Samting Yu Ting Bai Kamap Bihain
Olsem wanem? Sampela taim yu tingting long wanem samting bai painim yu na famili bilong yu long bihain? Yu tingting long mani kago o stap rabis, pasin laikim o stap wanpis? Yu bai stap laip longpela taim, o sampela hevi i painim yu na yu dai? Ol man i laik save long bekim bilong ol dispela askim inap planti tausen yia.
Long nau, ol saveman i skelim ol samting i kamap long olgeta hap bilong graun na bai ol inap tokaut long ol samting bai kamap bihain. Planti wok painimaut bilong ol i kamap tru, sampela i no kamap, na sampela i mekim ol i bel hevi. Olsem, long 1912, Guglielmo Marconi, em man i bin wokim waiales telegraf i tok: “Taim bilong yusim ol waiales masin bai mekim na woa i no inap kamap.” Wanpela man i wok long Decca Record Company i no laikim ol Beatles long 1962, em i tok planti man bai i no save long ol grup bilong pilaim gita.
Planti i kisim helpim long ol strongpela spirit bilong save long ol samting bai kamap bihain. Sampela i save kisim edvais long ol astroloji; horoskop i save kamap planti taim long ol magasin na niuspepa. Ol narapela i save go lukim ol glasman, ol dispela man i tok ol inap ritim ol mak long ol kas tarot, ol namba, na ol mak long han bilong man.
Ol man i laik tru long save long ol samting bai kamap bihain, olsem na ol i go lukim ol pris—ol pris man o pris meri husat i tok ol i kamapim tingting bilong god ol i makim. Ol stori i kamapim olsem King Krisas bilong Lidia i salim ol presen i gat bikpela pe long pris long Delfi, Grik. King Krisas i laik save long samting bai kamap sapos em i pait long Sairus bilong Persia. Pris i tok Krisas bai bagarapim wanpela strongpela gavman sapos em i go pait long Sairus. Krisas i bilip olsem em bai win, olsem na em i go pait, tasol dispela strongpela gavman i bagarap, em gavman bilong em yet!
Tok hait bilong pris i no gat as bilong en; ating em inap kamap tru maski wanem sait i winim pait. Krisas i givim bikpela pe long tok giaman we i givim hevi long em. Long nau, i gat kain kain rot bilong kisim save long ol samting bai kamap bihain. Tasol yu ting ol dispela tok i tru?