Mi Driman Long Wok Long Sekes
Stori bilong Zoya Dimitrova
Taim mi gat 15 krismas, driman bilong mi i kamap tru—mi amamas long wok na raun wantaim sekes. Orait, long Septemba 4, 1970, mi kisim bikpela bagarap. Pastaim mi swing i go antap, na bihain wantu tasol mi pundaun i kam daun long graun.
MAMA i karim mi long Disemba 16, 1952, na mi stap wantaim papamama na susa bilong mi long Sofia, Balgeria. Long dispela taim, Balgeria em i wanpela komiunis kantri we gavman i no tambuim lotu, tasol ol i no laik bai ol manmeri i bihainim tumas lotu. Planti man i no bilip long God, na ol manmeri husat i bilip, planti bilong ol i haitim bilip bilong ol. Famili bilong mi i tok ol i bilong lotu Otodoks, tasol ol i no bin mekim bikpela long mi insait long dispela lotu na mi no save tingim God.
Taim mi liklik yet, ol samting mi mekim i kamapim klia olsem mi gat bikpela laik long olkain spot, na moa yet long jimnastik. Taim mi gat 13 krismas, wanpela man i kam long skul bilong mipela long painim wanpela gel bilong trenim em long insait long sekes. Jimnastik tisa bilong mi i makim mi. Mi amamas tru long kalap long kar bilong maneja, em wanpela kar bilong Amerika, na go long ol trena bilong mekim intaviu na mekim ol traim. Mi amamas tru olsem ol i makim mi. Kirap long dispela taim, mi bihainim wanpela program bilong trening strong tru na mekim ol prektis, na mi bin mekim olsem inap tupela yia. Orait, taim mi gat 15 krismas, mi pinisim trening bilong mi na mi kirap long mekim wok—mi raun wantaim sekes. Pastaim, mi raun long olgeta hap bilong Balgeria, na bihain mi go long ol kantri em bipo Soviet Yunion i bin bosim, na tu, mi go long Aljiria, Hangari, na kantri bipo ol i kolim Yugoslavia.
Insait long 3-pela yia, laip bilong mi i gutpela tru, i olsem driman bilong mi i kamap tru. Orait, taim mi mekim wok sekes long Titov Veles, Masedonia, mi kisim bikpela bagarap olsem mi bin kamapim long kirap bilong dispela stori. Mi wok long mekim ol stail bilong jimnastik na mi swing i go antap tru. Poroman bilong mi i hangamap apsait daun, na em bai tromoi mi i go antap na bihain ketsim mi taim mi kam daun. Tasol mi abrusim han bilong em na taim seifti rop bilong mi i bruk, mi pundaun i kam daun long graun inap 6 mita. Ol i kisim mi hariap i go long haus sik, na ol i painimaut olsem han, sampela bun bilong banis, na baksait bun bilong mi i bruk. Inap sampela de, tingting bilong mi i paul na mi no inap tingim samting i bin kamap. Taim mi orait liklik, mi kisim save olsem tupela lek bilong mi i paralais. Mi yangpela yet, olsem na mi ting gutpela samting inap kamap long rot bilong eksasais samting o operesen, na bai mi inap wokabaut gen na ating bai mi go bek long sekes.
Insait long 2 na hap yia, mi kisim kain kain tritmen long ol narapela narapela haus sik, na mi holim yet tingting olsem mi bai kamap orait gen. Tasol isi isi mi mas kisim stretpela tingting olsem dispela driman bilong mi long wok long sekes i pinis. Nau mi mas lain long nupela laip bilong mi long sindaun long wilsia.
Kirap Bilong Nupela Laip
Bihain long dispela gutpela laip mi bin stap long en, mi pilim olsem mi no inap mekim dispela senis. Mi pilim olsem i no gat gutpela samting bilong wetim i kamap bihain. Dispela i mekim na mi kisim sik bilong bel hevi. Orait long 1977, wanpela yangpela man nem bilong em Stoyan i kam long haus bilong mi. Mi kisim save olsem em i brata bilong wanpela wanwok bilong mi long bipo, olsem na wantu mi singautim em i kam insait long haus. Taim mipela i stori, em i askim mi sapos mi bilip olsem mi inap kamap orait gen. Olgeta hatwok bilong mi i lus nating na mi no amamas long laip bilong mi, olsem na mi bekim tok olsem i no gat gutpela samting mi inap wetim i kamap bihain. Taim em i tokim mi olsem God tasol inap helpim mi, mi bel hevi na tok: “Sapos i gat God i stap, bilong wanem mi stap olsem?”
