Singautim Olgeta Man Em Nek Bilong Ol i Drai
1 Olsem profet Amos i bin tok, ol manmeri bilong nau bai i hangre tumas long harim tok bilong Jehova. (Amo 8:11) Bilong helpim ol man i stap nogut long ol samting bilong spirit, yumi save tokim ol long ol samting God i mekim bilong helpim ol manmeri bambai sin na indai i no ken bagarapim ol. “Wara bilong givim laip,” em laspela sapta bilong Buk Kamapim Tok Hait i stori long en em i tok piksa bilong makim dispela samting. Yumi gat gutpela wok tru bilong singautim ol man em nek bilong ol i drai tru long stretpela pasin bai ol i ken kam na kisim nating “wara bilong givim laip.” (KTH 22:1, 17) Olsem wanem yumi ken mekim dispela samting long mun Februeri? Yumi ken tilim buk Kamapim Tok Hait—Bikpela Samting Bilong En i Laik Kamap! long ol. Ating yu laik traim long mekim ol dispela tok:
2 Planti manmeri i tingting planti long ol sik, olsem na ating taim yu mekim dispela tok, ol gutpela samting inap kamap:
◼ “Planti manmeri i tingting planti, long wanem, yumi sot long ol gutpela haus sik na ol marasin samting. Ating yu bin tingting long dispela samting? [Larim man i bekim tok.] Yu ting i gat rot bilong stretim tru dispela hevi? [Wet long bekim bilong em.] Tingim dispela gutpela samting bai kamap.” Kaunim Kamapim Tok Hait 22:1, 2. Nau opim buk Kamapim Tok Hait long piksa i stap long pes 308-309, na mekim wok long ol tok bilong paragraf 22 long pes 311 bilong kamapim insait bilong en. Bilong pinisim tok, yu ken tok olsem: “Dispela buk i stori long olgeta ves bilong Buk Kamapim Tok Hait na yu inap kisim wanpela long K4.00 tasol.” Stretim rot bilong go bek lukim em.
3 Taim yu mekim gobek, bilong kirapim gen stori bilong yupela, yu ken tok olsem:
◼ “Las taim mi kam lukim yu, yumi bin toktok long rot bilong pinisim tru ol sik. Yu ting wanpela taim bai kamap na bai i no gat sik moa? [Larim man i bekim tok.] Tingim dispela gutpela tok hia.” Kaunim Aisaia 33:24. Nau opim buklet Yumi Mas Mekim Wanem? long Stadi 5, na stori long paragraf 5 na 6. Kamapim ol askim i stap long kirap bilong Stadi na opim sampela bilong ol skripsa long Baibel. Tokim man, wok bilong pinisim tru sik na indai, em bai truim laik bilong God bilong pastaim. Stretim rot bilong go bek na stori long paragraf 1-4 na 7 bilong dispela Stadi. Tokim em, em inap kisim buklet long 50 toea tasol.
4 Sapos wanpela man i bin indai wantu tasol na ol man i tingim dispela samting, ating yu inap traim dispela tok:
◼ “Ating yu bin harim olsem [kamapim stori bilong nius]. Taim ol man i dai wantu tasol, planti man i save tingting planti long olsem wanem yumi ken mekim gut bel bilong famili bilong man i dai pinis. Yu gat wanem tingting long dispela?” Larim man i bekim tok. Opim buk Kamapim Tok Hait long pes 299 na soim em piksa bilong kirap bek. Stori moa olsem: “Planti man i kirap nogut long save olsem ol gutpela man na ol man nogut wantaim bai kirap bek na i stap laip long Paradais long graun. [Kaunim Aposel 24:15 olsem buk i kamapim long pes 297, paragraf 9, na nau kamapim insait bilong dispela tok olsem i stap long paragraf 10.] Dispela buk i stori long planti narapela gutpela samting God bai mekim long bihain. Sapos yu laik kisim sampela save moa, yu inap kisim dispela buk long K4.00 tasol.” Tingim gut ol samting man i amamas long en na ol samting em i tingting planti long en, na stretim rot bilong i go bek lukim em.
5 Taim yu go bek, mekim ol tok i stret long man bilong haus. Ating yu ken tok olsem:
◼ “Long las taim mitupela i bin toktok, mi bin amamas long wanpela tok yu mekim long ol samting God bai mekim long graun. [Kolim gen tok bilong em.] Mi painim sampela tok mi save bai yu amamas long harim.” Opim buklet Yumi Mas Mekim Wanem? long Stadi 5. Kaunim na stori long sampela paragraf long dispela Stadi, kaunim sampela paragraf moa sapos man i amamas long harim sampela tok moa. Tilim buklet long 50 toea na makim taim bilong go bek na stori moa long ol tok bilong dispela Stadi. Sapos yu gat pepa bilong singautim ol man long kam long ol miting bilong kongrigesen, givim wanpela long em. Stori long Miting Bilong Pablik-Tok na singautim em long i kam.
6 Sapos yu laik mekim wanpela tok i no hatwok na tilim wanpela liklik nius, yu inap tok olsem:
◼ “Mi laik bai yu kisim dispela liklik nius nem bilong en I Gat Gutpela Samting Bai Painim Ol Man i Dai Pinis?” Givim wanpela long man bilong haus na askim em long lukim ol tok taim yu kaunim namba wan paragraf. Larim em i kamapim sampela tingting long askim i stap long laspela sentens. Kaunim namba tu paragraf, na bihain opim buk Kamapim Tok Hait long piksa i stap long pes 299. Stori moa olsem: “Dispela buk i stori moa long ol samting bilong kirap bek na long ol narapela gutpela tok promis bilong Baibel long ol samting bai kamap long bihain. Yu inap kisim dispela buk long K4.00 tasol.” Stretim rot bilong mekim gobek.
7 Sapos yumi bihainim ol gutpela pasin bilong singautim ol man, dispela inap kirapim ol long kam kisim wara bilong laip, em Jehova i redim long nau. Olsem na yumi ken tokim olgeta man em nek bilong ol i drai, ‘Yupela kam.’—KTH 22:17.