Ol Meri i Mekim Wanem Wok Bilong Kamapim Samting Jehova i Tingting Pinis Long Mekim?
“Ol meri i autim gutnius ol i bikpela lain ami.”—SNG. 68:11, NW.
1, 2. (a) God i givim wanem ol presen long Adam? (b) Wai na God i wokim meri bilong Adam? (Lukim piksa long kirap bilong stadi.)
JEHOVA i bin wokim graun, long wanem, i gat samting em i tingting pinis long kamapim. “Em i bin wokim [graun] bilong olgeta samting i ken i stap long en.” (Ais. 45:18) Adam em namba 1 man God i wokim long graun na em i gutpela olgeta, na God i givim em naispela ples—em gaden Iden. Ating Adam i bin amamas tru long lukim ol naispela diwai, klinpela wara, na kain kain animal i amamas na pilai i stap! Tasol em i sot long wanpela samting. Jehova i kamapim klia dispela samting taim em i tok: “Em i no gutpela long dispela man i stap wanpis. Mi mas mekim kamap wanpela poroman bilong helpim em.” God i mekim Adam i slip i dai, em i kisim wanpela bun long banis bilong em na “wokim wanpela meri long dispela bun.” Taim Adam i kirap long slip, ating em i amamas nogut tru! Adam i tok: “Em nau. Em i poroman tru bilong mi. Bun bilong em i kamap long bun bilong mi, na mit bilong em i kamap long mit bilong mi. God i wokim em long bun bilong mi, olsem na bai mi kolim em ‘meri.’”—Stt. 2:18-23.
2 God i givim meri olsem gutpela presen tru, long wanem, em bai kamap nambawan helpim bilong man. Na tu, meri bai i gat gutpela wok bilong karim ol pikinini. “[Adam] i kolim meri bilong em Iv, long wanem, em i tumbuna mama bilong olgeta manmeri.” (Stt. 3:20) God i givim gutpela presen tru long namba 1 man na meri! Ol inap kamapim ol narapela manmeri em ol i gutpela olgeta. Long dispela rot, isi isi graun bai kamap ples paradais, na ol man i gutpela olgeta bai stap long en na bosim ol arapela samting i gat laip, olsem ol pis, ol pisin, na ol animal.—Stt. 1:27, 28.
3. (a) Adam na Iv i mas mekim wanem na bai God i ken blesim ol? Wanem samting i kamap? (b) Yumi bai skelim wanem ol askim?
3 Adam na Iv i mas bihainim tok bilong Jehova na stap daun long wok king bilong em, na bai ol inap long kisim ol blesing. (Stt. 2:15-17) Long dispela rot tasol ol bai inapim wok God i givim long ol. Tasol sori tru olsem ol i larim Satan, “dispela snek bilong bipo yet,” long pulim ol long sakim tok bilong God na ol i pundaun long sin. (Rev. 12:9; Stt. 3:1-6) Dispela pasin bikhet i givim wanem hevi long ol meri? Ol bilipmeri long bipo i mekim wanem ol gutpela wok? Wai na Baibel i kolim ol meri Kristen long nau olsem “bikpela lain ami”?—Sng. 68:11, NW.
PASIN BIKHET I KAMAPIM HEVI
4. Husat i kisim asua long rong bilong namba 1 man na meri?
4 Taim God i tokim Adam long rong em i mekim, Adam i givim eskius na tok: “Dispela meri yu bin givim mi olsem poroman bilong mi, em tasol i givim mi pikinini bilong dispela diwai na mi kaikai.” (Stt. 3:12) Adam i no laik kisim asua long rong bilong em, na tu, em i sutim tok long meri em God i givim long em—na Adam i sutim tok tu long Man husat i givim dispela meri long em! Adam tupela Iv i mekim rong, tasol asua i stap long Adam. Olsem na aposel Pol i tok: “Long rot bilong wanpela man [Adam] tasol sin i kamap long graun. Na sin i bringim dai i kam.”—Rom 5:12.
