Askim

Baibel i tok Pol “i go antap long namba 3 heven” na “em i go long paradais.” Wanem mining bilong dispela tok?—2 Kor. 12:2-4.

Long 2 Korin 12:2, 3, Pol i tok wanpela man “i go antap long namba 3 heven.” Dispela man em husat? Taim Pol i salim pas i go long kongrigesen long Korin, em i tok God i yusim em long mekim wok aposel. (2 Kor. 11:5, 23) Em i stori long “ol visen na ol tok i kam long Bikpela.” Long ol dispela ves, Pol i no kolim nem bilong ol narapela Kristen. Olsem na yumi inap tok em yet em dispela man i lukim ol visen na kisim ol tok i kam long Bikpela.—2 Kor. 12:1, 5.

Pol yet “i go antap long namba 3 heven” na “i go long paradais.” (2 Kor. 12:2-4) Em i stori long “ol tok i kam long Bikpela,” na dispela i makim olsem em i kisim save long ol samting bai kamap bihain.

Pol i lukim “namba 3 heven.” Dispela i makim wanem samting?

Long Baibel, dispela tok “heven” inap makim ol samting long ples antap em yumi inap lukim long ai. (Stt. 11:4; 27:28; Mat. 6:26) Em inap makim tu wok bos bilong ol man. (Dan. 4:20-22) Na tu, em inap makim wok bos bilong God long rot bilong Kingdom.—Rev. 21:1.

Pol i lukim “namba 3 heven.” Em wanem samting? Sampela taim Baibel i kolim wanpela samting 3-pela taim bilong strongim tok o soim olsem em i bikpela samting tru. (Ais. 6:3; Ese. 21:27; Rev. 4:8) Taim Pol i kolim “namba 3 heven,” em i laik kamapim klia olsem i gat wanpela wok bos we i holim bikpela namba—Kingdom Bilong Mesaia long rot bilong Jisas Krais na ol wanwok bilong em, lain 144 tausen. (Lukim buk Insight on the Scriptures, Vol. 1, p. 1059, 1062.) Aposel Pita i tingim dispela Kingdom taim em i tok, yumi wet long lukim “nupela skai” em God i tok promis pinis long wokim.—2 Pita 3:13.

Olsem wanem long tok bilong Pol long “paradais”?

Dispela tok inap makim kain kain samting: (1) Fes man na meri i bin stap long paradais long graun, olsem na “paradais” inap makim Paradais long graun. (2) Em inap makim olsem long nupela taim, ol manmeri bilong God bai stap gut long sait bilong bilip. (3) Na tu, em inap makim bikpela amamas na bel isi long heven, “paradais bilong God,” em Revelesen 2:7 i stori long en.—Lukim Wastaua, Julai 15, 2015, p. 8. par. 8.

Ating Pol i tingim olgeta 3-pela mining taim em i stori long ekspiriens bilong em long 2 Korin 12:4.

Skul yumi kisim:

“Namba 3 heven” long 2 Korin 12:2 em Kingdom Bilong Mesaia. Dispela Kingdom i stap long han bilong Jisas Krais na lain 144,000 em ol i stap olsem “nupela skai.”—2 Pita 3:13.

Kingdom i olsem “namba 3 heven” bikos wok bos bilong en i antap tru na i gat bikpela strong winim olgeta narapela gavman.

Yumi inap tok olsem “paradais” em Pol i lukim long visen na em “i go antap” long en inap makim 3-pela kain paradais bilong nupela taim, (1) paradais bai kamap long graun, (2) paradais long sait bilong bilip—dispela paradais bai inapim olgeta hap bilong graun, na (3) “paradais bilong God” long heven.

Long nupela taim, bai i gat nupela skai na nupela graun. Kingdom bai mekim wok long heven, na ol manmeri bai mekim wok bilong Jehova na stap long paradais long graun.