Ol Kibung Distrik Long Rasia i Kamapim Ol Blesing

LONG olgeta yia long taim bilong san, planti manmeri long Rasia i save laikim tumas long lusim ol taun na go limlimbur long ol haus i stap long kantri sait. Dispela em i taim bilong ol long malolo na ol i no tingting tumas long ol wok samting bilong biktaun. Insait long sampela yia i go pinis long taim bilong san, ol Witnes Bilong Jehova long Rasia ol tu i lusim biktaun na i go long kantri sait​—⁠tasol ol i no go bilong limlimbur, nogat.

Maski i gat sampela tambu long wok autim tok bilong ol long sampela taun, ol Witnes i wok yet long mekim ol bung bilong lotu; ol i mekim wok long rait bilong ol long i stap fri bilong mekim lotu. Tasol sampela taim, ol bikman bilong gavman na ol pris pasto bilong Misin Otodoks bilong Rasia ol i birua long ol Witnes na i pasim rot bilong ol long kisim ol ples bung bilong mekim ol kibung distrik em ol i save mekim long olgeta yia. Olsem na ol Witnes i stretim rot bilong mekim ol kibung long ol bus. Long 2007 i go long 2009, ol i bin mekim 40 kain kibung olsem long 25 hap bilong Rasia.

Wanpela Witnes husat i save go long ol kibung long Rasia inap planti yia pinis, em i tok: “Long ol yia i go pinis, taim mipela i rentim ol stediam na haus long ol biktaun, planti man i gat gutpela bel na ol bikman bilong gavman ol i mekim gutpela tok long oganaisesen bilong mipela, long wanem, ol i lukim olsem mipela i stap klin na mekim stret ol samting. Tasol nau mipela i mas bung long bus we ol wel animal tasol i lukim. Sori tru, ol man i no inap lukim ol dispela gutpela bung bilong lotu we ol man bilong kain kain sindaun, skin kala, na lotu i bung wantaim long en.”

Maski ol dispela bung em taim bilong amamas, wanpela Witnes i tok: “Mi amamas long lukim ol wanbilip Witnes i redi long mekim wok bilong Jehova maski i hatwok. Tasol tru tru, taim ol bikman bilong gavman i givim hatwok long mipela long mekim ol kibung, dispela inap givim bikpela wok long mipela na i bagarapim bel na tingting bilong mipela. Na tu, dispela i pasim mipela long stap fri long lotuim God i Gat Olgeta Strong long pasin i givim biknem long em.” Ol Witnes Bilong Jehova long Rasia i bin mekim wanem bilong winim dispela hatwok?

Ol Kibung i Kamap Long Bus

Planti taim, klostu long taim bilong kibung ol Witnes i kisim toksave olsem ol i no inap yusim ol haus ol i laik rentim, na nau ol brata i lukautim ol samting bilong kibung i mas painim narapela ples slip samting bilong ol planti tausen bratasista i kam long kibung. Olsem: Long 2008, ol Witnes long Cheboksary, long Ripablik Chuvash, ol i mas mekim kibung long wanpela hap graun we i gat ol bikpela diwai na ol inap lukluk i go long wara Volga. Tasol i gat bikpela wok tru ol i mas mekim. Long ol 1,930 manmeri husat bai kam long dispela bung, inap 1,700 i mas slip long dispela hap bilong kibung. Ol i mas i gat ples waswas na ol sink we i gat kolwara na hatwara, ol toilet, na pawa. Na olgeta manmeri i kam long kibung i mas i gat kaikai.

Ol brata i wok hat tru na bai i gat dispela olgeta samting ol manmeri i mas kisim. Ol i painim ol kapenta, elektrisen, na ol plama. Inap 350 Witnes i volantia long mekim wok, na 14 bilong ol i slip long ples kibung inap 10-pela de. Ol i katim ol plang, karim ol gras i drai, sanapim ol haus sel, ol ples waswas, na wokim ol toilet. Sampela lain brata i go planti taim long taun bilong baim ol samting. I no gat ol frits bilong putim kaikai, olsem na long ples kibung yet inap 3-pela taim long de ol brata i kukim kaikai bilong olgeta i ken kaikai. Ol man i bosim dispela hap i helpim ol brata long rot bilong haiarim sampela man long redim kaikai bilong ol man i kam long kibung. Inap 500 manmeri i bringim ol haus sel bilong ol yet, na 150 i rentim ol haus i stap klostu, na 15 i slip antap long gras i drai long ol haus bulmakau, na ol narapela i slip long ol haus sel em ol brata i sanapim.

