Mekim Ol Tok Ol Man i Ken Pilim Tru na Bai Ol i Laik Harim
1 Bilong kirapim man long pilim tru tok na bai em i laik harim, yu mas toktok long ol samting em i gat tingting long en na bai ol tok bilong yu inap helpim em. Taim yu toktok, helpim man bilong haus long save olsem wanem dispela tok inap helpim em. Taim yu redim ol tok yu laik mekim, gutpela sapos yu givim ol dispela askim long yu yet olsem: ‘Ol man long teritori bilong mi i tingting planti long wanem ol samting? Wanem ol tok inap helpim ol? Olsem wanem ol tok mi mekim inap kamapim klia olsem Jehova i tingim ol?’ Daunbilo mipela i kolim sampela samting ol man long nau i save tingting planti long en. Olsem wanem? Taim yu autim tok, yu inap mekim wok long sampela tok hia o long kain tok olsem? Tingim tu ol tok samting bilong buklet yu inap kamapim bilong helpim dispela tok.
2 Tingting Planti Long Ol Man i No Stap Amamas: “Mipela i toktok wantaim ol man i laik tru bai yumi i ken i stap amamas. Tru planti man ol i gat ol samting bilong skin, tasol ol i no stap amamas tru. Olsem wanem? Yu ting i gat rot bilong i stap amamas tru? [Larim man i bekim tok.] Long Kamapim Tok Hait 1:3, Baibel i stori long wanpela samting em inap helpim yu long i stap amamas tru. [Kaunim] Sapos yumi kisim gut ol tok bilong Kamapim Tok Hait i stori long ol samting i mas kamap bihain, orait, dispela inap helpim yumi long i stap amamas. Gutpela yumi lukim wanpela tok profet bilong Kamapim Tok Hait.” Kaunim Kamapim Tok Hait 21:3, 4, na soim man bilong haus ol piksa i stap long pes 17 long buklet “Harim!”
3 Tingting Planti Long Ol Samting Bai Kamap Bihain: “Mipela i laik helpim ol man long kisim tingting olsem, gutpela samting i mas kamap bihain. Yu yet yu gat dispela kain tingting? [Larim man i bekim tok.] Long Sindaun 3:5, 6, Baibel i tok i gat as na yumi ken ting olsem, gutpela samting bai kamap bihain.”
4 Tingting Planti Long Helpim Skin i Stap Strong: “Planti man long hap bilong yumi i laik mekim ol samting bambai skin bilong ol i ken i stap strong, no gat sik. Tasol sik i save kisim yumi, maski yumi mekim sampela samting bilong abrusim. Olsem wanem? Yu laik stap long wanpela taim em skin bilong olgeta man bai stap strong, no gat sik? Ating i hatwok long bilip olsem, tasol long Kamapim Tok Hait, Baibel i tok dispela samting bai kamap liklik taim bihain.” Kaunim Kamapim Tok Hait 21:3, 4. Opim buklet Stap Amamas long pes 47-49 na soim ol piksa long em. Ol dispela piksa i makim kain sindaun ol man inap kisim taim Krais Jisas i bosim dispela graun.
5 Tingting Planti Long Pasin Bilong Bagarapim Graun: “Mipela i bin toktok wantaim ol man long dispela hap, na mipela i kisim save olsem planti man i tingting planti long ol marasin nogut samting i bagarapim win, na wara, na kaikai. Yu ting i gat wanpela gavman inap stretim dispela hevi? [Larim man i bekim tok.] Tok bilong Baibel inap strongim bel bilong yumi, long wanem, em i stori long ol samting bai painim ol man i wok long bagarapim graun.” Kaunim Kamapim Tok Hait 11:18b. Tokim man bilong haus olsem God bai pinisim ol man i wok long bagarapim graun, na tu, God i laik bai ol man i gat pasin daun ol i ken kamapim paradais long graun, olsem Buk Song 37:10, 11 o Aisaia 65:21, 22 i tok. Nau yu ken tilim buklet Gavman long em, na kamapim sampela tok i stap long pes 3.
6 Man i Tingim Ol Samting Bilong Lotu: “Mipela i bin kamapim wanpela askim long ol man i stap long hap bilong yu, em olsem: ‘Yu ting olgeta gutpela man bai go long heven?’ [Larim man i bekim tok.] Planti ol i gat wankain tingting olsem yu, tasol lukim tok bilong Buk Song 37:10, 11 i tok ‘ol man i daunim nem bilong ol yet bai God i givim graun long ol.’ Dispela buklet Stap Amamas Oltaim Long Graun i kamapim insait bilong dispela tok.”
7 Taim yu wok strong long putim tok i go daun long bel bilong man, orait ol man i laikim tumas tok i tru na stretpela pasin bai ol i pilim tru na bai ol i laik harim.—Mt 5:3, 6.