Helpim Ol Narapela Long “Bihainim”
1 Ol man i mas “bihainim” ol tok profet i stap long Buk Kamapim Tok Hait na bai dispela tok i ken helpim ol; i no inap ol i “harim” tasol, nogat. (KTH 1:3) Wok bilong tilim buk samting, em olsem namba wan samting tasol long wok bilong kamapim disaipel. Taim yumi painim pinis ol man i laik harim tok, kwiktaim yumi mas go bek helpim ol long kisim sampela save moa. Taim yumi go bek, yumi ken tok wanem?
2 Sapos yu bin stori long fopela man i raun long hos taim yu autim tok long man long namba wan taim, yu ken kirapim tok olsem:
◼ “Taim mi bin kam lukim yu, yumi bin stori long hap bilong Baibel yumi kolim Kamapim Tok Hait na olsem wanem ol samting i kamap long nau i truim ol tok profet bilong en. Kamapim Tok Hait sapta 6 i tok piksa long fopela man i raun long hos na dispela i mekim na planti hevi i kamap long graun. Yumi lukim pinis ol dispela samting. Planti man i laik save, wanem taim bai ol dispela hevi i pinis na bai gutaim i ken kamap long graun. Wanem tingting bilong yu? [Larim man i bekim tok.] Ol disaipel bilong Jisas i laik save long bekim bilong dispela askim.” Kaunim dispela askim long Matyu 24:3, na bihain kaunim bekim bilong Jisas long ves 34. Sapos man i putim gut yau, stori moa long taim bilong las de.
3 Sapos yu bin stori long Kingdom bilong God na yu laik stori moa long dispela samting, yu ken kamapim askim olsem:
◼ “Yu ting wanem kain gavman inap helpim man long kisim gutpela sindaun? [Larim man i bekim tok. Kaunim Jeremaia 10:23.] Olsem na yumi save, God i no wokim man bilong bosim wokabaut bilong em yet, nogat. Planti man i mekim traim na ol i maski long God, na dispela i as bilong planti hevi bilong yumi ol man. Kingdom bilong God, olsem gavman bilong em, em tasol inap helpim ol man.” Stori long ol tok bilong Maika 4:4 na Song 37:10, 11. Bilong kamapim sampela tok moa, stori bilong wanem yumi ken bilip tru long God.
4 Bilong kirapim tok bilong Baibel yu ken mekim dispela samting:
◼ Soim piksa i stap long pes 302 bilong buk Kamapim Tok Hait, na tok: “Ol man bai kisim ol dispela gutpela samting taim laik bilong God i kamap long graun olsem i kamap long heven. Tasol sampela man i ting, pasin nogut bai kamap gen long graun. Tasol nogat, long wanem, ol man nogut i no ken i stap moa.” Kaunim Song 37:10, 11. Tokim man yu laik stadi wantaim em long Baibel na bai em i ken kisim sampela save moa.
5 Sapos man i kisim liklik nius “Gutpela Sindaun Long Nupela Taim,” makim long pinga piksa i stap long skin bilong nius na nau kaunim paragraf 1 aninit long het-tok, “I Stap Bilong Man Long Nupela Taim God Bai Kamapim.” Orait, nau tok:
◼ “Sapos yumi laik stap long kain ples olsem, i gat wanpela bikpela samting yumi mas mekim.” Kaunim laspela paragraf, na tilim buk Kamapim Tok Hait.
6 Wok bilong yumi em bilong kirapim ol Baibel-stadi, olsem na yumi mas mekim gut ol gobek. Makim hap taim bilong mekim olsem, na redi gut pastaim. Long dispela rot bai yumi inap helpim ol man i gat gutpela bel.—KTH 22:6, 7.