Ol Samting Yu Ken Mekim na Bai Wastaua na Kirap! i Helpim Yu Tru
1 Ol i gat wok long skelim ol samting i kamap long graun, em ol i truim tok profet bilong Baibel. Ol i kamapim long ples klia as bilong ol samting nau i kamap long graun. Ol i kamapim ol tok bilong Baibel, na tu, ol i soim yumi long rot bilong karim ol hevi bilong nau. Ol i mekim bikpela wok long kirapim ol man long bilip long Jehova, em wanpela tasol em i God tru, na ol i makim dispela lain em ol tasol i lain tru bilong Jehova long graun. Husat o wanem samting i mekim dispela wok? Em ol Wastaua na Kirap! Olsem wanem? Ol Wastaua na Kirap! i helpim yu tru?
ROT BILONG KISIM OL GUTPELA SAMTING
2 Sapos yumi gat sabskripsen bilong yumi yet, yumi save kisim kwik ol magasin paslain long det bilong en. Long dispela rot yumi inap kaunim na skelim gut ol magasin paslain long taim yumi tilim long ol man. Sampela taim yumi kisim planti magasin wantaim bilong ol narapela narapela det na ol i hip i stap na yumi hatwok long kaunim. Tasol long rot bilong sabskripsen bai yumi kisim wanpela magasin tasol long olgeta wan wan wik samting. Olsem na long olgeta wik bai yumi gat kaikai bilong spirit na i no hatwok long yumi painim taim bilong kaunim. Sapos ol pikinini i gat sabskripsen bilong ol yet, dispela bai helpim ol tu. Sapos yu no kisim yet sabskripsen, orait, nau long dispela wik, tingting gut long mekim olsem.
3 Taim yumi kisim pinis nupela magasin, yumi laik save wanem ol tok i stap insait. Tasol olsem wanem? Yu save lukim nating ol het-tok na ol piksa tasol? O stret long taim yu kisim yu kaunim wanpela o tupela stori, na kwiktaim bihain yu kaunim olgeta narapela stori bilong en?
4 Sampela taim Wastaua i kamapim ol nupela save long sampela tok, o i kamapim sampela senis o nupela lo bilong bosim kongrigesen. Yumi ken lukim ol dispela kain tok long ol bikpela tok bilong stadi na long ol narapela tok tu bilong Wastaua. Olsem wanem? Yu save katim o putim mak long ol nupela tok na long ol narapela bikpela tok yu laik lukim gen long bihain? Yu save holim wanpela bilong olgeta Wastaua na Kirap! bambai yu ken putim long laibreri bilong yu yet? Sapos yu mekim olsem, bai yu inap pilim moa yet ol gutpela tok yumi kisim long rot bilong Wastaua na Kirap!
5 Nau long Papua Niugini yumi kisim olgeta Wastaua long tok Pisin na tok Motu wankain olsem long tok Inglis, na i gat kala kala. Dispela i mas kirapim yumi long tilim ol magasin long olgeta man long kain kain taim. Gutpela sapos olgeta wan wan long kongrigesen i gat Wastaua bilong em yet na ol i redim gut bilong stadi Wastaua. Ol liklik pikinini tu bai ol i amamas long holim Wastaua bilong ol yet long taim bilong stadi. Ol piksa long Wastaua i save helpim ol papamama na ol liklik pikinini tu, long wanem, planti taim ol piksa i kamapim klia ol bikpela tok.
6 Em i bikpela samting long yumi mas mekim bikpela wok inap tru long ol dispela magasin. Sapos yumi yet yumi kaunim na ol i helpim tru yumi, orait bai yumi givim bel long tokim ol narapela man long kisim. No gat narapela nius olsem long dispela graun em inap helpim ol man long save long ol samting ol i mas mekim bilong kisim laip i stap oltaim.