Taim ol manmeri i kamap, ol i lukim planti plastik sia i gat kain kain kala em ol i lainim gut. Long fran i gat 2-pela pletfom em ol i bilasim gut wantaim ol plaua, wanpela pletfom em bilong program i kamap long tokples Rasia na narapela em bilong program long tokples bilong ol Chuvash. Olgeta i amamas long ol gutpela tok bilong Baibel long dispela program, na ol i tenkyu tru long hatwok bilong ol volantia. Wanpela husat i wok long redim kaikai, em i tok: “Sapos mi yet i no lukim tru long ai bilong mi, ating mi no inap bilip olsem dispela oganaisesen yupela i stap long en i wok gut tru wantaim!” Sampela i tok dispela kibung i wankain olsem Ol Bikpela De Bilong i Stap Long Haus Win bilong lain Israel long taim bilong ol man i bin raitim Baibel.

Long sampela narapela taun, ol Witnes i gat wanpela de tasol bilong painim wanpela ples na redim bilong mekim kibung. Dispela kain samting i bin kamap long Nizhniy Novgorod we ol volantia i wok long de na nait olgeta long wanpela hap graun bilong wanpela man. Ol i mas katim sampela diwai na bus, katim gras, na rausim ol binatang na ol anis. Taim ol manmeri i kam long bung long Fraide moning, ol volantia i redim pinis 2,000 plastik sia, 10-pela toilet, ol sink i gat paip wara, pletfom, wanpela jenereta, na ol samting bilong saun. Wanpela brata i tok: “Wanpela samting mi kirap nogut long en em ol brata husat i bin wok long de na nait, ol i no givim biknem long ol yet na ting olsem ol i mekim bikpela wok, nogat. Long pasin daun ol i wok yet long helpim ol narapela long taim bilong kibung. Ol i givim taim na strong bilong ol yet bambai ol narapela brata na sista i ken sindaun gut na amamas long harim ol gutpela tok bilong Baibel.”

Narapela brata i tok: “Mipela i pilim tru olsem olgeta i bin wok gut wantaim. Maski em namba wan taim ol brata i redim ol samting bilong mekim kibung long bus, ol i stretim gut olgeta samting bilong program na bai i no gat planti samting i pulim ai na tingting bilong ol man. Na taim olgeta samting i pinis, mipela i no pilim taiet. Jehova i givim strong long mipela bilong mekim olgeta samting!”

Spirit Bilong God i Mekim Wok

Long planti samting, pasin bilong karim ol hevi bilong stretim ol samting bilong kibung i strongim tru ol Witnes na i soim olsem spirit bilong God i mekim wok. Long Smolensk, long nait paslain long kibung ol i kenselim planti ples slip em mipela i bin rentim. Wanpela elda i tok: “Taim sampela bas i karim ol bratasista i kam long 1 klok moningtaim, i no gat ples slip bilong putim ol. Mi kirap krai, long wanem, mi no inap mekim wanpela samting bilong helpim ol. Mi beten askim Jehova long helpim mipela long karim dispela hevi. Man! Mi amamas tru, long wanem, wanpela aua bihain mipela i painim narapela ples slip bilong olgeta. Dispela i kamapim long ples klia olsem Jehova i no save lusim tingting long ol stretpela manmeri!” Long narapela kibung i kamap long bus, ol brata i go long wanpela viles long dispela hap na askim ol manmeri long givim ples slip long ol. Ol Witnes i gat gutnem long dispela hap, olsem na ol manmeri bilong viles i amamas long givim ples slip long 2,000 manmeri i kam long kibung.

