Skulim Ol Pikinini Bilong Yu

Sampela Taim Yu Pilim Olsem Yu Stap Wanpis na Yu Pret?

PLANTI man long nau i pilim olsem ol i stap wanpis; ol i pilim olsem i no gat man i save tingim tru ol. Ol lapun i save pilim moa yet dispela samting. Tasol planti pikinini long nau, na ol pikinini husat i save mekim wok bilong God, ol tu i pilim olsem ol i stap wanpis na ol i pret. Yu save bilong wanem i olsem?—a

I gat planti as long dispela. Yumi ken tingim wanpela man husat i bin stap long bipo tru—klostu wan tausen yia paslain long mama i karim Jisas. Nem bilong em Elaija. Em i bin stap taim lain Israel i no laik mekim moa wok bilong lotuim trupela God, Jehova. Planti i kirap lotuim giaman god Bal. Elaija i tok: “Mi wanpela tasol i stap.” Tasol yu ting tru tru Elaija wanpela tasol i mekim yet wok bilong Jehova?—

Maski Elaija i no luksave long dispela, sampela narapela man bilong Israel i lotuim yet trupela God. Tasol ol i pret. Yu save bilong wanem ol i pret?—

Ahap, king bilong ol Israel, i no bin lotuim Jehova; em i save lotuim Bal, em giaman god bilong meri bilong em, Jesebel. Olsem na Ahap na meri bilong em i wok long painim ol man i lotuim Jehova bilong kilim ol i dai, na moa yet ol i laik kilim i dai Elaija. Dispela em i as na Elaija i ranawe. Em i go longwe inap olsem 483 kilomita long ples drai long maunten Horep, em Baibel i kolim tu olsem maunten Sainai. Long dispela hap, inap sampela handret yia paslain long taim bilong Elaija, Jehova i bin givim Tenpela Lo na ol narapela lo bilong em. Elaija i stap wanpis na hait long wanpela hul bilong ston long Horep. Yu ting Elaija i mas pret?—

Baibel i soim olsem paslain long dispela, Jehova i bin yusim Elaija long wokim ol strongpela mirakel. Wanpela taim Jehova i bin harim beten bilong Elaija long salim paia i kam daun long heven na kukim ofa long alta. Long dispela rot Jehova i kamapim klia olsem Em i trupela God, na i no Bal. Nau, taim Elaija i hait long hul bilong ston, Jehova i toktok long em.

Jehova i askim Elaija: “Bilong wanem yu stap hia?” Na Elaija i tok, ‘Mi wanpela tasol bilong ol man i save lotuim yu i stap.’ Long gutpela pasin Jehova i stretim Elaija na i tok: ‘Mi gat yet 7,000 manmeri i lotuim mi i stap.’ Jehova i tokim Elaija long em i mas go bek, long wanem, em i gat sampela wok moa bilong Elaija long mekim.

Yu ting yumi inap kisim wanem skul long stori bilong Elaija?— Sampela taim ol man i lotuim Jehova ol tu i save pret. Olsem na yumi olgeta, ol yangpela na ol bikpela man, yumi mas askim Jehova long helpim yumi. Baibel i tok promis olsem: “Wanem ol manmeri i save bel tru na i singaut long [God], em i save stap klostu long ol.”

I gat narapela skul tu yumi inap kisim: Yumi gat planti brata na sista long olgeta hap em ol i laikim tru Jehova na laikim tru yumi. Baibel i tok: “Ol wanbilip bilong [yumi] i stap long olgeta hap bilong graun, ol i karim wankain pen na hevi olsem [yumi].” Olsem wanem? Yu amamas long save olsem yu no stap wanpis?—

Ritim long Baibel bilong yu

1 King 19:3-18

Lo 5:1-22

Song 145:18

1 Pita 5:9

[Futnot]