“Yupela i Mas i Go Klostu Tru Long God, na Em Bai i Kam Klostu Tru Long Yupela”
Paslain na Bihain—Em i Kisim Strong Bilong Senis
SANDRA, em wanpela meri i stap long Meksiko, em i tok long em yet i olsem wanpela samting nogut long ai bilong famili bilong em. Ol i les long em na ol i no laikim em na dispela i bagarapim i stap bilong em taim em i yangpela. Sandra i tok: “Long taim mi stap yangpela, mi pilim olsem mi stap bilong mekim nating tasol, na mi no save long as na mi stap laip na as bilong i stap bilong ol man.”
Taim em i stap long haiskul, Sandra i kirap long dring wain em papa bilong em i putim long haus. Bihain, em i baim wain bilong em yet na em i kamap meri bilong dring ol strongpela dring. Em i tok: “Mi no gat tingting long i stap laip.” Em i bel hevi tru, olsem na Sandra i kirap kisim ol drak. Em i tok: “Wanpela samting tasol i helpim mi long lusim tingting long ol hevi bilong mi, em ol samting mi karim raun long paus bilong mi: wanpela botol strongpela dring, sampela drak, o mariwana.”
Taim Sandra i pinisim skul bilong kamap dokta samting, em i go insait moa long pasin bilong dring olgeta taim. Em i traim long kilim em yet i dai. Tasol em i stap laip.
Sandra i go long planti lotu bilong kisim helpim long samting bilong spirit na long strongim bel na tingting bilong em, tasol dispela i no helpim em. Em i pilim olsem em i no gat gutpela samting bilong wetim na em i bel hevi, olsem na em i save krai planti taim long God na tok: “Yu stap we? Bilong wanem yu no laik helpim mi?” Dispela tingting olsem em i no gutpela samting i daunim em tru, na long dispela taim wanpela Witnes Bilong Jehova i toktok wantaim em. Na em i kirap stadi long Baibel. Taim Sandra i kisim save olsem “God i save stap klostu long ol manmeri i gat hevi,” bel bilong em i pilim tru dispela tok.—Song 34:18.
Meri i stadi wantaim Sandra long Baibel i helpim em long save, God Jehova i save olsem yumi gat pasin kranki em sin bilong Adam i bin kamapim, olsem na yumi no inap mekim stret olgeta samting. Sandra i luksave olsem God i save olsem yumi no inap winim mak bilong bihainim stret ol stretpela lo bilong em. (Song 51:5; Rom 3:23; 5:12, 18) Em i amamas long save olsem Jehova i no save lukluk tasol long ol pasin kranki bilong yumi, na em i no laik yumi mekim samting i winim skel bilong yumi. Man bilong raitim song i tok: “Sapos yu kaunim olgeta sin bilong mipela bai husat inap long winim kot bilong yu?”—Song 130:3.
Wanpela bikpela tok i tru bilong Baibel i mekim isi bel bilong Sandra, em ofa bilong Jisas Krais. Long rot bilong dispela ofa, Jehova i marimari na i tingim ol man i bihainim tok olsem ol gutpela manmeri maski ol i gat sin. (1 Jon 2:2; 4:9, 10) Em nau, God bai “lusim olgeta sin bilong yumi,” na em bai i helpim yumi long winim ol tingting olsem yumi nogut.—Efesus 1:7.
Sandra i lainim planti gutpela samting long stori bilong aposel Pol. Pol i bin amamas tru long gutpela pasin bilong God long lusim ol rong em i bin mekim bipo na i bin helpim em long pait bilong daunim ol pasin kranki bilong em. (Rom 7:15-25; 1 Korin 15:9, 10) Pol i senisim laip bilong em, na em i ‘paitim tru bodi bilong em na mekim em i bihainim laik bilong em’ bambai em i ken wokabaut yet long rot God i laikim. (1 Korin 9:27) Em i no larim ol laik nogut bilong skin i bosim em.
Ol pasin kranki bilong Sandra i givim bikpela hevi long em, tasol em i pait long daunim. Em i beten strong long kisim helpim long Jehova long daunim ol dispela pasin na askim em long marimari long em. (Song 55:22; Jems 4:8) Taim em i save olsem God i tingim em, Sandra i senisim ol pasin bilong em. Em i tok: “Nau mi amamas long skulim ol narapela long Baibel fultaim.” Sandra i bin mekim gutpela wok long helpim bikpela susa na liklik susa bilong em long kisim save long Jehova. Taim em i wok long “mekim gutpela pasin,” em i volantia tu long mekim wok long save bilong em long wok dokta samting long ol kibung bilong ol Witnes Bilong Jehova.—Galesia 6:10.
Olsem wanem long ol samting i bin kalabusim Sandra? Sandra i tok: “Nau tingting bilong mi i klia. Mi no moa dring, smok, o kisim drak. I no olsem mi mas kisim ol dispela samting. Mi painim pinis samting mi wok long painim.”
[Rait long pes 9]
“Mi painim pinis samting mi wok long painim”
[Blok long pes 9]
Ol Stiatok i Mekim Wok
Daunbilo em sampela stiatok bilong Baibel i bin helpim planti man long lusim ol pasin nogut i bin kalabusim ol:
“Yumi mas rausim olgeta pasin doti bilong bodi na bilong spirit, na yumi mas kamap klin olgeta long ai bilong God. Na yumi mas pret na aninit long God na yumi mas givim yumi yet olgeta long God na bihainim tru pasin holi oltaim.” (2 Korin 7:1) Ol man husat i lusim pasin doti na i kamap klin, na ol i abrusim ol pasin i no klin, em dispela kain man God i givim blesing long ol.
“Man i save aninit long Bikpela, em i no save laikim tru ol pasin nogut.” (Sindaun 8:13) Pasin bilong pret long God i helpim man long lusim ol pasin nogut, na pasin bilong kisim drak tu. Dispela i amamasim Jehova, na tu, dispela man husat i lusim pasin doti em inap abrusim ol sik nogut.
‘Stap aninit long ol king na ol gavman, na bihainim tok bilong ol.’ (Taitus 3:1) Long planti hap, pasin bilong holim o mekim wok long sampela kain drak, i brukim lo bilong gavman. Ol trupela Kristen i no save holim o mekim wok long ol drak em gavman i tambuim.