Litimapim Nem Bilong Jehova Long “Olgeta De”
1 Long Song 145:2, King Devit i tok promis long Jehova: “Olgeta de bai mi tenkyu long yu. Na oltaim oltaim bai mi litimapim nem bilong yu.” I gat as na yumi tu i mas tenkyu na litimapim nem bilong Papa bilong yumi long heven! Tasol olsem wanem yumi ken bihainim pasin bilong Devit long litimapim wok king bilong Jehova long “olgeta de”?
2 Bel i Mas Pilim Tru Ol Gutpela Pasin Bilong Jehova: Sapos yumi stadi oltaim long Baibel, bai yumi pilim moa yet ol samting Jehova i bin mekim, na ol samting em i mekim long nau, na ol samting em bai mekim long bihain bilong helpim yumi. Taim yumi kisim sampela save moa long ol gutpela wok bilong em, dispela bai kirapim yumi long stori moa long ol gutpela pasin bilong em. (Sng 145:7) Bai yumi amamas tru long litimapim nem bilong Jehova long olgeta taim i stret long yumi mekim olsem.
3 Litimapim Nem Bilong Jehova Taim Yumi Toktok Wantaim Ol Narapela: Taim yumi toktok wantaim ol wantok, na ol wanskul, na ol wanwok, na ol narapela man yumi bungim long olgeta de, ating bai yumi gat rot long autim tok long ol. Ating wanpela wantok bai kamapim tok olsem em i tingting planti long ol pasin nogut long hap bilong em, o ating wanpela wanskul em i tingting planti long ol wanskul i kisim drak na mekim pasin pamuk, o ating wanpela wanwok bai kamapim tingting bilong em long samting bilong wok politik. Yumi ken kamapim ol lo na ol tok promis bilong God long Baibel bilong helpim ol long save long ol samting ol i mas mekim long nau na long rot tru bilong stretim ol dispela hevi. Sapos yumi mekim kain tok olsem long “gutpela taim” bilong en, dispela bai helpim ol!—Snd 15:23.
4 Toktok Long Jehova Long Olgeta De: Sapos man i laikim tru ol gutpela pasin bilong Jehova, bai em i gat laik long autim gutnius long planti planti man. (Sng 40:8-10) Olsem na yumi mas askim yumi yet, ‘Mi mekim bikpela wok inap long skel bilong mi?’ Planti brata sista i bin stretim sampela samting bilong ol na nau ol i mekim wok painia oltaim. Sapos long nau yu no inap mekim wok painia oltaim, yu ting yu inap mekim wok painia haptaim? Taim bilong Memorial em i taim bilong mekim bikpela wok moa, olsem na mun Mas na Epril em i gutpela taim bilong mekim wok painia haptaim.
5 Helpim Ol Nupela Long Litimapim Nem Bilong Jehova: Memorial bilong tingim i dai bilong Jisas i save kirapim yumi long tingim ol as na yumi mas tenkyu long Jehova na litimapim nem bilong Em. Dispela em i gutpela taim bilong kirapim ol Baibel-stadi bilong yumi na bai ol i ken helpim yumi long tokim ol narapela long wok king bilong Jehova. Kirapim ol long beten na tingim ol tok i stap long paragraf 7-9 long pes 173-175 bilong buk Save i Bringim Man Long Laip Oltaim. Sapos ol inapim ol mak bilong pablisa, ol i no ken surik long autim tok long wanem ol i no gat planti save, nogat. I gat ol strongpela pablisa i stap bilong helpim ol long pasin bilong autim tok bilong Kingdom. Sapos ol nupela i strongim bel na ol i no pret long autim gutnius, ol i ken bilip olsem Jehova bai helpim ol.—Ap 4:31; 1 Te 2:2.
6 Taim yumi wok long litimapim nem bilong Jehova long olgeta de, yumi inap helpim yumi yet na ol narapela man long kisim ol gutpela samting bilong oltaim.