5. God i larim ol man i bosim ol yet inap sampela haptaim, na dispela i soim klia wanem samting?
5 Namba 1 man na meri i pilim olsem ol i no nidim Jehova long stap olsem King bilong ol. Dispela i kirapim bikpela askim long husat tru i stap olsem nambawan bos, na askim i olsem: Husat i gat rait long bosim yumi? God i laik bekim dispela askim na bai dispela bekim i stap inap oltaim oltaim, olsem na em i larim ol man long bosim ol yet inap sampela haptaim. Em i save olsem dispela bai soim klia olsem ol man i no inap bosim ol yet. Inap planti handret yia nau, wok king bilong ol man i save givim hevi tasol long ol manmeri. Insait long 1 handret yia i go pinis, inap olsem 1 handret milion man i dai long ol woa, na planti milion bilong ol em ol man nating, ol meri, na ol pikinini. Olsem na planti samting i soim klia olsem “man i no inap bosim wokabaut bilong [em] yet na bihainim ol rot [em] i laikim.” (Jer. 10:23) Olsem na yumi luksave olsem Jehova em King bilong yumi.—Ritim Sindaun 3:5, 6.
6. Long planti kantri, ol manmeri i save mekim wanem kain pasin long ol meri?
6 Dispela graun i stap long han bilong Satan, olsem na ol man na ol meri wantaim i save karim hevi. (Sav. 8:9; 1 Jon 5:19) Wanpela bikpela hevi tru em pasin bilong mekim nogut long ol meri. Long olgeta hap, 30 pesen bilong ol meri i putim ripot olsem man bilong ol i bin paitim ol o mekim nogut long ol. Long sampela ples, ol famili i save laikim ol man bikos ol i pilim olsem taim ol man i kamap bikpela, ol bai holim yet nem bilong famili na lukautim ol lapun papamama na ol tumbuna. Long sampela kantri, ol manmeri i save luk daun long ol pikinini meri, na planti meri moa i save rausim bel sapos ol i gat bel long pikinini meri.
7. Olsem wanem God i bin redim ol samting bilong helpim sindaun bilong ol man na ol meri?
7 God i no amamas long pasin bilong mekim nogut long ol meri. Em i save mekim stretpela pasin long ol meri na rispektim ol. Yumi inap save long tingting bilong Jehova taim yumi skelim dispela samting: Jehova i wokim Iv i kamap gutpela olgeta, na Iv i gat ol pasin we i mekim na em i stap olsem gutpela poroman bilong helpim Adam, na em i no stap olsem sleiv. Dispela em wanpela risen na long pinis bilong namba 6 de, God i “lukim olgeta dispela samting i gutpela, na em i amamas tru.” (Stt. 1:31) Yes, “olgeta dispela samting” em Jehova i wokim “i gutpela.” Em i redim gut ol samting na bai ol man na ol meri inap kisim gutpela sindaun!
JEHOVA I SAMBAI LONG OL MERI
8. (a) Stori long pasin bilong ol manmeri long nau. (b) Long taim bipo i kam inap long nau, God i orait long husat lain?
8 Bihain long pasin bikhet i kirap long gaden Iden, pasin bilong ol man na meri i kamap nogut moa, na insait long 1 handret yia i go pinis, pasin bikhet bilong ol i kamap nogut moa yet winim olgeta taim bipo. Baibel i tok profet olsem pasin nogut bai kamap bikpela moa long “taim bilong las de.” Pasin nogut i wok long kamap long olgeta hap bilong graun, na dispela i soim klia olsem yumi stap long wanpela haptaim we i “givim hatwok” long yumi. (2 Tim. 3:1-5) Tasol long taim bipo i kam inap long nau, Bikpela King Jehova i soim olsem em i orait long ol man na ol meri husat i bilip long em, bihainim ol lo bilong em, na stap daun long em olsem King bilong ol.—Ritim Song 71:5.