Taim mi tok olsem, orait Stoyan, husat i bin kamap wanpela Witnes Bilong Jehova taim em i wok sekes long Amerika, em i kamapim long mi ol gutpela tok promis bilong Baibel long ol samting bai kamap bihain. Mi amamas tru long kisim save olsem klostu nau graun bai kamap wanpela paradais. Dispela tok promis olsem “bai i no gat dai moa, na ol bai i no bel hevi na krai moa, na ol bai i no inap pilim pen gen,” i mekim gut tru bel bilong mi. (Revelesen 21:4) Mi gat bikpela laik tru long kisim bek gutpela helt bilong mi! Mi orait long stadi long Baibel, na dispela em i kirap bilong nupela laip bilong mi. Man! Nau mi painim pinis as na mi ken wetim gutpela samting i kamap bihain!
Mi save amamas na wetim taim bilong Baibel stadi bilong mi long olgeta wan wan wik. Pastaim mi stadi wantaim Stoyan, na bihain wantaim Totka, wanpela Witnes i save mekim gutpela pasin tru long mi. Totka i helpim mi na kwiktaim mi kisim save long tok i tru bilong Baibel na mi dediketim laip bilong mi long God Jehova. Long dispela taim, i no gat wanpela brata long Sofia em inap baptaisim mi, olsem na mi mas wet long visit bilong wanpela brata bilong Masedonia. Long Septemba 11, 1978, wanpela yia bihain long mi bin kirap stadi long Baibel, ol i baptaisim mi long rum waswas long haus bilong mi. Baptais bilong mi olsem wanpela Witnes Bilong Jehova i givim bikpela amamas tru long mi, na laip bilong mi i gat as tru bilong en.
Ol tok i tru bilong Baibel mi kisim save long en i kirapim tru bel bilong mi. Mi kirap autim dispela nupela bilip bilong mi long olgeta man i kam long haus bilong mi. Tasol sori tru, i no gat wanpela i pilim tok mi mekim, ating ol i ting olsem eksiden i mekim na mi kamap longlong liklik.
Mi Mekim Bikpela Rong
Long dispela taim, gavman i tambuim wok bilong ol Witnes Bilong Jehova long Balgeria, na i gat sampela Witnes tasol long kantri. I no gat ol miting bilong kongrigesen we mi inap i go long en, na i no gat planti wanbilip em mi inap bung wantaim ol. Na tu, mi no luksave olsem samting nogut inap painim mi sapos mi bung wantaim ol poroman nogut em ol i no save bihainim ol stiatok bilong Baibel, dispela i mekim na mi mekim bikpela rong.
Oltaim maus bilong bel bilong mi i kotim mi tru, na mi pilim nogut tru olsem mi stap longwe long God Jehova. Mi bel hevi tru na mi sem, na mi beten strong na askim Jehova long lusim rong bilong mi. Bihain, sampela gutpela elda Kristen i helpim mi na mi pas gut gen wantaim Jehova na mi kisim bek amamas bilong mi long mekim laik bilong em. Mi amamas tru long mi inap mekim wok bilong Jehova na maus bilong bel i no gat tok na mi inap bung yet wantaim klinpela oganaisesen bilong em!
Mi Amamas Maski Mi No Inap Mekim Planti Samting
Dispela eksiden i bin painim mi inap 40 yia i go pinis na i pinisim tru driman bilong mi long wok na raun wantaim sekes, na nau mi sindaun tasol long wilsia. Maski i olsem, mi no tingim bek laip bilong mi long bipo na bel hevi olsem i no gat wanpela gutpela samting i kamap long laip bilong mi, nogat. Ol tok i tru bilong Baibel i helpim mi long luksave olsem laik bilong mi long amamas na raun wantaim sekes, em ol samting bilong stap sotpela taim tasol. Mi bin lukim olsem ol wanwok bilong mi husat i bin wok yet long sekes i painim planti hevi long laip bilong ol. Tasol mi bin painim gutpela samting tru—mi pas gut wantaim Man Bilong Wokim olgeta samting, em God Jehova. Dispela i givim bikpela amamas tru long mi, winim amamas mi inap kisim long wok wantaim sekes.
