SAMPELA yia i go pinis, Rúbia (1), wanpela sista nau em i gat 30 krismas, i go long lukim Sandra (2), em wanpela painia i stap long wanpela liklik kongrigesen long sauten Brasil. Taim Rúbia i go visitim Sandra, wanpela samting i kamap na i kirapim tru tingting bilong Rúbia. Em wanem samting? Yumi ken skelim stori em Rúbia yet i mekim.
“MI KIRAP NOGUT STRET TAIM MI HARIM DISPELA TOK”
“Sandra i kisim mi go wantaim em long lukim wanpela meri em i stadi wantaim em long Baibel. Taim mipela i stadi i stap, dispela meri i tok: ‘Sandra, 3-pela meri long ples wok bilong mi ol i laik long stadi long Baibel, tasol mi tokim ol olsem ol i mas wet inap long taim bilong ol i kamap. Mi save olsem yu bisi tru long dispela yia.’ Mi kirap nogut stret taim mi harim dispela tok. Ol man i laik save long Jehova i mas wet inap long taim bilong ol i kamap! Long kongrigesen mi stap long en, i hatwok tru long painim wanpela husat i laik stadi. Long dispela taim stret, long haus bilong dispela Baibel stadi, mi pilim olsem mi gat bikpela laik tru long helpim ol lain i stap long dispela liklik taun. Bihain liklik mi lusim bikpela taun mi stap long en na mi go sindaun long liklik taun em Sandra i mekim wok painia long en.”
Wanem gutpela samting i kamap long Rúbia? Em i tok: “Mi go stap long dispela liklik taun na insait long 2-pela mun mi kisim 15 Baibel stadi, na wankain olsem Sandra, i no longtaim na mi tu mi gat sampela husat i laik stadi, tasol mi no gat taim long stadi wantaim ol!”
SKELIM GEN WOK AUTIM TOK BILONG EM
Diego (3), wanpela brata i gat 22 krismas samting i go lukim sampela painia long Prudentópolis, em wanpela liklik taun long sauten Brasil. Dispela raun bilong em i kirapim em long skelim gen wok bilong em long autim tok. Em i tok: “Long kongrigesen bilong mi, mi no givim bel tumas long autim tok na mi save lusim sampela aua tasol long olgeta mun long autim tok. Tasol taim mi visitim ol dispela painia na harim ol ekspiriens bilong ol, mi inap pilim bikpela amamas ol i kisim long wok autim tok. Taim mi lukim olsem ol i amamas tru long ol wok ol i mekim, mi tu mi laik kisim wankain amamas olsem ol.” Bihain long dispela raun bilong em, Diego i kirap mekim wok painia.
Yu tu yu pilim wankain olsem Diego? Yu wanpela yangpela Witnes na yu save go autim tok na go long ol miting Kristen, tasol long wankain taim yu pilim olsem wok autim tok i kamap samting yu save mekim olgeta taim na i no gat amamas bilong en? Sapos olsem, yu ting yu inap mekim sampela senis long i stap bilong yu bambai yu inap kisim amamas long mekim wok long ol hap we i sot tru long ol pablisa bilong autim tok bilong Kingdom? Tru, yu inap pilim olsem i hatwok long lusim gutpela sindaun bilong yu. Tasol planti yangpela i bin mekim olsem. Ol i bin senisim ol mak ol i laik winim na ol laik bilong ol bambai ol inap mekim bikpela wok moa long wok bilong Jehova. Yumi laik stori tu long narapela husat i stap gutpela piksa, em Bruno.
SAVEMAN O WOKMAN?
Sampela yia i go pinis, Bruno (4), nau em i gat 28 krismas, em i bin skul long wanpela bikpela skul bilong musik, na em i gat laik long kamap kondakta long lain bilong pilaim musik. Em i kisim gut skul, olsem na ol i bin singautim em long go long mekim wok olsem kondakta long sampela bikpela bung bilong pilaim musik. Rot i op long em inap kisim wok i gat biknem na bikpela pe. Tasol Bruno i tok: “Mi pilim olsem laip bilong mi i sot long wanpela samting. Mi bin dediketim mi yet long Jehova, tasol mi save olsem mi no bin givim bel olgeta long mekim wok bilong em, na dispela i mekim na bel bilong mi i gat tok. Mi beten na toktok wantaim Jehova, na mi toktok tu wantaim ol brata long kongrigesen em ol i stap planti yia long tok i tru. Mi tingim na skelim gut ol samting na mi putim wok autim tok i stap namba 1, mi lusim musik skul na go mekim wok long hap we i sot long ol man bilong autim tok bilong Kingdom.” Disisen bilong em i kirapim em long mekim wanem?
