Askim

◼ Taim kuskus bilong kongrigesen i stretim pinis ripot bilong wok autim tok, em i mas mekim wanem long ol ripot bilong stadi?

Kuskus i mas putim ol dispela ripot bilong stadi long wanpela fail bilong kongrigesen, na ol i mas i stap long dispela fail inap tupela mun. Bihain kuskus i ken givim ol dispela ripot long ol wasman bilong Buk-Stadi, ol dispela ripot inap helpim em long givim sampela tok long ol pablisa i save stadi wantaim sampela man na helpim ol. Em inap helpim tu ol dispela man i stadi.

Ol wasman bilong Buk-Stadi i mas wok long kisim save long ol man i stadi na kirapim ol long i kam long Buk-Stadi sapos ol inap. Wasman bilong Buk-Stadi i ken mekim sampela gutpela tok long ol brata sista i stadi long Baibel wantaim sampela, ating em i ken mekim olsem paslain o bihain long ol miting bilong kongrigesen. Ating em i ken pasim tok long i go wantaim sampela pablisa long stadi bilong ol bilong strongim ol long ol samting bilong spirit. Na taim wasman autim tok i go lukim ol Buk-Stadi grup, em i ken mekim sampela gutpela tok long wok bilong mekim ol Baibel-stadi. Em i ken lukim ol tok i stap long ripot bilong stadi bilong mekim ol tok i helpim ol brata sista.

Ol ripot bilong stadi long fail bilong kuskus i mas i stap na bai wasman sekit i ken lukim taim em i kam lukim kongrigesen. Ating em i ken go wantaim sampela pablisa taim ol i mekim stadi bilong ol. Dispela samting bai strongim tru man i stadi na helpim tu pablisa i lukautim stadi. O wasman sekit i ken i go lukim ol dispela man i stadi long narapela taim long dispela wik em i stap wantaim kongrigesen.

Sapos yu no stadi moa wantaim wanpela man, yu mas raitim as bilong dispela samting long ripot bilong stadi. Taim wasman sekit i kam lukim kongrigesen, em bai lukim ol ripot bilong stadi. Ating i gat rot bilong helpim sampela man i bin lusim stadi na bai ol i gat laik long kisim ol samting bilong spirit. Em bai gutpela tru sapos sampela bilong ol dispela man i kirap stadi gen na yumi inap helpim ol gen long ol samting bilong spirit!

Yumi olgeta i tingim dispela wok bilong kamapim ol disaipel na yumi laik painim rot bilong helpim ol dispela nupela man i wok long kisim save long tok i tru. Ripot bilong stadi inap helpim yumi long mekim olsem. Taim mun i pinis, wasman bilong Buk-Stadi i ken tromoi olgeta olpela ripot taim kuskus i givim ol nupela ripot long em.