Ol Manmeri Em “Bel Bilong Ol i Gutpela Tru” Ol i Harim na Bilip
‘Ol manmeri em bel bilong ol i gutpela tru na God i bin makim bilong kisim laip i stap gut oltaim, dispela ol manmeri i bilip.’—AP. 13:48.
1, 2. Ol Kristen bilong bipo i mekim wanem taim ol i harim tok profet bilong Jisas olsem ol man bai autim gutnius long olgeta hap bilong graun?
BUK Aposel long Baibel i kamapim stori bilong ol Kristen bilong bipo long ol i mekim wanem taim ol i harim tok profet bilong Jisas olsem ol man bai autim gutnius bilong Kingdom long olgeta hap bilong graun. (Mt. 24:14) Ol man bilong givim bel long wok autim tok, ol i stap gutpela piksa long olgeta man i bihainim ol. Ol disaipel bilong Jisas i wok strong long autim tok long Jerusalem, olsem na planti tausen manmeri, na “planti pris tu” i kam insait long kongrigesen long taim bilong ol aposel.—Ap. 2:41; 4:4; 6:7.
2 Ol misineri bilong bipo i bin helpim planti man long kamap Kristen. Olsem: Filip i go long Samaria we ol manmeri i putim gut yau long tok bilong em. (Ap. 8:5-8) Pol i raun long planti hap wantaim narapela narapela poroman. Em i autim ol tok bilong Krais long Saiprus, long sampela hap bilong Esia Maina, Masedonia, Grik, na Itali. Long ol taun em i autim tok long en, planti Juda na Grik i kamap bilipman. (Ap. 14:1; 16:5; 17:4) Taitus i autim tok long Krit. (Ta. 1:5) Pita i mekim wok long Babilon, na taim em i raitim namba wan pas bilong em long 62-64 C.E. samting, ol man long Pontus, Galesia, Kapadosia, Esia, na Bitinia, ol i save gut pinis long wok bilong ol Kristen. (1 Pi. 1:1; 5:13) Man! Em i wanpela bikpela taim tru! Ol dispela Kristen long taim bilong ol aposel i givim bel tru long wok autim tok, olsem na ol birua i tok ol i “kamapim hevi long olgeta hap graun.”—Ap. 17:6, NW; Ap. 28:22.
3. Wok bilong lain i autim tok bilong Kingdom i kamapim wanem kain kaikai long nau? Dispela i kirapim yu long pilim olsem wanem?
3 Long nau tu, kongrigesen Kristen i go bikpela tru. Olsem wanem? Em i strongim bel bilong yu long ritim ripot bilong yia bilong ol Witnes Bilong Jehova na lukim gutpela kaikai wok autim tok i bin kamapim long olgeta hap? Yu amamas tru long save olsem ol man bilong autim tok bilong Kingdom i bin mekim inap olsem 6 milion Baibel stadi long sevis yia bilong 2007? Na tu, las yia namba bilong ol man i kam long Memorial bilong tingim dai bilong Jisas Krais i soim olsem inap olsem 10 milion manmeri em ol i no Witnes Bilong Jehova, ol i gat laik long save long gutnius na dispela i bin kirapim ol long kam long dispela bikpela bung. Dispela i soim olsem i gat bikpela wok i stap yet.
4. Husat i wok long harim na bilip long tok bilong Kingdom?
4 Long nau, olsem long taim bilong ol aposel, ‘ol manmeri em bel bilong ol i gutpela tru na God i bin makim bilong kisim laip i stap gut oltaim’ ol i harim na bilip long tok i tru. (Ap. 13:48) Jehova i wok long pulim ol kain man olsem i kam insait long oganaisesen bilong em. (Ritim Aisaia 2:2.) Yumi mas holimpas wanem kain tingting long wok autim tok bambai yumi ken mekim gut dispela wok bilong bungim ol lain man?
Autim Tok Long Olgeta Kain Man
5. Jehova i save laikim wanem kain man?
5 Ol Kristen long taim bilong ol aposel i save olsem “God i save mekim wankain pasin long olgeta manmeri, maski ol i bilong wanem lain. Long olgeta lain em i save laikim ol manmeri i aninit long em na i mekim stretpela pasin.” (Ap. 10:34, 35) Bilong man i ken pas gut wantaim Jehova, em i mas bilip long ofa bilong Jisas long baim bek ol man. (Jo. 3:16, 36) Na em i laik bilong Jehova long “kisim bek olgeta manmeri, bai ol i ken save long as bilong tok tru.”—1 Ti. 2:3, 4.