Bruno i go stap long wanpela taun ol i kolim Guapiara (populesen bilong en em 7,000), em i stap olsem 260 kilomita longwe long biktaun São Paulo. Em wanpela bikpela senis. Em i tok: “Mi go stap long wanpela liklik haus we i no gat frits, TV, o rot bilong kisim Intenet. Tasol dispela haus i gat ol samting mi no bin gat bipo, i gat gaden bilong ol kumu samting na ol prut diwai!” Taim Bruno i stap long dispela liklik kongrigesen, wanpela taim long olgeta wik em i save pulapim beg bilong em long kaikai, wara, na ol buk na nius na kalap long motobaik bilong em na i go autim tok long ol hap i stap ausait long taun. Planti man long dispela hap i no bin harim gutnius bipo. Em i tok: “Mi lukautim 18 Baibel stadi. Taim mi lukim ol dispela stadi i mekim ol senis long laip bilong ol, mi kisim bikpela amamas tru!” Em i tok tu olsem: “Long dispela taim, mi luksave olsem mi painim pinis samting mi sot long en—amamas tru i kam long pasin bilong putim ol wok bilong Kingdom i stap namba 1. Mi no inap kisim dispela kain amamas sapos mi bin tingting tasol long bungim mani kago.” Taim Bruno i stap long Guapiara, em i kisim mani we bilong lukautim em yet? Em i smail na tok: “Mi skulim ol man long pilaim gita.” Em i stap yet olsem saveman bilong kain kain samting.
“MI STAP YET WANTAIM OL”
Mariana (5) i gat 28 krismas samting na em tu i pilim wankain olsem Bruno. Mariana i wanpela loya, tasol maski em i gat gutpela wok mani, em i no stap amamas. Em i tok: “Mi pilim olsem mi wok long ‘ran i go bilong holimpas win.’” (Sav. 1:17) Sampela bratasista i bin kirapim em long mekim wok painia. Mariana i skelim dispela samting, na bihain em wantaim ol pren bilong em Bianca (6), Caroline (7), na Juliana (8), i wokim disisen long helpim wanpela kongrigesen long Barra do Bugres, em wanpela liklik taun klostu long Bolivia, planti tausen kilomita longwe long ples bilong ol. Wanem samting i kamap bihain?
Mariana i tok: “Mi bin tingting long stap long dispela hap inap 3-pela mun. Tasol long pinis bilong dispela haptaim, mi mekim 15 Baibel stadi! Ol dispela sumatin i mas kisim sampela moa helpim long save gut long tok i tru. Olsem na i hatwok long mi tokim ol olsem mi bai lusim ol. Dispela i mekim na mi no laik lusim ol, mi stap yet wantaim ol.” Olgeta 4-pela sista i bin mekim olsem. Olsem wanem? Nupela wok bilong Mariana i mekim laip bilong em i gat as bilong en? Em i tok: “Jehova i yusim mi long helpim ol arapela long senisim sindaun bilong ol na mekim i kamap gutpela moa, na dispela i givim mi bikpela amamas. Mi save olsem mi mekim wok long taim na strong bilong mi long mekim wanpela gutpela wok tru, na mi tingim dispela olsem wanpela blesing.” Caroline i mekim tok we i kamapim tingting bilong olgeta 4-pela sista, em i tok: “Taim mi slip long nait, bel bilong mi i stap isi tru, long wanem, mi bin givim bel tru long mekim wok bilong Kingdom. Olgeta taim mi tingting long olsem wanem mi inap helpim ol Baibel sumatin bilong mi. Em i gutpela samting tru long lukim olsem ol i wok long winim ol mak. Mi lukim truim bilong dispela tok: ‘Yupela yet i mas traim na lukim na bai yupela i save olsem Bikpela i gutpela tru.’”—Sng. 34:8.
Yumi ken ting olsem Jehova i amamas tru taim em i lukim olsem planti yangpela bratasista long olgeta hap bilong graun i givim bel long ‘go na helpim’ wok bilong autim gutnius bilong Kingdom long ol ples i stap longwe long ol biktaun! (Sng. 110:3; Snd. 27:11) Olgeta bratasista husat i mekim olsem, ol i pilim tru ol blesing i kam long Jehova.—Snd. 10:22.
