Yumi Mas Litimapim Nem Bilong Jehova
Kaikai Bilong Bikpela Bai Kamap Long Epril 16
1 Yumi amamas long Epril 16, 2003 i wok long kam klostu. Long dispela nait, yumi bai tingim indai bilong Jisas, na bai yumi bung wantaim planti milion wanlotu bilong yumi ol i stap long olgeta hap na bai yumi litimapim nem bilong Jehova. I stret yumi litimapim nem bilong Jehova, long wanem, em i bin stretim rot bilong givim pe bilong baim bek yumi. Long rot bilong dispela pe bilong baim bek yumi, em bai kamapim planti gutpela blesing long olgeta man i bihainim tok. Yumi wanbel tru wantaim man bilong raitim song na tokaut olsem: “Bikpela i gat biknem na yumi mas litimapim biknem bilong em moa yet.”—Sng. 145:3.
2 Taim bilong Memorial em i taim bilong tingim tingim long bel ol gutpela pasin bilong God na long yumi mas tenkyu long Jehova long em i bin salim dispela “wanpela Pikinini tasol” bilong em “i kam long graun, bai yumi kisim laip long em.” (1 Jo. 4:9, 10) Yumi bihainim tok na mekim Kaikai Bilong Bikpela, dispela bai strongim tru bel bilong yumi olsem “Bikpela i save laikim yumi tumas na i save marimari long yumi . . . na oltaim em i save sori long yumi.” (Sng. 145:8) Tru tumas, pe bilong baim bek man em nambawan bikpela samting Jehova i mekim bilong kamapim klia olsem em i save laikim tru ol man. (Jo. 3:16) God i save laikim yumi tru, taim yumi tingim dispela samting na pasin bilong Jisas long i stap gut long God, dispela i kirapim yumi long litimapim nem bilong Jehova. Inap oltaim oltaim, yumi bai litimapim nem bilong em, long wanem, em i laikim yumi tru na opim rot bilong yumi inap kisim laip oltaim.—Sng. 145:1, 2.
3 Helpim Ol Narapela Long Litimapim Nem Bilong Jehova: Yumi tenkyu tru long nambawan gutpela presen bilong God long baim bek ol man, na dispela i save kirapim yumi long singautim ol narapela i kam bung wantaim yumi na litimapim nem bilong Jehova. Spirit holi i bin kirapim man bilong raitim song long tok: “Ol bai i stori long ol gutpela pasin bilong yu na ol bai i singim song long marimari bilong yu.” (Sng. 145:7) Long yia i go pinis, ol Witnes Bilong Jehova long olgeta hap ol i bin lusim planti aua tru, winim wan bilion, long wok autim tok. Wok bilong ol i bin kamapim wanem samting? Long olgeta wik, averes namba bilong ol man i kisim baptais bilong makim olsem ol i dediket pinis long Jehova, em i winim 5,100. Inap 15,597,746 manmeri i bin bung long Memorial, na winim 9 milion bilong ol em ol i no kirap yet long litimapim nem bilong Jehova na kamap pablisa bilong autim gutnius. Em nau, dispela i soim olsem lain bilong yumi inap go bikpela moa yet! Yumi ol manmeri bilong autim tok bilong Kingdom, yumi tingim gut tru wok bilong yumi long autim gutnius na stiaim ol narapela i kam long Jehova, Pikinini bilong em, na Kingdom.
4 Wanpela gutpela rot tru bilong kirapim ol narapela long givim biknem long Jehova em long singautim ol i kam bung wantaim yumi long mekim Kaikai Bilong Bikpela. Olsem wanem? Yu wokim pinis wanpela lista bilong ol man yu laik singautim i kam na bilong ol man em yu mas kirapim ol long tingim gen de na taim bilong dispela bung? Yu singautim pinis olgeta man em nem bilong ol i stap long lista bilong yu? Sapos nogat, orait wok strong long mekim olsem insait long dispela hap taim i stap yet. Helpim ol long save gut long as bilong dispela bung. Long taim bilong mekim bung, redi long toktok gut wantaim ol man i kam. Mekim gut bel bilong ol, na kisim ol i go bungim ol narapela tu, na tok amamas long ol i kam long dispela bung.
5 Taim ol nupela man i kam long Memorial, dispela inap kirapim ol long kamap strong long ol samting bilong spirit. Wanpela Baibel-stadi i bin kisim bikpela hevi na dispela i bagarapim tingting bilong em, olsem na em i save hatwok long go long hap i gat planti man, tasol em i bin kam long Memorial. Taim ol i askim em long tingting bilong em long dispela miting, em i tok: “Dispela nait i narapela kain tru na i kirapim laik bilong man long mekim lotu, na mi bin i stap long dispela bung.” Kirap long dispela taim, em i stat long i go long ol miting.
6 Bihain Long Memorial: Yumi ken mekim wanem bilong helpim ol man i laik kisim sampela save moa long kamap ol man bilong litimapim nem bilong Jehova? Ol elda bai tingim gut ol nupela man i kam long Memorial, na ol bai stretim rot long ol pablisa i ken i go lukim ol kwiktaim na kirapim ol long tingim ol nupela samting ol i bin lainim na lukim long Memorial. Ating sampela bai i gat laik long mekim Baibel-stadi. I gutpela tu long singautim ol i kam long ol miting bilong kongrigesen long olgeta wik, long wanem, dispela inap helpim ol long kisim sampela save moa long Baibel.
7 Ol i stretim rot pinis long kirapim ol pablisa i no save autim tok long olgeta mun na ol pablisa i bin lusim wok autim tok long kam oltaim long ol miting. Sapos ol elda i askim yu long helpim wanpela husat i bin lusim wok autim tok long kirap gen long autim tok, orait yu mas redi long mekim olsem. Pasin bilong yumi long tingim tru ol brata bilong yumi i stret wantaim dispela tok bilong Pol: “Wanem taim yumi inap mekim gutpela pasin long ol arapela, yumi mas mekim. Na yumi mas strong tru long mekim gutpela pasin long ol arapela manmeri i bilip long Bikpela.”—Ga. 6:10.
8 Yumi olgeta i ken wok strong long i stap long Memorial long Epril 16. Yumi no laik lus long insait long dispela gutpela bung tru bilong litimapim nem bilong Jehova. Yes, nau na i go inap oltaim oltaim, yumi litimapim nem bilong Jehova long ol bikpela wok em i bin mekim!—Sng. 145:21.