Wastaua—Kaikai Bilong Spirit Long Taim Stret
1 Inap 114 yia pinis Wastaua i bin tokim ol man long was gut long ol samting bilong spirit. Magasin Kirap! i strongim ol man long bilip long promis bilong God olsem bel isi na gutpela sindaun bai kamap long nupela graun long taim bilong yumi. Tupela nius wantaim i bin mekim gutpela wok bilong givim lait long yumi long dispela graun i stap long tudak. (Ais 60:2) Tok i tru i stap long Baibel i no save senis, tasol save yumi kisim i kamap klia moa taim Jehova i mekim wok long ol magasin na ol narapela samting bilong givim ‘kaikai long [yumi] long taim bikman i makim.’—Mt 24:45; Snd 4:18.
2 Mekim Gutpela Wok Long Ol Magasin: Bilong kamapim klia olsem yumi amamas long lait bilong ol samting bilong spirit yumi kisim pinis, yumi mas givim bel long kirapim ol narapela long kaunim Wastaua na Kirap! Sapos yumi laik tilim sabskripsen long taim yumi autim tok long ol haus o long taim yumi autim tok long kain kain taim na ples, planti taim ol man i no laik kisim. Tasol ol i amamas long kisim wanpela o tupela magasin tasol. Gutpela yumi ken stretim rot bilong mekim gobek long dispela wik yet o bihain long sampela de tasol na bai yumi ken toktok gen wantaim ol. Sapos yumi go lukim ol gen na bringim ol nupela magasin long ol long olgeta fotnait samting, ating bihain bai yumi ken kirapim ol long kisim sabskripsen bilong sikspela mun.
3 Yumi ken tilim ol wan wan magasin long ol wanwok, wanskul, na ol wanblut. Yumi ken tilim ol magasin tu long ol bisnisman na long taim yumi autim tok long rot.
4 Taim kongrigesen i kisim ol nupela magasin, kwiktaim ol brata i mas stretim ol samting bambai ol pablisa i ken kisim. Taim yu kisim wanpela nupela magasin yu mas kaunim gut. Ol man long hap bilong yu i save tingting long wanem ol samting? Bel isi na gutpela sindaun? Wok bisnis? Gutpela gavman? Ol samting olsem wara, win, bus samting? Wastaua i save soim ol man long rot tru bilong pinisim ol dispela hevi, em Kingdom bilong God. (Dan 2:44; Mt 6:10) Em i wanpela gutpela presen tru i kam long Bikpela Tisa bilong yumi.—Ais 30:20.
5 Long dispela yia bilong wok yumi olgeta wan wan i ken putim mak long lusim sampela aua moa long mekim wok autim tok, na taim yumi mekim olsem yumi ken givim bel na kirapim olgeta man long kaunim Wastaua na Kirap!
[Ol Askim]
1. Ol magasin bilong Sosaiti i mekim wanem tupela wok?
2. Sapos man bilong haus i no laik kisim sabskripsen bai yumi ken mekim wanem?
3. Yumi ken tilim ol wan wan magasin long husat?
4. Taim yumi kisim wanpela nupela magasin, kwiktaim yumi mas mekim wanem?
5. Yumi olgeta i mas mekim wanem long dispela yia bilong wok?