Autim Gutpela Tok—Long Gutpela Tingting
1 Sindaun 19:8 i tok: “Wok strong long kisim gutpela tingting na save. Na sapos man i holim gut dispela save long tingting bilong en, orait em bai i gat gutpela sindaun.” Tru tumas, planti taim dispela samting i kamap tru taim yumi autim tok. Olsem: Taim man bilong haus i tok em i no laik harim tok, planti pablisa i tingting gut na long pasin isi ol i kamapim wanpela gutpela tok na dispela i kirapim tingting bilong man na nau rot i op long ol i ken autim tok long em; o ating ol dispela tok i mekim gut bel bilong dispela man na narapela taim em bai putim yau long tok bilong ol Witnes. Olsem wanem yumi ken mekim dispela samting?
TAIM MAN I NO LAIK HARIM TOK
2 Planti taim ol man bilong haus i save tok, “Mi gat wok.” Tasol olsem wanem? Man bilong haus i gat bikpela wok tru, o em i tok olsem bambai em i no ken sanap longpela taim na toktok wantaim yumi? Yumi mas tingting gut. Sapos yumi pilim olsem em i no gat bikpela wok tumas, orait yumi ken kamapim tok olsem: “Mi no ken pulim bikpela hap taim bilong yu.” Orait, nau yumi ken sotim ol tok bilong yumi olsem yumi tok promis pinis long em, na no ken pulim tok. Sapos em i pilim olsem yumi tingim em, na sapos liklik tok bilong yumi i bin kirapim tingting bilong em, ating bai em i gat laik long toktok moa i go na nau yumi inap kamapim sampela tok moa bilong Baibel.
3 Sapos tru man bilong haus i gat planti wok, bai yumi mekim wanem? Tru yumi no laik lusim em nating, tasol sapos yumi strong long autim tok long em, em bai bel nogut long yumi ol Witnes. Sapos meri bilong haus i kam na em i holim wanpela sospen samting long han bilong em na yumi harim smel bilong kaikai, yumi ken save tru, em i gat wok. Olsem na yumi mas tingting gut na skelim gut ol samting yumi mas mekim. Yumi mas tingim em na no ken strong long toktok wantaim em long dispela taim. Gutpela sapos yumi lusim wanpela liklik nius long em na tokim em bai yumi kam bek narapela taim na lukim em. Sapos yumi mekim olsem ating bai em i amamas long pasin bilong yumi ol Witnes, na bihain sapos sampela Witnes i go long haus bilong em, ating bai em i putim yau long tok bilong ol.
OL SAMTING YUMI MAS MEKIM TAIM MAN I KROS SAMTING
4 Sampela taim yumi save bungim ol man ol i pes drai na ol i no amamas long yumi kam long haus bilong ol. Orait, yumi ken mekim wanem? Sindaun 17:27 i tok: “Man i gat gutpela tingting, em i no save belhat kwik.” Em i gutpela tok tru, a? Sapos yumi mekim tok isi, dispela i save mekim kol bel bilong man na em i no kros moa. Na tu, sapos long pasin isi yumi inap kirapim em long kamapim tingting bilong em long wanpela samting i olsem bikpela samting long em, ating dispela bai daunim kros bilong em. Na sapos em i katim tok bilong yumi na yumi no inap autim tok long em, ating gutpela tok isi bilong yumi bai mekim na bihain bai em i gat stretpela tingting liklik long wok bilong ol Witnes Bilong Jehova. Sapos olsem, em gutpela tru, a? Tasol sapos yumi mekim tok isi na bel bilong man i kirap na em i kros tru, orait gutpela sapos isi tasol yumi lusim em, na sapos rot i op ating bai yumi ken traim autim tok long em long narapela taim.
5 Tasol sampela man i narapela kain—tru ol i laik tok pait, tasol ol i gat gutpela bel. Taim yumi bungim kain man olsem, nogut yumi les kwik long ol na lusim ol. Sapos yumi gat gutpela tingting, orait maski em i strong long kamapim bilip bilong em na em i no wanbel long ol tok bilong yumi, yumi no ken ting em i no laik harim. Long pasin isi yumi ken askim em long as bilong dispela bilip bilong em, na nau yumi ken kamapim sampela tok bilong Baibel long dispela samting. (Snd 20:5) Sapos em i tok wanem long dispela, orait yumi ken skelim—bai yumi mekim sampela tok moa o bai yumi lusim em.
6 Sapos pablisa i tingting gut, em bai save i gat sampela samting i mekim na man bilong haus inap senisim tingting bilong em long ol tok bilong Kingdom yumi autim. Olsem na narapela taim yumi go long haus bilong em, ating bai em i putim yau long tok bilong yumi. Yumi no ken ting sapos yumi go bek lukim em gen, bai em i nolaik yet long harim tok bilong yumi, long wanem em i bin mekim olsem long namba wan taim—yumi no ken ting olsem.
7 Tru i hatwok long yumi skelim gut samting yumi mas mekim—bai yumi stap liklik na toktok moa wantaim em o bai yumi lusim em. Tasol sapos yumi wok long lain gut long pasin bilong skulim man, orait bai yumi mekim gutpela wok moa long bihainim gutpela tingting taim yumi autim tok, na bai yumi wetim Jehova i mekim wok bilong yumi i kamap gutpela.—1 Ko 3:6; Ta 1:9.
[Ol Askim]
1. (a) Sindaun 19:8 i givim wanem gutpela tok long yumi? (b) Olsem wanem dispela tok i kamap tru taim yumi autim tok?
2. Taim man i tok “Mi gat wok,” yumi ken mekim wanem?
3. Sapos tru man o meri bilong haus i gat planti wok, yumi ken mekim wanem na bai em i ken amamas long yumi ol Witnes?
4. Sapos man i kros o em i no laikim ol Witnes, yumi ken mekim wanem bilong bihainim gutpela tingting?
5. (a) Sapos man i gat narapela bilip na em i strong long kamapim dispela bilip, yumi ken mekim wanem bilong bihainim gutpela tingting? (b) Olsem wanem gutpela tok bilong Sindaun 20:5 inap helpim yumi long kain taim olsem?
6, 7. (a) Pablisa i ken bihainim wanem gutpela tingting taim em i go long wanpela haus em pastaim man bilong haus i kros na i no laik harim tok bilong yumi? (b) Long 1 Korin 3:6 na Taitus 1:9, aposel Pol i givim wanem gutpela tok long yumi long dispela samting?