Na tu, mi amamas tru long lukim planti narapela i kisim save long tok i tru bilong Baibel na dediketim laip bilong ol long gutpela God bilong yumi, Jehova. Taim mi bin kirap stadi long Baibel long 1977, i gat sampela Witnes Bilong Jehova tasol long Balgeria. Long 1991—em namba wan taim gavman i bin rejistaim ol Witnes Bilong Jehova taim gavman Komiunis i pundaun—namba bilong ol Witnes long olgeta hap bilong kantri i stap tasol antap liklik long 100. Nau mi amamas tru long lukim namba bilong ol pablisa bilong Kingdom i go antap inap olsem 1,800!
I gat planti wok yet bilong mekim long Balgeria. Planti i wok long painim stretpela save long Tok Bilong God. Dispela i kamap ples klia taim 3,914 manmeri i bin kam bung long Memorial bilong tingim indai bilong Jisas long 2010. Taim mi tingim dispela, mi pilim tru olsem Jehova i blesim wok bilong liklik lain manmeri long Balgeria. Mi yet i lukim truim bilong tok profet bilong Aisaia 60:22 olsem “ol lain i liklik tru” bai i kamap bikpela olsem wanpela “strongpela kantri.”
Narapela gutpela samting mi amamas long en long laip bilong mi em taim ol i kamapim Baibel New World Translation of the Holy Scriptures long tokples Balgeria. Dispela samting i bin kamap long “Was i Stap!” Kibung Distrik i kamap long Sofia, long Ogas 2009. Taim ol i kamapim dispela Baibel long tokples bilong mi, em i olsem wanpela driman i kamap tru! Em bai gutpela tru long helpim planti manmeri moa long kisim save long tok i tru bilong Baibel long Balgeria.
Maski tupela lek bilong mi i paralais na mi no inap mekim planti wok long autim gutnius bilong Kingdom Bilong God, mi amamas long autim tok i tru bilong Baibel long ol neiba na ol manmeri i kam long haus bilong mi. Wanpela taim mi bin stap long veranda bilong mi na singaut long neiba bilong mi taim em i wokabaut i go. Em i orait long invatesen bilong mi na em i kam long haus, na bihain long mi kamapim sampela gutpela tok bilong Baibel, em i orait long mi stadi long Baibel wantaim em. Mi amamas tru olsem bihain em i kisim baptais na kamap wanpela sista wanbilip bilong mi. Mi bin helpim 4-pela meri na ol i dediketim laip bilong ol long Jehova.
Samting i givim bikpela amamas na i strongim tru bel bilong mi em pasin bilong go oltaim long ol miting Kristen na bung wantaim winim wan handret brata na sista em ol i stap olsem famili bilong mi. Mi sindaun long kantri we gavman i no save lukautim ol lapun na ol lek nogut long trenspot samting, olsem na mi save pilim olsem i hatwok long go long ol miting bilong kongrigesen. Tasol mi tenkyu tru long gutpela pasin bilong wanpela yangpela brata long lukautim mi. Bilong go long olgeta wan wan miting, em i save karim mi long haus i go long kar, long kar i go long Haus Kingdom, na bihain bringim mi i go bek long wankain pasin. Mi tenkyu tru long Jehova olsem mi insait long wanpela gutpela famili spirit olsem!
Taim mi tingim bek ol samting long laip bilong mi, mi lukim olsem ol samting long i stap bilong mi i narapela kain olgeta long ol samting mi bin tingting long kisim taim mi yangpela. Mi mekim wok bilong Jehova, na dispela i givim bikpela amamas long mi long nau na mi wetim ol gutpela samting bai kamap bihain. Mi tingim tru tok promis bilong God olsem em bai kamapim wanpela paradais long graun na long dispela taim “ol lek nogut bai ol i kalap olsem ol dia.” (Aisaia 35:6) Mi bilip tru na wetim dispela taim we mi bai lusim wilsia na kalap, na bai mi kisim bek gutpela helt na strong bilong mi.
[Rait long pes 30]
“Samting i givim bikpela amamas na i strongim tru bel bilong mi em pasin bilong go oltaim long ol miting Kristen”
[Rait long pes 31]
“Gutpela samting mi amamas long en long laip bilong mi em taim ol i kamapim Baibel New World Translation of the Holy Scriptures long tokples Balgeria”
[Piksa long pes 29]
Mi kirap wok wantaim sekes taim mi gat 15 krismas