9. Hamas manmeri i bin abrusim bagarap bilong Bikpela Tait? Bilong wanem?
9 Long taim bilong Noa, God i mekim Bikpela Tait i kamap na i kilim i dai ol manmeri husat i save pait na bikhet, na liklik lain tasol i bin abrusim bagarap. Sapos ol brata na ol sista bilong Noa i bin i stap laip yet long dispela taim, ating ol tu i dai long tait wara. (Stt. 5:30) Tasol namel long lain i abrusim bagarap bilong bikpela tait, namba bilong ol meri i wankain long namba bilong ol man. Ol dispela lain i bin abrusim bagarap: Noa, meri bilong em, 3-pela pikinini man, na ol meri bilong ol dispela pikinini man. Ol i abrusim bagarap bikos ol i stap daun long God na bihainim laik bilong em. Jehova i bin sambai long ol dispela 8-pela manmeri, na ol i stap olsem lain tumbuna bilong planti bilion manmeri i stap nau long graun.—Stt. 7:7; 1 Pita 3:20.
10. Wai na Jehova i sambai long ol meri bilong ol bilipman bilong bipo?
10 Planti yia bihain, God i sambai long ol meri bilong ol bilipman bilong bipo. Sapos ol i save komplein long olgeta samting i kamap long ol, ating God bai i no sambai long ol. (Jut 16) Sara em meri bilong Abraham na em i rispektim tru man bilong em, olsem na yumi no inap ting olsem em i bin komplein taim ol i lusim gutpela sindaun long Ur na kamap trip lain na stap long ol haus sel long narapela kantri. Sara i “bihainim tok bilong Abraham, na kolim em ‘bikman.’” (1 Pita 3:6) Tingim tu Rebeka, em i stap olsem presen i kam long Jehova na em i kamap gutpela maritmeri. Olsem na yumi no kirap nogut olsem Aisak, “i laikim tru Rebeka, na bel bilong en i kamap gutpela gen . . . long wanem, mama bilong en i bin dai.” (Stt. 24:67) Long nau, yumi amamas tru olsem i gat ol bilipmeri husat i kain olsem Sara na Rebeka!
11. Olsem wanem 2-pela meri Hibru i soim olsem ol i gat pasin bilong strongim bel?
11 Taim lain Israel i stap kalabus long Isip, lain bilong ol i kamap planti tru, olsem na Fero i putim lo olsem taim ol meri Hibru i karim pikinini man, orait ol i mas kilim i dai dispela pikinini. Tasol, tingim Sifra na Pua, em ol meri Hibru husat i go pas long helpim ol meri long karim pikinini. Ol i strongim bel na ol i no laik kilim i dai ol pikinini, long wanem, ol i pret long Jehova na stap daun long em. Olsem na Jehova i blesim ol na ol inap karim pikinini na kamapim famili bilong ol yet.—Kis. 1:15-21.
12. Debora na Jael i bin mekim wanem ol bikpela wok?
12 Long taim bilong ol hetman bilong Israel, Jehova i bin sambai long Debora, em wanpela profet meri. Debora i strongim hetman Barak na helpim lain Israel long kamap fri long hatpela pasin bilong lain Kenan, tasol em i tok profet olsem Barak i no inap kisim biknem long daunim lain Kenan. God bai putim Sisera, em kepten bilong ami, “long han bilong wanpela meri.” Dispela samting i bin kamap taim Jael, em meri bilong narapela kantri, i kilim i dai Sisera.—Het. 4:4-9, 17-22.
13. Baibel i stori olsem wanem long Abigel?
13 Abigel em wanpela gutpela meri husat i stap 1 tausen 1 handret yia paslain long Krais. Em i gat pasin bilong skelim gut ol samting, tasol man bilong em, Nabal, em i man bilong mekim hatpela pasin, em i no gat gutpela pasin, na em i no gat gutpela tingting. (1 Sml. 25:2, 3, 25) Inap liklik haptaim, Devit na lain man bilong em i bin helpim long lukautim lain sipsip bilong Nabal, tasol taim ol i askim Nabal long givim sampela kaikai, em i “givim tok nogut long ol” na em i no givim wanpela samting long ol. Dispela i mekim Devit i belhat tru na em i laik kilim i dai Nabal na lain man bilong em. Taim Abigel i harim stori bilong dispela samting, em i kisim kaikai na dring i go long Devit na lain man bilong em, na dispela i pasim Devit long kilim i dai Nabal. (1 Sml. 25:8-18) Bihain Devit i tokim em olsem: “God, Bikpela bilong yumi Israel, i bin salim yu i kam nau, na yu bungim mi.” (1 Sml. 25:32) Taim Nabal i dai pinis, Devit i maritim Abigel.—1 Sml. 25:37-42.
