“Lukim Dispela Piksa!”

Taim yu opim nupela Wastaua, hamas taim yu bin mekim dispela tok long yu yet o long ol narapela? I gat as na ol i lusim bikpela haptaim long kamapim ol naispela piksa na ol poto na putim long dispela nius. Ol dispela piksa i stap bilong skulim yumi long wokim tingting na pilim ol tok. Ol piksa inap helpim tru yumi taim yumi redim na bekim tok long taim bilong Wastaua Stadi.

Olsem: Taim yu lukim piksa i stap long kirap bilong stadi, traim long tingim olsem i gat wanem as na ol i putim dispela piksa. Dispela piksa i laik givim wanem skul long yumi? Olsem wanem dispela piksa i stret long het tok o tim skripsa bilong stadi? Taim yu lukim ol narapela piksa tu, traim long tingim olsem wanem dispela piksa i stret long bikpela tok bilong stadi na long laip bilong yu yet.

Brata bilong lukautim Stadi Wastaua bai askim kongrigesen long stori long wan wan piksa, olsem wanem dispela piksa i stret long tok bilong Wastaua, na olsem wanem piksa i helpim yumi olgeta wan wan. Sampela piksa i gat ol tok i stap aninit long en na i makim stret wanpela paragraf. Tasol sampela piksa i no gat tok long en, olsem na brata bilong lukautim Stadi Wastaua bai makim wanem ol piksa i stret long stori long en taim ol i kamap long wanpela paragraf. Long dispela rot, yumi olgeta bai kisim helpim long ol piksa we i stap bilong helpim man long tingim gut skul i stap long Tok Bilong God.

Wanpela brata i tok: “Taim mi ritim pinis wanpela naispela atikol, ol piksa i save helpim mi long tingim gut ol tok mi ritim.”