“Mipela i Laik Givim Long Bikpela”
TAIM narapela i mekim gutpela pasin long yu, yu save mekim wanem bilong kamapim tenkyu bilong yu? Tingim samting ol ofisa bilong ami bilong Israel i bin mekim bilong kamapim tenkyu bilong ol bihain long pait ol i mekim wantaim ol Midia. Dispela pait i bin kamap bihain long taim ol Israel i bin lotu long god giaman Bal bilong Peor. God i helpim ol manmeri bilong em long winim pait, na ol i tilim ol gutpela samting ol i bin kisim long pait i go long tupela lain. Wanpela lain i go long ol 12,000 soldia na wanpela lain i go long ol arapela Israel. Olsem Jehova i tokim ol long mekim, ol soldia i kisim hap bilong ol samting ol i kisim na givim long ol pris, na ol arapela Israel i kisim hap bilong ol samting ol i kisim na givim long ol Livai.—Nam. 31:1-5, 25-30.
Tasol ol ofisa bilong ami i laik mekim sampela samting moa. Ol i tokim Moses: “Bikman, mipela i kaunim olgeta soldia mipela i save bosim na i no gat wanpela i bin dai long pait.” Olsem na ol i tingting long bringim ol bilas gol ol i bin kisim na givim long Jehova. Hevi bilong ol dispela bilas gol em i klostu olsem 200 kilogram.—Nam. 31:49-54.
Long nau tu, bel bilong planti man i kirapim ol long soim olsem ol i tenkyu tru long ol gutpela samting God i bin mekim long ol. Tasol i no ol wokboi tasol i dediket pinis long God i gat dispela pasin bilong tenkyu, nogat. Tingim wanpela bas draiva husat i kisim wanpela lain Witnes i go i kam long stediam long wanpela intenesenel kibung i bin kamap long Bologna, Itali, long 2009. Em i draivim gut bas, olsem na dispela lain i kalap long bas ol i tingting long givim wanpela tenkyu kat long em na sampela mani bilong em yet, na buk Tru Tru Baibel i Tok Wanem? Draiva i tok: “Mi amamas long kisim kat na buk, tasol mi laik givim bek dispela mani, long wanem, mi laik givim olsem kontribiusen bambai yupela i ken mekim yet dispela wok yupela i save mekim. Maski mi no wanpela Witnes Bilong Jehova, mi laik givim dispela kontribiusen, long wanem, mi bin lukim pasin laikim i stap olsem as na yupela i mekim ol wok.”
Taim bel i pilim tru ol samting Jehova i bin mekim bilong helpim yu, wanpela rot we yu inap kamapim tenkyu bilong yu em long givim ol kontribiusen bilong helpim wok bilong ol Witnes Bilong Jehova long olgeta hap. (Mt. 24:14) Blok daunbilo i stori long sampela pasin em sampela i mekim bilong givim kontribiusen.
[Blok long pes 20, 21]
OL PASIN SAMPELA I MEKIM BILONG GIVIM
OL KONTRIBIUSEN BILONG HELPIM WOK LONG OLGETA HAP
Planti ol i save makim hamas mani ol i laik givim olsem kontribiusen na ol i save putim dispela mani i stap na taim ol i go long Haus Kingdom ol i putim long bokis kontribiusen i gat nem olsem “Kontribiusen Bilong Helpim Wok Long Olgeta Hap.”
Long olgeta mun, ol kongrigesen i save salim mani bilong dispela bokis kontribiusen i go long brens ofis bilong ol Witnes Bilong Jehova. Sapos yu laik, yu ken salim mani i go stret long International Bible Students Association of Papua New Guinea Inc., PO Box 636, Boroko, NCD 111. Yu ken givim sen o ring gol o narapela samting i gat bikpela pe bilong en olsem kontribiusen. Taim yu givim mani o narapela samting olsem, yu mas salim pas tu wantaim i tokaut klia olsem yu givim nating dispela samting olsem presen.
MAKIM KAIKAI SAMTING BILONG GIVIM
Yu ken makim sampela hap bilong ol samting yu kamapim long gaden o graun bilong yu bilong givim olsem kontribiusen, kain olsem kopi, kakau, kaukau, o kumu samting. O yu ken makim sampela kakaruk, pis, o wanpela pik, na givim olsem kontribiusen. Taim yu salim dispela samting, putim mani yu kisim long bokis kontribiusen o salim i kam stret long brens ofis.
GIVIM OLSEM DINAU
Yu ken givim mani olsem dinau, na sapos bihain yu sot na yu laik kisim bek dispela mani, yu ken kisim. Sapos yu laik kisim sampela save moa long dispela samting, yu ken salim pas i go long IBSA long atres i stap long han kais.
STRETIM ROT BILONG GIVIM
Yu ken givim mani olsem presen o olsem dinau, tasol i gat ol narapela rot bilong givim bambai yu inap helpim wok bilong Kingdom long olgeta hap. Em hia sampela rot:
Insurens: Sapos yu baim laip insurens, orait yu ken raitim nem bilong IBSA bambai ol i ken kisim dispela mani taim yu dai, o sapos yu baim insurens bilong kisim mani taim yu lapun na yu pinis long wok, orait yu ken raitim nem bilong IBSA bilong kisim dispela mani sapos yu dai taim yu no lapun yet.
Mani Long Beng: Sapos yu gat sampela mani long beng, yu ken bihainim lo bilong beng long hap bilong yu na pasim tok wantaim ol long givim dispela mani long IBSA bilong mekim wok long en taim yu stap laip yet o bilong kisim long taim yu dai.
Ol Sea Samting: Sapos yu gat sea samting long wanpela kampani, yu ken givim nating long IBSA olsem presen stret.
Haus o Graun Samting: Sapos yu gat haus o graun samting yu inap salim long ol man, yu ken givim long IBSA olsem presen stret, o bilong yu ken i stap long en i go inap long taim yu dai na nau IBSA i ken kisim tru. Sapos yu laik mekim olsem, gutpela sapos yu toksave long brens ofis long kantri bilong yu pastaim.
Raitim Pepa: Yu ken go long loya na raitim pepa na makim IBSA bilong kisim mani o haus samting bilong yu taim yu dai. O sapos i gat sampela mani samting long beng o narapela lain i holim na em bilong yu long kisim bihain, yu ken raitim pepa na tokaut olsem: Sapos yu dai paslain long taim bilong kisim dispela mani, orait ol i ken givim long IBSA. Long sampela kantri, sapos yu tok long givim mani olsem long wanpela lotu, bai yu abrusim sampela takis.
Olgeta manmeri i laik kisim save long rot bilong givim mani olsem mipela i stori long en, ol i mas salim pas i kam long International Bible Students Association of Papua New Guinea Inc., PO Box 636, Boroko, NCD 111. Telefon: 325 3011.