Helpim Ol Long Kisim Gut Save
1 Aposel Pita i tok, sampela tok i stap long Baibel i “hatwok long save gut long as bilong [en].” (2 Pi 3:16) Planti man i gat dispela kain tingting long Buk Kamapim Tok Hait. Tasol, buk Kamapim Tok Hait—Bikpela Samting Bilong En i Laik Kamap! i bin kamapim klia insait bilong ol tok bilong en. Olsem wanem yumi inap helpim ol nupela man long mekim gutpela wok long dispela buk?
2 Sapos long namba wan taim yu bin lukim man yu bin stori long Kamapim Tok Hait 1:3, orait dispela tok inap kirapim gen laik bilong em long harim tok:
◼ “Bipo yumi bin stori long olsem wanem man i kisim gut insait bilong ol tok long Buk Kamapim Tok Hait i ken i stap amamas. Tasol dispela amamas i no save kamap nating, nogat. Bilong kisim yumi mas mekim tupela samting, olsem: Yumi mas stadi long Baibel, na bihainim ol tok yumi lainim.” Kaunim na stori long Jems 1:25. Opim buk long paragraf 9 long pes 8, na stori long olsem wanem insait yumi kisim long ol tok bilong Buk Kamapim Tok Hait i ken helpim yumi long save long rot bilong i stap amamas long Paradais long nupela taim.
3 Sapos yu bin mekim wok long piksa long pes 302 bilong soim olsem Kingdom bilong God bai pinisim ol hevi, yu ken opim buk gen long dispela pes na mekim tok olsem:
◼ “Yumi bin stori long ol gutpela samting ol manmeri bai amamas long en taim Kingdom bilong God i bosim graun. Yu ting yumi mas mekim wanem sapos yumi laik i stap long dispela taim? [Larim man i bekim tok.] Sampela manmeri long bipo i makim gutpela pasin yumi ken bihainim.” Kaunim Aposel 17:11, na strongim dispela tok, ‘long olgeta de ol i skelim tok i stap long buk bilong God.’ Tokim man olsem, ol Witnes Bilong Jehova i wok long helpim ol man i gat gutpela bel long hap bilong em long stadi long Baibel na kisim gut save long en.
4 Sapos yu bin lusim liklik nius “Ol Man Bilong Graun Bai Abrusim Bagarap o Nogat?” long wanpela man i gat planti wok na yupela i no bin toktok gut wantaim, yu ken tok olsem:
◼ “Taim mi bin kam lukim yu bipo, yu bin mekim planti wok. Mi bin lusim wanpela liklik nius long yu i gat askim long yumi inap abrusim bagarap o nogat long dispela taim nogut. Yumi bin kaunim KTH 21:4, na tok bilong en i stap long dispela buk, Kamapim Tok Hait—Bikpela Samting Bilong En i Laik Kamap! [Kaunim skripsa long paragraf 6 long pes 303.] Dispela piksa hia [long pes 302] inap givim sampela tingting long yu long wanem kain sindaun ol man bai kisim taim ‘God i mekim drai aiwara i stap long ai bilong yumi olgeta manmeri.’ Dispela buk i kamapim ol gutpela as na yumi ken bilip olsem dispela tok promis bai kamap tru liklik taim bihain. Sapos yu laik kaunim, yu ken kisim dispela buk long K4.00 tasol.”
5 Sapos yu painim wanpela man i amamas long kisim save, bihain yu ken soim em buk Save i Bringim Man Long Laip Oltaim na mekim wok long en bilong kirapim stadi. Yu bai kisim bikpela amamas long “givim tingting long man i no gat planti save.”—Sng 119:130.