14. Ol pikinini meri bilong Salum i bin helpim wanem wok? Olsem wanem ol meri Kristen i bihainim wankain pasin long nau?
14 Taim ami bilong Babilon i bagarapim Jerusalem na tempel bilong en long 607 B.C.E., ol i kilim i dai planti man, ol meri, na ol pikinini. Nehemia i stiaim wok na ol i wokim gen banis bilong Jerusalem long 455 B.C.E. Salum em hetman bilong namba 2 hap bilong distrik Jerusalem, na ol pikinini meri bilong em i bin helpim wok bilong stretim gen banis bilong Jerusalem. (Neh. 3:12) Ol i amamas long mekim wok i no gat nem. Yumi amamas tru long planti meri Kristen—long nau ol i givim bel tru long helpim wok bilong sanapim ol haus bilong helpim lotu i tru!
OL BILIPMERI LONG TAIM BILONG OL APOSEL
15. God i givim wanem gutpela blesing long Maria?
15 Long taim bilong ol aposel na paslain liklik long en, Jehova i opim rot long planti meri inap mekim ol gutpela wok. Wanpela bilong ol em Maria, em meri i no bin slip wantaim man. Ol i makim pinis Maria long maritim Josep, tasol paslain long tupela i marit, mirakel i kamap na Maria i kisim bel long rot bilong holi spirit. Bilong wanem God i makim Maria long stap olsem mama bilong Jisas? Maria i gat ol pasin em holi spirit i save kamapim, na dispela bai helpim em long lukautim gut pikinini man bilong em kirap long taim em i liklik yet i go inap long em i kamap bikpela man. Em gutpela blesing tru long stap olsem mama bilong nambawan gutpela man husat i bin stap long graun!—Mat. 1:18-25.
16. Stori long wanpela eksampel we i kamapim klia pasin Jisas i soim long ol meri.
16 Jisas i bin mekim gutpela pasin tru long ol meri. Olsem: Tingim stori bilong wanpela meri husat i karim blut inap 12-pela yia. Planti manmeri i stap raunim Jisas na dispela meri i kam long baksait bilong Jisas na tatsim klos bilong em. Jisas i no krosim em, nogat. Long gutpela pasin em i tok: “Pikinini, bilip bilong yu i mekim na yu kamap orait. Yu go wantaim bel isi, na dispela sik i no ken givim hevi moa long yu.”—Mak 5:25-34.
17. Long rot bilong mirakel, wanem samting i kamap long Pentikos 33 C.E.?
17 Sampela meri i stap olsem ol disaipel bilong Jisas na ol i mekim ol wok bilong helpim Jisas na ol aposel. (Luk 8:1-3) Long Pentikos 33 C.E., inap 120 man na meri i kisim spirit bilong God long narapela kain rot. (Ritim Aposel 2:1-4.) Tok profet i stori long dispela samting olsem: “Bai mi [Jehova] kapsaitim spirit bilong mi long olgeta manmeri. Na ol pikinini man na pikinini meri bilong yupela bai i autim tok bilong mi olsem ol profet. . . . Na long dispela taim bai mi kapsaitim spirit bilong mi tu long ol wokboi na ol wokmeri nating.” (Joel 2:28, 29) God i wokim mirakel long de bilong Pentikos na em i soim olsem lain Israel i no stap gut moa long em. Olsem na em i no sambai moa long ol, nogat, em i sambai long “lain Israel bilong God,” em ol man na ol meri wantaim i insait long en. (Gal. 3:28; 6:15, 16) Long taim bilong ol aposel, Filip em man bilong autim gutnius, na 4-pela pikinini meri bilong em tu i insait long wok bilong autim tok.—Apo. 21:8, 9.
