Autim ‘Dispela Tok Profet’
1 Long taim bilong yumi truim bilong ol tok profet bilong Kamapim Tok Hait i kamap. Planti man i laik save long as bilong ol hevi bilong nau. Sapos ol i ‘harim dispela tok profet’ bilong Kamapim Tok Hait, dispela bai helpim ol. (KTH 1:3) Long mun Mas yumi tilim buk Kamapim Tok Hait, na long dispela rot bai yumi inap helpim ol. Taim yumi tilim dispela buk, yumi mas tingim dispela samting: Kamapim Tok Hait i tok profet long ol hevi i painim ol man long nau. Orait, bai yumi tok wanem?
2 Yu ken tok olsem:
◼ “Pait, na hangre, na sik, i bin painim planti manmeri long taim bilong yumi. Tasol ol saveman i bin wokim kain kain samting bilong helpim ol man, olsem na bilong wanem i gat ol dispela hevi? [Larim man i bekim tok.] Planti man i kirap nogut taim ol i save Baibel i tok profet long ol dispela hevi. Ating yu bin harim man i stori long ‘fopela man i raun long fopela hos.’ Em wanpela tok profet Baibel i stori long en, na ol samting i kamap long nau i truim dispela tok profet. [Opim buk Kamapim Tok Hait long sapta 16, na soim ol piksa long pes 91-97.] Tru, dispela tok profet i stori long taim bilong bikpela hevi bai kamap, tasol i stori tu long ol gutpela samting bai kamap bihain. [Kaunim KTH 6:2 long paragraf 3.] Man i raun long waitpela hos em Krais Jisas. Em i tokim yumi long beten long Kingdom i mas i kam, na long rot bilong dispela Kingdom em bai pinisim ol pasin nogut na kamapim gutaim na amamas.” Tilim buk.
3 Ating dispela askim bai helpim yu long kirapim tok wantaim man:
◼ “Yu ting wanem samting inap mekim na bai pasin nogut i ken pinis? [Larim man i bekim tok.] Planti man i ting olsem, bilong ol man i ken abrusim bagarap, i mas i gat sampela bikpela senis. Baibel i kamapim klia olsem God i save long rot bilong stretim ol hevi bilong yumi na em i bin tok promis long helpim yumi.” Opim buk Kamapim Tok Hait, pes 171, na kaunim KTH 11:15 long paragraf 1. Lukim ol piksa long pes 302 na 308, na stori long ol gutpela samting Kingdom long han bilong Krais bai kamapim. Helpim man long save olsem wanem em i ken kisim ol dispela gutpela samting.
4 Yu ken mekim tok olsem:
◼ “Taim planti man i kaunim hap bilong Baibel yumi kolim Kamapim Tok Hait ol i hatwok long kisim gut ol tok bilong en. Em i stori long ol bikpela samting i kamap i narapela narapela kain. Dispela buk, Kamapim Tok Hait—Bikpela Samting Bilong En i Laik Kamap!, i stori long olgeta wan wan ves bilong Kamapim Tok Hait, na i stori long ol samting truim bilong ol tok profet bilong en bai mekim long yumi ol wan wan.” Opim buk long pes 15, paragraf 2, na makim long pinga KTH 1:1 i stap long strongpela blakpela rait. Helpim man long save, buk i stori long olgeta wan wan ves bilong Kamapim Tok Hait na dispela bai helpim em long kisim gut as bilong ol tok profet bilong en. Tilim buk.
5 Ol tok bilong Kamapim Tok Hait bai mekim sampela samting long olgeta man. Olgeta man i mas harim ol tok bilong dispela tok profet. Yumi mas wok strong long autim dispela bikpela tok.