Ol i Lotuim God Long Balgeria Long Ples Klia
Tri handet man i kalap long 6-pela bas na lusim Balgeria na ol i go long hap wanpela kibung bai kamap long en long Tesalonaika long Grik. Ol i kamap long ples kibung long apinun long Fonde, Julai 11, 1991. Nau tasol dispela lain i kisim pas (visa) long kam long kibung, long wanem, kantri klostu long ol, em Yugoslavia, i gat pait long en.
Long Trinde long apinun ol man i wok long embasi long Sofia long Balgeria ol i bin wok ovataim long stretim ol dispela pas bilong ol man i laik go long kibung. Olsem na ol dispela bas inap raun long ol hap bilong Balgeria na kisim ol dispela man i laik go long kibung, na ol i kamap wanpela nait paslain long kibung i kirap.
Long dispela taim lotu bilong ol Witnes Bilong Jehova i stap tambu long Balgeria, olsem na ol dispela man i amamas tru long bung wantaim ol narapela Kristen long kantri Grik, em ples i no gat tambu! Ol i bung long wanpela haus na ol i bin bilasim tru pletfom long dispela haus (em yu inap lukim long piksa). Ol dispela man i kam long Balgeria i amamas tru, long wanem, ol inap harim klostu olgeta tok long tok ples bilong ol yet! Wanpela pilai bilong Baibel tasol i kamap long narapela tok ples. Tasol paslain long pilai i kamap, wanpela man i stori liklik long dispela pilai long tok Balgeria, na bihain ol i sindaun wantaim ol brata Kristen Grik bilong ol na lukim dispela pilai.
Bikpela samting long dispela kibung bilong ol Balgeria i bin kamap long moningtaim long Sarere, em tok bilong baptais. I gat 342 man i harim tok na 39 i kisim baptais (em sampela bilong ol yu inap lukim ol i sanap long piksa). Ol dispela man i kam long kibung ol i amamas long kisim tupela samting long tok ples bilong ol. Em liklik buk, Tewel Bilong Ol Daiman—Yu Ting Ol Inap Helpim o Nogutim Yu? Tru Ol i Stap o Nogat?, na buk Baibel Stori Buk Bilong Mi.
Tasol wanpela samting i amamasim moa ol dispela man bilong Balgeria taim ol i lusim kibung na go bek long kantri bilong ol. Long Julai 17, em sampela de tasol bihain long kibung, gavman i larim ol Witnes long mekim wok bilong ol long ples klia, no gat tambu moa! Olsem na long mun Ogas ol Witnes long Balgeria i save autim tok bilong Baibel, na olgeta wan wan i bin autim tok inap 21 aua long dispela mun. Olsem na yumi olgeta i ken amamas, long wanem, long narapela kantri bilong Isten Yurop, em Balgeria, nau rot i op na ol inap lotuim God long ples klia!