Kamapim Tok Hait—Bikpela Samting Bilong En i Laik Kamap!
1 “Dispela tok em i tok profet i kam long God, na man i ritim dispela tok long ol arapela, em i ken amamas. Na ol manmeri i harim dispela tok na ol manmeri i bihainim dispela tok bilong God mi bin raitim, ol tu i ken amamas, long wanem, taim i laik kamap nau, na ol dispela samting God i tok pinis long mekim, em bai i mekim.” (KTH 1:3) Dispela tok i kamapim klia olsem Buk Kamapim Tok Hait inap helpim tru ol man, na moa yet long nau taim truim bilong planti tok profet bilong dispela buk i wok long kamap. Olsem na i stret yumi kirap stadi long buk Kamapim Tok Hait—Bikpela Samting Bilong En i Laik Kamap! long ol Buk Stadi Bilong Kongrigesen, kirap long wik bilong Ogas 13, 2007.
2 Yumi bin stadi long bipo long buk Kamapim Tok Hait long Buk Stadi Bilong Kongrigesen, tasol bihain long dispela planti samting long dispela graun i bin senis. (1 Ko. 7:31) Na tu, planti husat i bin kam insait long lain bilong autim gutnius bilong Kingdom, ol i no bin insait long dispela stadi we yumi skelim olgeta wan wan ves bilong Buk Kamapim Tok Hait. Taim yumi stadi long buk Kamapim Tok Hait, dispela bai helpim yumi olgeta long was i stap long ol samting i laik kamap.—KTH 16:15.
3 Putim mak long i go long buk stadi long olgeta wan wan wik. Ol tok bilong dispela buk bai helpim yumi long was i stap, na tu, ol tok Jisas i bin salim long 7-pela kongrigesen bai helpim yumi long abrusim olgeta kain samting inap bagarapim yumi long ol samting bilong spirit na wok autim tok bilong yumi.—KTH 1:11, 19.
4 Redi Gut: Paslain long olgeta wan wan buk stadi, ritim ol ves bilong Buk Kamapim Tok Hait em yumi bai skelim long buk stadi. Tingim ol tok bilong Baibel i kamapim mining bilong ol ves. Wok strong long kliagut long ol bikpela tok na bai yu pilim ol dispela tok long bel. (Neh. 8:8, 12) Lusim hap taim bilong tingim tingim ol tok long bel na askim yu yet: ‘Dispela i lainim mi long wanem pasin bilong Jehova na ol samting em i tingting pinis long mekim? Olsem wanem mi ken mekim ol samting i stret wantaim laik bilong God na helpim ol narapela?’
5 “De bilong Bikpela” i bin kirap inap 92 yia i go pinis, long 1914. (KTH 1:10) Ol bikpela samting tru em Buk Kamapim Tok Hait i stori long en, klostu nau ol dispela samting bai kamap. Taim yumi stadi long buk Kamapim Tok Hait, dispela bai givim nupela strong long bel na tingting bilong yumi, na strongim bilip bilong yumi olsem “dispela bikpela de bilong God I Gat Olgeta Strong i kotim ol manmeri” na nupela taim, ol i klostu pinis.—KTH 16:14; 21:4, 5.