jehova bai i mekim gut tru long yu.—Snd. 10:22.
[Blok/Piksa long pes 32]
Wanpela De Bilong Tingim
Planti bilong dispela lain bilong ol narapela kantri em ol i bin kam bilong helpim dispela spesel wok i kamap long Balgeria, ol i bin tingting long go long “Was i Stap!” Kibung Distrik long Sofia. Ol bratasista bilong dispela hap ol i amamas tru long bung wantaim planti bilong ol narapela narapela kantri, na dispela i strongim bel bilong ol. Ol dispela 2,039 manmeri i bung long kibung ol i amamas tru taim Brata Geoffrey Jackson bilong Gavening Bodi i kamapim Baibel New World Translation of the Holy Scriptures long tok ples Balgeria! Olgeta husat i bin bung long Fraide ol i mekim save paitim han bilong kamapim bikpela tenkyu bilong ol. Planti ol i krai na aiwara i pundaun. Tok bilong dispela Baibel ol i kisim em i stret na i klia tru, na em bai helpim gut ol manmeri bilong Balgeria em ol i gat stretpela bel long kisim save long Jehova.
[Mep long pes 30,31]
(Bilong save ol dispela rait i stap we long pes, lukim buk o magasin)
BALGERIA
SOFIA
Sandanski
Silistra
Kazanlak
[Ol Piksa long pes 31]
Ol i bin mekim bikpela wok tru bilong autim tok insait long dispela 7-pela wik