Jisas​—⁠Ol Wok Em i Mekim

“Kaikai bilong mi em long mekim laik bilong man i bin salim mi i kam na long inapim wok em i givim long mi.”​—JON 4:⁠34.

TOK Jisas i mekim antap i kamapim klia wanem samting i bikpela samting long i stap bilong em. Long moning olgeta Jisas na ol disaipel bilong em i bin raun long ples maunten bilong Samaria. (Jon 4:​6, futnot) Ol disaipel i tingting olsem ating nau Jisas i mas hangre, olsem na ol i laik givim sampela kaikai long em. (Jon 4:​31-33) Long bekim bilong em, Jisas i kamapim klia em i stap bilong mekim wanem. Pasin bilong mekim wok bilong God em i bikpela samting tru long Jisas, winim kaikai. Long ol tok na ol wok bilong em, Jisas i soim olsem em i stap bilong mekim laik bilong God. Wanem samting i insait long dispela?

▪ Autim tok na skulim ol man long Kingdom Bilong God Baibel i tok long namba wan wok Jisas i mekim olsem: “Jisas i go long olgeta hap bilong Galili na em i skulim ol manmeri . . . [na] autim gutnius bilong Kingdom.” (Matyu 4:23) Jisas i autim tok bilong Kingdom Bilong God long ol narapela. Na i no dispela tasol, nogat, em i skulim tu ol man​—⁠olsem kamapim gut insait bilong ol tok, na long dispela rot em i helpim ol long bilip. Kingdom em i nambawan bikpela tok Jisas i bin autim.

Taim Jisas i autim tok, em i skulim ol man long Kingdom Bilong God em i wanem samting na ol wok Kingdom bai mekim. Tingim ol tok i tru bilong Kingdom na ol ves bilong Baibel i kamapim ol tok bilong Jisas long dispela.

▪ Kingdom Bilong God em wanpela gavman long heven, na Jisas em i dispela man Jehova i bin makim olsem King.​—MATYU 4:​17; JON 18:⁠36.

▪ Kingdom bai mekim holi nem bilong God na kamapim laik bilong em long graun olsem i save kamap long heven.​—MATYU 6:​9, 10.

▪ Taim Kingdom i bosim graun, graun olgeta bai kamap wanpela gutpela ples paradais.​—LUK 23:​42, 43.

▪ Klostu nau Kingdom Bilong God bai kamapim laik bilong God long graun.a​—MATYU 24:​3, 7-​12.

▪ Mekim ol strongpela wok Planti man i save long Jisas olsem “Tisa.” (Jon 13:13) Tasol insait long 3 na hap yia bilong wok bilong em, em i bin mekim tu planti strongpela wok. Dispela wok i kamapim tupela bikpela samting. Namba wan, dispela i kamapim long ples klia olsem God i salim em i kam. (Matyu 11:​2-6) Namba tu, ol dispela wok i olsem piksa na i makim bikpela wok moa em bai mekim taim em i stap King long Kingdom Bilong God. Tingim sampela mirakel em i bin wokim.

▪ Em i mekim win na raunwara i stap isi.​—MAK 4:​39-​41.

▪ Em i oraitim ol man i gat sik, olsem ol aipas, yaupas, na ol man em han na lek bilong ol i nogut.​—LUK 7:​21, 22.

▪ Em i kamapim planti kaikai na givim long bikpela lain manmeri i hangre i stap.​—MATYU 14:​17-​21; 15:​34-​38.

▪ Inap 3-pela taim, em i kirapim bek man i dai pinis.​—LUK 7:​11-​15; 8:​41-​55; JON 11:​38-​44.

Piksaim long tingting, laip bilong ol man long graun bai i stap olsem wanem aninit long dispela strongpela King!

▪ Kamapim ol pasin bilong God Jehova I no gat narapela inap skulim gut ol man long Jehova olsem Pikinini Bilong God yet; bihain em i kisim nem Jisas Krais. Jisas em i “fesbon bilong olgeta samting God i bin wokim,” na em i stap wantaim Jehova long heven longpela taim tru, winim olgeta narapela ensel. (Kolosi 1:15) Jisas i gat rot long save gut long tingting bilong Papa bilong em, na kisim save long laik, ol lo, na pasin bilong Em.

Olsem na Jisas inap tok: “I no gat wanpela man i save gut long Pikinini, nogat, Papa tasol i save. Na i no gat wanpela man i save gut long Papa, nogat, Pikinini tasol i save, na man em Pikinini i gat laik long soim Papa long em, em tasol i save.” (Luk 10:22) Taim em i stap long graun olsem wanpela man, Jisas i givim bel tru na i amamas long kamapim klia pasin bilong Papa bilong em long ol narapela. Taim Jisas i toktok long ol man na em i skulim ol, em i tingim bek ol samting em i bin lain long en taim em i stap long heven wantaim God Antap Tru.​—⁠Jon 8:⁠28.

Pasin bilong Jisas long kamapim klia Papa bilong em long ol narapela i kain olsem wok bilong wanpela elektrik trensfoma. Dispela masin i save kisim pawa i strong tru na bihain salim pawa i stret long ol man i ken mekim wok long en. Taim Jisas i stap long graun, Jisas i tingim ol samting em i bin lain long Papa bilong em long heven, na em i kamapim ol dispela samting long ol man i stap long graun long pasin em ol man i ken kisim gut na bihainim.

Tingim tupela bikpela rot em Jisas i bin mekim wok long en bilong kamapim Papa bilong em long ol man.

▪ Long wok tisa bilong em, Jisas i skulim ol man long tok i tru bilong Jehova​—⁠olsem nem bilong Em, ol samting Em i tingting pinis long mekim, na ol pasin bilong Em.​—JON 3:16; 17:​6, 26.

▪ Long ol pasin bilong em, Jisas i kamapim klia ol gutpela pasin bilong Jehova. Jisas i bihainim tru ol pasin bilong Papa bilong em, olsem na em inap tok: “Man i lukim mi, em i lukim Papa tu.”​—JON 5:19; 14:⁠9.

Yumi kirap nogut long ol wok Jisas i mekim. Yumi ken kisim gutpela helpim sapos yumi skelim as na em i dai, na yumi mekim ol samting i stret wantaim save yumi kisim.

[Futnot]