6. Ol lain bilong autim tok bilong Kingdom i no ken mekim wanem samting? Bilong wanem i olsem?
6 I no stret long ol man i autim gutnius i skelim ol man long skin kala, namba, lukluk, lotu, o long narapela samting i mekim na ol i narapela kain long planti man. Tingim: Ating yu amamas tru long namba wan man i bin tokim yu long ol tok i tru bilong Baibel, na em i no bin skelim yu. Na olsem tasol, yumi no ken surik long autim tok i helpim man long kisim laip long olgeta man i laik harim.—Ritim Matyu 7:12.
7. Bilong wanem yumi no ken skelim ol man yumi autim tok long ol?
7 Jehova i bin makim Jisas long mekim wok Jas, olsem na yumi no gat rait long skelim ol narapela. Dispela i stret, long wanem, yumi inap skelim man long “ol samting [yumi] lukim long ai tasol” o “long toktok [yumi] harim,” tasol Jisas i save long tingting i stap long bel bilong man.—Ais. 11:1-5; 2 Ti. 4:1.
8, 9. (a) Paslain long Sol i kamap wanpela Kristen, em i wanem kain man? (b) Stori bilong aposel Pol i mas lainim yumi long wanem samting?
8 Kain kain manmeri i bin kamap wokman bilong Jehova. Wanpela i stap gutpela piksa tru long dispela em Sol bilong Tarsus, bihain em i kisim nem aposel Pol. Sol i wanpela Farisi, na em i birua tru long ol Kristen. Em i bilip tru olsem lotu bilong ol i no stret na dispela i kirapim em long mekim nogut tru long kongrigesen Kristen. (Ga. 1:13) Long tingting bilong ol man, em i no inap tru long kamap wanpela Kristen. Tasol Jisas i lukim sampela gutpela pasin i stap long bel bilong Sol na i makim em long mekim wanpela bikpela wok. Olsem na Sol i kamap wanpela memba bilong kongrigesen Kristen long bipo i givim bel tru long wok autim tok.
9 Stori bilong aposel Pol i lainim yumi long wanem samting? Ating long teritori bilong yumi i gat sampela man em yumi ting ol i no laikim tru tok yumi autim. Maski i luk olsem i no gat wanpela bilong ol inap kamap Kristen tru, yumi no ken surik long traim long toktok gut wantaim ol. Sampela taim ol man yumi ting ol i no inap tru long harim tok yumi autim, ol dispela man i harim. Yumi gat wok long autim tok yet long olgeta man na yumi “no lusim wok.”—Ritim Aposel 5:42.
Ol Man i “No Lusim Wok” Autim Tok Bai Kisim Blesing
10. Bilong wanem yumi no ken surik long autim tok long ol man em yumi inap pret long ol? Kamapim sampela ekspiriens i bin kamap long hap bilong yupela.
10 Samting yumi lukim long ai em inap giamanim yumi. Olsem: Ignacioa i kirap stadi long Baibel wantaim ol Witnes Bilong Jehova taim em i stap long kalabus long wanpela kantri long Saut Amerika. Ol man i pret long em, long wanem, em i man bilong pait na bagarapim narapela. Olsem na ol wankalabus husat i save wokim ol samting na salim long ol narapela kalabusman, ol i askim Ignacio long pretim ol man i gat dinau long ol na bai ol i bekim dinau. Tasol taim Ignacio i wok long kamap strong na bihainim ol tok em i lainim, dispela man bilong pait i kamap man bilong mekim gutpela pasin. Ol man i no askim em moa long subim ol man long bekim dinau bilong ol, tasol Ignacio i amamas long tok i tru bilong Baibel na spirit bilong God i bin senisim pasin bilong em. Em i amamas tu long ol man bilong autim tok bilong Kingdom i no bin skelim em na ol i bin wok strong long stadi wantaim em.
11. Bilong wanem yumi wok long go bek lukim ol man?
11 Sindaun na tingting bilong ol man inap senis na i save senis, na dispela em i wanpela as na yumi wok long go bek lukim ol man em yumi bin toktok wantaim ol long gutnius. Sampela em yumi bin bungim ol long bipo, ating nau bikpela sik i painim ol, o ol i no gat wok mani moa, o wanpela long famili i dai. (Ritim Saveman 9:11.) Ol samting i wok long kamap long graun inap kirapim ol man long tingting long taim bihain. Ol dispela kain samting inap mekim na man em bipo i bin les long harim tok—o i bin birua long yumi—nau em bai i gat laik long harim tok yumi autim. Olsem na yumi no ken surik long autim gutnius long ol narapela man taim rot i op.