OL MERI I STAP “BIKPELA LAIN AMI”
18, 19. (a) Long sait bilong lotu i tru, God i givim wanem gutpela wok long ol man na ol meri? (b) Man bilong raitim song i tok wanem long ol meri husat i autim gutnius?
18 Kirap long yia 1875 samting, sampela man na ol meri i soim olsem ol i laik save long pasin bilong mekim lotu i tru. Ol i go pas long ol manmeri long nau em ol i truim tok profet bilong Jisas olsem: “Ol bai autim dispela gutnius bilong Kingdom long olgeta hap bilong graun na bai olgeta lain man i ken harim, na bihain long dispela, pinis bai kamap.”—Mat. 24:14.
19 Dispela liklik grup bilong ol Sumatin Bilong Baibel i kamap bikpela, na long nau namba bilong ol Witnes Bilong Jehova em inap olsem 8 milion. Winim 11 milion manmeri i soim olsem ol i gat laik long save long tok bilong Baibel na wok bilong yumi, olsem na ol i save kam long Memorial bilong tingim dai bilong Jisas long olgeta yia. Long planti kantri, bikpela lain moa bilong ol lain i kam bung em ol meri. Na tu, winim 1 milion manmeri i insait long wok fultaim bilong autim tok bilong Kingdom, na bikpela lain moa em ol meri. God i opim rot na ol bilipmeri inap truim tok em man bilong raitim song i bin mekim, olsem: “Jehova i tok; ol meri i autim gutnius ol i bikpela lain ami.”—Sng. 68:11, NW.
Ol meri i autim gutnius i stap olsem “bikpela lain ami” (Lukim paragraf 18, 19)
OL BILIPMERI BAI KISIM OL GUTPELA BLESING
20. I gutpela yumi skelim wanem kain ol samting taim yumi mekim stadi bilong yumi yet?
20 Spes i no bikpela inap long raitim stori bilong planti moa bilipmeri em Baibel i stori long ol. Tasol yumi inap ritim stori bilong ol long Baibel na long ol atikol i kamap long ol buk na nius bilong yumi. Olsem: Yumi ken tingim tingim long bel stori bilong Rut long stap gut long God na Naomi. (Rut 1:16, 17) Taim yumi ritim stori bilong Kwin Esta long Baibel na long ol narapela atikol, dispela inap strongim bilip bilong yumi. Taim yumi stadi long ol dispela samting long Famili Lotu, dispela bai helpim yumi. Sapos yumi stap wanpis, orait yumi ken stadi long ol kain samting olsem taim yumi mekim stadi bilong yumi yet.
21. Olsem wanem ol bilipmeri i soim olsem ol i givim bel tru long Jehova long taim bilong hevi?
21 Jehova i save blesim wok autim tok bilong ol meri Kristen na sambai long ol long taim bilong hevi. Olsem: Long taim bilong lain Natsi na gavman komiunis, planti bilipmeri i bin stap gut long God na bihainim tok bilong em, olsem na ol i bin karim bikpela hevi na sampela bilong ol i bin lusim laip bilong ol. (Apo. 5:29) Wankain olsem long bipo, long nau tu ol sista bilong yumi na ol arapela wanbilip i stap daun long nambawan wok bos bilong God. I olsem God i mekim wankain samting long ol olsem em i bin mekim long lain Israel bilong bipo, olsem em i holim rait han bilong ol na tok: “Yupela i no ken pret. Bai mi helpim yupela.”—Ais. 41:10-13.
22. Yumi ken bilip na wet long kisim wanem ol gutpela blesing long bihain?
22 Klostu nau, ol bilipman na ol bilipmeri bai senisim dispela graun i kamap ples paradais. Na tu, taim planti milion manmeri i kirap bek, ol bilipman na ol bilipmeri bai skulim ol long ol samting Jehova i tingting pinis long mekim. Long nau yet, maski yumi man o meri, yumi mas amamas tru long gutpela blesing i stap long yumi, olsem yumi stap “wanbel na bihainim tok” na mekim wok bilong God.—Sef. 3:9.