“Yu Ting Ol Man Bai Bagarapim Dispela Graun?”

● Taim yu stap long ples antap na lukluk i kam daun, graun i luk olsem wanpela naispela blupela na waitpela bis i dia tumas. Tasol taim yu lukluk i go klostu, bai yu luksave olsem ples bilong yumi i laik bagarap. Bilong wanem? I no hatwok long bekim dispela askim: Ol manmeri i sindaun long en ol i no lukautim gut ples. Ol i wok long bagarapim ol samting bilong graun olsem win na wara, pinisim bikbus na ol risos, na tu, ol man i no bihainim stretpela pasin, ol i pait nabaut, kilim man i dai, mekim pasin pamuk, na ol i no tingting long pas gut wantaim God.

Inap 2,000 yia i go pinis, Baibel i bin mekim sampela bikpela tok profet long dispela samting nogut i wok long kamap long graun. (2 Timoti 3:​1-5; Revelesen 11:18) Baibel i bin tok profet tu olsem God​—⁠na i no ol man​—⁠bai stretim bek olgeta dispela samting. Pablik tok “Yu Ting Ol Man Bai Bagarapim Dispela Graun?” bai stori long ol dispela bikpela tok. Dispela tok bai kamap long ol ‘Kingdom Bilong God i Mas i Kam!’ Kibung Distrik bilong ol Witnes Bilong Jehova, ol i kirap long Me long Amerika na i go moa long olgeta hap bilong graun.

Mipela i laik singautim yu long kam long wanpela kibung i kamap klostu long hap bilong yu. Bilong kisim sampela save moa, yu ken toktok wantaim ol Witnes Bilong Jehova long hap bilong yu o raitim pas i go long lain bilong wokim dispela nius. Long Web sait www.jw.org i gat ol det bilong ol kibung distrik long Papua Niugini.