Buk-Stadi Bilong Kongrigesen
Namba 4 Hap: Wok Yet Long Strongim Ol Narapela
1 Olgeta brata sista i stap long Buk-Stadi ol i ken helpim ol narapela long dispela grup long kamap strong long samting bilong spirit. Yumi olgeta i laik bihainim tok bilong Baibel olsem, “kirapim ol long laikim ol arapela na mekim ol gutpela pasin long ol. . . . De bilong Krais em i kam klostu. Olsem na yumi wan wan i mas wok strong moa long strongim bel bilong ol arapela.”—Hi 10:24, 25.
2 Narapela i Helpim Narapela: Olgeta long grup ol i ken wok long kamapim pasin olsem pren gut wantaim. Taim narapela i tingim narapela, bai grup i pas gut wantaim. Galesia 6:10 i tok yumi mas wok “strong tru long mekim gutpela pasin long ol arapela manmeri i bilip long Bikpela.” Olsem wanem? Taim sampela bilong grup i gat sik o ol i no i kam long grup, yu save long dispela? Ating yu ken telefon long ol o go lukim ol samting. Taim yumi mekim kain gutpela pasin olsem long ol narapela brata sista long grup, dispela i mekim na yumi olgeta i pas gut wantaim.
3 Hevi i save painim yumi long olgeta de, na yumi gat wok long lukautim famili bilong yumi tu. Olsem wanem? Sampela taim i mas i gat man bilong helpim yu long karim ol dispela hevi? Taim yu go long miting, yu no ken tok gude tasol long ol brata sista, gutpela sapos yu toktok gut wantaim ol. Ating sampela i sem liklik long toktok wantaim narapela man, tasol sapos yu go toktok wantaim ol bai ol i amamas. (uw-MP pes 137, 138) Aposel Pol i tokim ol Kristen ol i mas “strongim bel bilong ol man i save pret na . . . helpim ol man i no strong. Na . . . isi isi long olgeta man.” (1 Te 5:14) Sapos wanpela man i gat sik o em i bel hevi, na sampela wantok i go lukim em, dispela samting i save mekim gut bel bilong em! Sapos man i save yumi tingim em, em bai amamas.
4 Na yumi mas tingting long wok gut wantaim kongrigesen na go long ol bung bilong i go autim tok em kongrigesen i makim. Yumi mas tingting long autim tok wantaim narapela narapela long grup bilong yumi. (2 Ko 6:11-13; 12:15) Ating long sampela sampela taim, brata i lukautim grup em bai tokim yumi long helpim narapela pablisa. Bai yumi mekim wanem? Taim ol pablisa na painia i wok wantaim narapela narapela long autim tok na mekim ol gobek na Baibel-stadi, dispela samting bai helpim grup olgeta.
5 Makim Gutpela Pasin Ol Narapela Inap Bihainim: I gat sampela samting moa yumi inap mekim bilong helpim Buk-Stadi. Pasin bilong yu i bikpela samting. Sapos yu bilas gut taim yu go long Buk-Stadi wankain olsem yu bilas bilong i go long Haus Kingdom, dispela i kamapim bel bilong yu olsem yu pilim tru dispela miting. Sapos yu bilas gut, yu makim gutpela pasin bilong ol narapela i kam long dispela Buk-Stadi, em sampela i no save bilas gut. Na sapos yumi bihainim pasin sori, bai yumi kamap long dispela miting long taim stret na bai yumi no pulim ai na tingting bilong ol brata sista i sindaun pinis bilong harim tok.
6 Long rot bilong oganaisesen bilong em, Jehova i stretim rot bilong mekim ol Buk-Stadi, olsem na yumi mas wok gut wantaim oganaisesen bilong em. (Ais 40:11) Taim yumi bung long Buk-Stadi, narapela inap helpim gut narapela na yumi kisim ol gutpela kaikai bilong spirit bilong strongim yumi. Olsem na gutpela sapos yumi olgeta i mekim olsem 1 Tesalonaika 5:11 i tok: “Yupela wan wan i mas givim gutpela tok long ol arapela manmeri bilong God na strongim bel bilong ol, olsem nau yupela i save mekim.”
[Ol Askim]
1. Olsem wanem olgeta brata sista, ol yangpela tu, inap helpim olgeta wan wan long grup? Tok bilong Hibru 10:24, 25 i kirapim yumi long mekim wanem long ol miting?
2. Kaunim Galesia 6:10. Olsem wanem yumi inap bihainim dispela tok long grup bilong yumi?
3. Olsem wanem yumi inap helpim (a) man bilong sem? (b) man i bel hevi? (c) ol man i gat sik em ol i save kam long grup bilong yumi?
4. Olsem wanem narapela inap helpim narapela long mekim wok bilong autim tok na kamapim ol disaipel?
5. (a) Taim yumi bilas gut bilong i go long Buk-Stadi, yumi makim wanem gutpela pasin? (b) Sapos yumi kamap long dispela miting long taim stret, yumi bihainim wanem kain pasin?
6. Sapos yumi olgeta i wok gut wantaim long helpim Buk-Stadi, olsem wanem bai yumi inap bihainim moa yet tok bilong 1 Tesalonaika 5:11?