Mekim Gut Famili-Stadi
1 Wanpela bikpela wok tru ol papamama i mas mekim, em wok bilong lainim ol pikinini long tok i tru. Jehova yet i givim dispela wok long ol. (Lo 6:6, 7) Ol pikinini i save stap namel long ol lain i givim baksait long ol lo bilong God, olsem na i mas i gat man bilong stiaim na helpim ol na bai ol i wokabaut stret. Papamama i mas lainim ol pikinini long laikim tru Jehova na tok i tru na bai ol pikinini yet i gat strongpela laik long stap gut long en. Maski yupela papamama i gat ol narapela wok bilong mekim o sampela hevi yupela i mas stretim—nambawan bikpela samting em olsem: Poromanim gut ol pikinini na sindaun toktok wantaim ol. Sapos yupela i sindaun wantaim ol, yupela inap lainim ol long ol stretpela lo na putim i go daun long bel bilong ol na bai ol i wokabaut stret.
2 Bilong helpim famili long bihainim ol lo bilong God, papamama i mas makim taim bilong famili i ken stadi wantaim. Papa i mas tingim wok bilong lukautim famili long ol samting bilong spirit em i nambawan bikpela wok bilong em. Sapos nau papa i no mekim olsem, ating bihain sampela bikpela hevi bai kamap insait long famili.
OL BUK BILONG STADI NA PASIN BILONG STADI
3 Famili i ken stadi long wanem ol buk? Papa i save gut long ol samting inap helpim tru famili. Em i ken askim famili long kamapim tingting bilong ol long ol samting ol yet i ting i gutpela bilong helpim ol, na papa i mas tingim ol tok ol i kamapim. No ken strong tumas long stadi long wanpela buk tasol. Bilong kirapim famili na helpim tru ol, yu ken stadi long ol narapela buk tu na bai famili i no ken les. Planti famili i save redim Wastaua long olgeta wik. Tasol sapos sampela hevi o traim i bin painim ol yangpela long skul, orait, famili i ken toktok wantaim long ol dispela samting. Sosaiti i bin wokim sampela buk i stori long sampela samting olsem: Man i raun wantaim meri, na sampela samting ol i mekim taim skul i pinis long apinun, na spot, na pasin pamuk samting. Papa i ken mekim wok long ol dispela buk bilong kirapim na strongim ol pikinini. Tasol bikpela samting em olsem: Olgeta taim papa i mas wok long skelim ol samting em inap tru long helpim famili. Na em i mas tingim gutpela rot bilong putim ol dispela tok i go daun long bel bilong ol na bai ol i bihainim.
4 Olsem wanem long pasin bilong wokim famili-stadi? Papa i mas helpim famili long i stap bel isi na amamas, tasol ol i mas bihainim pasin daun. No ken kolim ol askim bilong buk tasol; kamapim sampela askim bilong yu yet. Kamapim sampela tok piksa bilong kirapim tingting bilong ol pikinini na bai olgeta wan wan i ken insait long stadi. Mekim wok long ol mep samting. Yu ken makim ol wan wan bilong famili long redim sampela tok. Ol i ken kisim ol tok long Indeks o long buk Insight (tok Inglis). Tasol yu mas tingim krismas bilong ol pikinini na save bilong ol na bai ol wok yu givim long ol inap long skel bilong ol. Kirapim ol liklik pikinini tu long mekim sampela tok sapos ol i inap. Kamapim ol askim i no hatwok tumas long ol i bekim. Ol i ken bekim long wanpela o tupela tok tasol. Na yu no ken ting, taim bilong stadi i gutpela taim bilong krosim ol pikinini long sampela rong ol i bin mekim. Givim gutpela tok amamas long ol na bai ol i ken save yu pilim tru ol samting ol i mekim long stadi. Yu mas amamas taim yu toktok wantaim ol long Baibel.
5 Olsem wanem yu ken save ol samting ol pikinini i stadi long en i go daun long bel bilong ol? Kirapim ol long bekim tok long toktok bilong ol yet. Bilong kamapim bel bilong ol, tingim wanpela samting ol yangpela i save mekim, na givim sampela askim long ol olsem: ‘Ol wanskul bilong yu i gat wanem tingting long dispela samting?’ ‘Sampela taim yu yet i gat tupela tingting long dispela?’ Sapos tingting bilong ol pikinini i kranki liklik, no ken kros long ol. Nogut ol i pret na narapela taim ol i giamanim yu na ol i no kamapim bel bilong ol. No ken hariapim ol long mekim toktok. Sapos ol i pilim olsem yu tingim ol na yu tingim ol hevi bilong ol, bai yu no hatwok tumas long lainim ol, a?
6 Yu mas save, bikpela wok bilong famili-stadi em bilong putim tingting bilong Jehova long bel bilong ol pikinini—stadi i no bilong helpim ol long bekim wanpela tok long miting na em tasol. Nogat. (Fl 3:17-19) Olsem na papa i mas wok strong long putim ol tok i go daun long bel bilong ol. Ol pikinini i mas save, i gat wanem as na ol i mas laik long mekim laik bilong God na olsem wanem dispela bai helpim gut ol.
7 Famili i mas stadi long Baibel long olgeta taim bambai ol i ken kamap strong long spirit. Stadi i save lainim na strongim ol pikinini long karim ol hevi. Yupela papamama i nambawan long helpim ol pikinini bilong yupela. Mekim gut dispela wok God i bin givim long yupela. Jehova bai blesim yupela sapos yupela i wok strong long mekim gutpela famili-stadi long olgeta taim.
[Ol Askim]
1. (a) Kaunim Lo 6:6, 7. God i givim wanem wok long ol papamama? (b) Ol pikinini i mas lain long wanem ol samting? (c) Bilong wanem i bikpela samting long ol papamama i sindaun toktok wantaim ol pikinini?
2. Sapos long nau papamama i no save sindaun wantaim famili bilong helpim ol long ol samting bilong spirit, ating bihain wanem samting bai kamap?
3. Olsem wanem ol buk samting ol wan wan famili i stadi long en i narapela narapela?
4, 5. Papa i ken mekim wanem na bai em i ken save ol tok em i lainim ol pikinini long en i go daun long bel bilong ol?
6, 7. Ol papamama i mas mekim wanem na bai Jehova i ken blesim ol?
This article is repeated in km 1/93.