Skul Bilong Wok Autim Tok i Helpim Yu—Hap 2
1 Olsem wanem? Yu kaunim pinis ol lo bilong “Sedyul Bilong Skul Bilong Wok Autim Tok Bilong 1996”? Yu lukim pinis ol senis? Kirap long Janueri i go Epril, sista i mekim Tok Namba 3 bai kisim ol tok long buklet Sampela Tok Bilong Baibel Bilong Toktok Wantaim Ol Man Long En, na Me i go Disemba, sista i ken kisim long nupela buk Save. Brata o sista i mekim Tok Namba 4 em i ken kisim long buk Toktok Gut.
2 Ol Tok: Sista i ken mekim Tok Namba 3. Taim em i kisim tok long buklet Sampela Tok Bilong Baibel Bilong Toktok Wantaim Ol Man Long En, gutpela sapos em i mekim olsem em i autim tok long ol haus o long narapela taim o ples. Taim em i kisim tok long buk Save, em i ken mekim olsem wanpela gobek o Baibel-stadi. Dispela bai helpim gut yumi, long wanem, yumi bai mekim bikpela wok long buk Save bilong mekim ol Baibel-stadi.
3 Sapos sista i mekim olsem wanpela Baibel-stadi, em wantaim helpim bilong em ol i ken sindaun. Mekim sampela liklik tok bilong kirapim kwik stadi, na nau kamapim askim bilong paragraf. Helpim bilong sista i mas mekim olsem em i wanpela meri stret bilong haus. Sapos i gat taim, opim Baibel na kaunim ol skripsa em buk i no bin kamapim tok bilong en. Sista i mas mekim gutpela wok tisa na kirapim meri bilong haus long kamapim tingting bilong em—sista i ken mekim olsem long rot bilong sampela askim na long rot bilong toktok gut wantaim em.
4 Sapos i gat planti skripsa na sista i no inap kamapim olgeta insait long faipela minit, orait, sista i ken mekim wanem? Em i ken stori long sampela skripsa tasol i kamapim klia ol bikpela tok. Sapos i gat wan wan skripsa tasol, orait sista i ken stori gut long ol bikpela tok bilong ol paragraf. Ating wan wan taim tasol, sista i ken kaunim wanpela paragraf o sentens stret long buk na stori long en.
5 Long pinis bilong olgeta wan wan sapta bilong buk Save, i gat blok ol i kolim “Traim Save Bilong Yu.” Sapos laspela paragraf bilong sapta i insait long tok bilong sista, orait sista i ken stori liklik long dispela blok. I gat sampela narapela blok na sapos ol i stap namel long ol paragraf em sista i mas mekim wok long en, orait sista i ken stori long ol dispela tu sapos i gat taim. Sapos i gat kain blok olsem i stap namel long tupela Tok Namba 3, orait sista i mekim Tok Namba 3 paslain, em i ken stori long dispela blok. I gat ol piksa long buk, na sapos piksa i stret long ol tok sista i kamapim, orait em i ken stori liklik long en.
6 Brata o sista i ken mekim Namba 4 Tok. Em i ken kisim long buk Toktok Gut Wantaim Ol Man Long Baibel. Taim wanpela brata i mekim dispela tok em i mas mekim olsem wanpela tok em i givim long kongrigesen. Taim em i redim dispela tok, em i mas tingting long redim bilong givim save long ol brata sista na bilong helpim ol. Sapos wanpela sista i mekim, em i ken mekim olsem Tok Namba 3.
7 Sapos yumi mekim olgeta samting Skul i lainim yumi long en, bai yumi inap mekim gut wok “autim tok” long pasin bilong ‘skulim gut’ ol man.—2 Ti 4:2.