12. Yumi mas ting olsem wanem long ol man yumi autim tok long ol? Bilong wanem yumi mas ting olsem?
12 Em pasin bilong yumi ol man long skelim skelim pasin bilong narapela. Tasol Jehova i save lukim pasin bilong yumi olgeta wan wan. Em i lukim ol gutpela pasin bilong olgeta wan wan man. (Ritim 1 Samuel 16:7.) Yumi mas mekim wankain pasin taim yumi autim tok. Planti ekspiriens i soim ol gutpela samting i kamap taim yumi gat stretpela tingting long ol man yumi autim tok long ol.
13, 14. (a) Bilong wanem wanpela painia i kisim tingting kranki long wanpela meri em i bungim long wok autim tok? (b) Dispela ekspiriens inap skulim yumi long wanem samting?
13 Sandra, wanpela painia sista, em i autim tok long ol haus long wanpela ailan bilong Karibian, taim em i bungim Ruth husat i save insait tru long wanpela bikpela bung bilong amamas. Inap tupela taim ol i bin makim Ruth olsem kwin bilong dispela bung. Em i gat bikpela laik long kisim save long tok Sandra i autim, olsem na tupela i pasim tok long stadi long Baibel. Sandra i tok: “Taim mi wokabaut i go insait long haus bilong em, mi lukim traipela piksa bilong Ruth i werim ol klos na bilas bilong dispela bikpela bung, na ol prais em i bin winim. Mi kisim tingting kranki olsem dispela kain meri husat i gat nem na i insait tru long bikpela bung bilong amamas, em i no inap laikim tok i tru inap longpela taim. Olsem na mi no go moa lukim em.”
14 Bihain liklik, Ruth i kam long Haus Kingdom, na taim miting i pinis, em i askim Sandra, “Bilong wanem yu no kam moa na stadi wantaim mi?” Sandra i tok sori na i stretim rot bilong kirapim gen stadi. Ruth i kamap strong hariap. Em i rausim ol piksa we em i werim ol klos na bilas bilong bikpela bung bilong amamas, em i kirap long kam long olgeta miting bilong kongrigesen na mekim wok autim tok, na dediketim laip bilong em long Jehova. Na Sandra i luksave olsem pastaim em i bin kisim tingting kranki long Ruth.
15, 16. (a) Wanem samting i kamap taim wanpela pablisa i autim tok long wanpela tambu bilong em? (b) Maski wanblut i mekim pasin nogut tru, bilong wanem dispela i no ken pasim yumi long autim tok long em?
15 Ol gutpela samting i bin painim planti bratasista husat i bin autim tok long ol famili bilong ol em ol i no bilip, maski i luk olsem ol i no inap harim tok. Tingim stori bilong Joyce, wanpela sista Kristen long Amerika. Tambu brata bilong em i bin kalabus planti taim, kirap long taim em i yangpela yet. Joyce i tok: “Ol man i save tok, laip bilong em i no gat as bilong en, long wanem, em i save salim ol drak, em i wanpela stilman, na em i save mekim planti narapela pasin nogut. Tasol maski i olsem, mi wok long autim ol tok i tru bilong Baibel long em inap 37 yia.” Pasin bilong Joyce long i no les kwik long helpim tambu bilong em i karim gutpela kaikai. Tambu brata i kirap stadi long Baibel wantaim ol Witnes Bilong Jehova na mekim ol bikpela senis long laip bilong em. I no longtaim i go pinis, taim tambu brata bilong Joyce i gat 50 krismas, em i kisim baptais long wanpela kibung distrik long Kalifonia, Amerika. Joyce i tok: “Mi amamas na mi krai. Mi amamas tru long mi no bin les long traim long helpim em!”
16 Ating yu surik liklik long toktok wantaim sampela wanblut bilong yu long ol tok i tru bilong Baibel, long wanem, ol i mekim pasin nogut. Tasol dispela i no bin pasim Joyce long toktok long tambu brata bilong em. Yumi no inap save long wanem samting i stap long bel bilong narapela man, a? Ating dispela man i wok long painim lotu i tru. Olsem na yu no ken surik long helpim em long painim lotu i tru.—Ritim Sindaun 3:27.