Wanpela Witnes i tok: “Mipela inap mekim kibung na dispela i soim olsem em i bikpela samting long bilip long Jehova long olgeta taim.” Dispela i tru moa yet taim sampela man i kam na i laik bagarapim program bilong kibung. Long Novoshakhtinsk, sampela pris pasto bilong Misin Otodoks na sampela narapela man i kam na mekim ol singsing lotu long maikrofon bilong daunim ol tok bilong man i mekim tok long kibung. Tasol ol polis i kam na stopim ol long mekim olsem. Taim wanpela meri bilong lain Otodoks i hapdai, long wanem, ples i hot, ol brata i kisim em i go long Dipatmen Bilong Fest Eid long ples kibung na helpim em long marasin samting. Em i kirap nogut tru long dispela samting.

Kirap Nogut Long Samting Ol i Lukim

Planti man i pret long pasin teroris, olsem na taim i gat ol bikpela bung long Rasia, dispela i save mekim na ol polis samting na ol man i stap klostu i laik save wanem samting i kamap. Olsem: Sampela mausman bilong wanpela polis skwat i bin kam long wanpela kibung i kamap long bus long Volzhskiy. Mobail fon bilong wanpela bilong ol i lus long taim bilong kibung, na ol brata i helpim em long i go kisim long Dipatmen Bilong Ol Samting i Lus. Bihain liklik, bos bilong em i ringim em bilong kisim save olsem i gat wanpela pait samting i bin kamap long dispela kibung. Dispela polisman i tokim bos: “Olgeta samting i orait; inap 5,000 manmeri i bung na i no gat kros na pait. Dispela i narakain tru. Tingim, mobail fon bilong mi i lus long dispela ples bung na ol i painim na givim bek long mi!”

Wanpela gad i amamas olsem ples i stap klin na em i kirap nogut tru olsem maski planti pikinini i stap long dispela bung, em i no inap painim wanpela liklik pipia olsem karamap bilong loli samting. Papa bilong narapela ples we ol i bin mekim kibung, em i bungim ol polisman em ol i bin kisim toksave olsem i gat wanpela bikpela bung bilong lotu. Em i kisim bikman bilong polis i go antap long veranda bilong namba 3 plua bilong wanpela haus we ol i ken lukim ples kibung, na em i tok: “Lukim ol dispela lain! Yu yet i ken luksave. Ol i mekim gut ol samting na bihainim stretpela pasin!” Papa bilong dispela ples i kirap nogut tru olsem ol Witnes i no dring alkohol o smok na ol i no lusim wanpela pipia i stap nabaut, i olsem i no gat man i bin stap long dispela hap, ol i karim tu ol pipia i go wantaim ol. Em i tok: “Dispela i olsem paradais!”

Pasin Wanbel Namel Long Lain Bilong God

Bihain long wanpela kibung i bin kamap long bus, bikman bilong wanpela viles i belgut tru na i tok: “Mi save olsem yupela i gat pasin daun tru, tasol yupela i gat bikpela strong. Mipela wan wan i save stap bilong mipela yet, tasol yupela inap mekim ol man i stap wanbel tru!” Kirap long Kaliningrad i go long Kamchatka, ol manmeri bilong dispela bikpela kantri i amamas tru long lukim lain bilong God i stap wanbel tru long ol bikpela bung bilong lotu bilong ol. Maski ol plen bilong ol i senis kwiktaim o i senis long taim ol i no ting, i gat wanpela samting i no save senis​—⁠em pasin bilong ol long rispektim ol bikman bilong gavman samting na rispektim ol narapela man.

Maski wanem wanem samting i kamap long ol, ol Witnes Bilong Jehova long Rasia i save amamas yet long bung wantaim bilong kisim skul long God. Ol i save beten na “tingim tu ol king na ol man i gat namba. Olsem bai [ol i] ken sindaun gut na i stap bel isi, na givim bel tru long God na stap stret.”​—⁠1 Timoti 2:⁠2.

[Rait long pes 27]

Wanpela Witnes husat i volantia bilong redim ples kibung

[Rait long pes 29]

Ol Witnes Bilong Jehova long Rasia i wok yet long “sindaun gut na i stap bel isi, na givim bel tru long God”

[Ol Piksa long pes 28]

Ol volantia i wok wantaim long klinim ples na redim kaikai bilong planti tausen man i kam long kibung

[Ol Piksa long pes 29]

Olgeta i amamas long harim gutpela program na tenkyu long hatwok bilong ol volantia