Gutpela Buk Bilong Stadi Long Baibel
17, 18. (a) Ol ripot i kamap long olgeta hap bilong graun i soim olsem buk Tru Tru Baibel i Tok Wanem? i kamapim wanem ol gutpela samting? (b) Yu bin kisim wanem ol gutpela ekspiriens taim yu mekim wok long dispela buk?
17 Ol ripot i kam long planti kantri long olgeta hap bilong graun i soim olsem planti man i gat gutpela bel ol i wok long stadi long buk Tru Tru Baibel i Tok Wanem? Penni, wanpela painia sista long Amerika, em i bin kirapim sampela stadi long rot bilong dispela buk. Tupela stadi ol i lapun na ol i strongpela memba long lotu bilong ol. Penni i no save tupela lapun bai ting wanem taim ol i kisim save long ol tok i tru bilong Baibel i stap long buk Baibel i Tok. Em i tok: “Tok bilong buk i klia, i kolim stret ol samting, na man inap kisimgut, olsem na ol i bilip olsem ol tok ol i lainim em tok i tru, na ol i no toktok planti o bel hevi.”
18 Pat, wanpela pablisa long Briten, em i kirap stadi long Baibel wantaim wanpela meri refiuji i kam long wanpela kantri bilong Esia. Dispela meri i mas ranawe lusim kantri bilong em bihain long ol soldia i bin kisim man na ol pikinini man bilong em, na em i no lukim ol moa. Ol man i bin tok long kilim em i dai, ol i kukim haus bilong em, na planti man i bin reipim em. Olgeta dispela samting i mekim na em i pilim olsem laip bilong em i no gat as bilong en, na inap planti taim em i tingting long kilim i dai em yet. Tasol Baibel stadi i helpim em long bilip na wetim gutpela samting. Pat i tok: “Em i pilim tru ol tok na ol gutpela tok piksa bilong buk Baibel i Tok, em ol dispela tok i klia na i no hatwok long kisim.” Sumatin hia i kamap strong hariap, winim mak bilong kamap pablisa i no baptais, na em i kamapim laik bilong em long kisim baptais long kibung i kamap bihain. Yumi kisim bikpela amamas tru long wok bilong helpim ol man long kliagut na pilim tru tok bilong Baibel i helpim ol long wetim ol gutpela samting i kamap bihain!
“Yumi No Ken Les Long Mekim Gutpela Pasin”
19. Bilong wanem wok autim tok i bikpela samting tru?
19 Taim olgeta wan wan de i kam na i go, wok bilong yumi long autim tok na kamapim ol disaipel i kamap bikpela samting moa. Long olgeta yia, planti tausen man i gat gutpela bel ol i harim na bilip long tok yumi autim. Tasol “de bilong Bikpela i mekim kot bilong en, em i klostu nau,” na dispela i makim olsem ol man i no laik save long God, ol i mas i dai.—Sef. 1:14; Snd. 24:11.
20. Yumi olgeta wan wan i mas tingting strong long mekim wanem?
20 Yumi inap helpim yet ol kain man olsem. Tasol bilong mekim olsem, em i bikpela samting long yumi mas bihainim pasin bilong ol Kristen long taim bilong ol aposel, em ol i ‘no lusim wok bilong autim gutnius olsem Jisas em i dispela man God i bin promis long salim i kam.’ (Ap. 5:42) Bihainim pasin bilong ol na mekim yet wok autim tok maski ol man i birua, na was gut long pasin bilong yu long ‘skulim gut ol man,’ na autim tok long olgeta kain man! “Yumi no ken les long mekim gutpela pasin,” sapos yumi sanap strong na mekim wok, bai yumi kisim planti blesing na God bai amamas long yumi.—2 Ti. 4:2; ritim Galesia 6:9.
[Futnot]
a Mipela i senisim sampela nem.
Bai Yu Bekim Olsem Wanem?
• Husat i wok long harim na bilip long gutnius?
• Bilong wanem yumi no ken skelim ol man yumi autim tok long ol?
• Wanem ol gutpela samting i wok long kamap long rot bilong buk Tru Tru Baibel i Tok Wanem?
[Ol Piksa long pes 13]
Planti tausen man i gat gutpela bel ol i harim na bilip
[Ol Piksa long pes 15]
Ol senis aposel Pol i bin mekim i ken lainim yumi long wanem samting?
[Piksa long pes 16]
Ol man bilong autim gutnius i no save skelim ol man