Mekim Wok Bilong Jehova na Sakim Ol Samting i Laik Pulim Nabaut Tingting
(Namba 1 Hap)
1 “Ol manmeri i putim Bikpela i stap God bilong ol, ol tu i ken amamas.” (Sng 144:15) Olsem wanem long dispela tok bilong King Devit? Ol man i putim Jehova i stap God bilong ol long dispela taim nogut, ol i ken amamas? (Ef 5:16) Yes, ol i ken amamas! Ol Kristen long nau i kisim amamas long mekim wok bilong Jehova. Tru sampela taim yumi hatwok. Tasol maski Satan i putim kain kain hevi long yumi long dispela taim bilong “planti hevi,” yumi no bel hevi. (2 Ti 3:1, 2) Ol hevi i go bikpela na i kamapim klia olsem klostu nau Kingdom bilong God bai pinisim pasin nogut bilong nau na kamapim nupela taim. (2 Pi 3:13) Yumi stap namel long ol man i stap long tudak, tasol yumi no larim dispela i pinisim amamas bilong yumi, nogat. Yumi tingim na wetim yet ol samting Kingdom bai mekim. Olsem wanem? Yu amamas long stap olsem lait na mekim wok bilong Jehova long dispela taim bilong tudak?—Fl 2:15.
2 Yumi olgeta wan wan i mas was gut oltaim long pasin bilong yumi long mekim wok bilong Jehova. Long wanem, Satan i Man bilong pulim nabaut tingting bilong yumi ol man. Em i laik pulim tingting bilong yumi i go long wanpela narapela samting o long kain kain samting wantaim. Satan i kam daun pinis long graun, na em i bin “giamanim” planti manmeri. Em i mekim wok long kain kain samting bilong pulim tingting bilong man na bai em i no tingim ol bikpela tok bilong nau. (KTH 12:9) Inap 100 yia pinis ol Witnes Bilong Jehova i bin wok strong long autim tok bilong Kingdom, tasol i no planti man i save olsem bikpela tok bilong nau, em Kingdom bilong God i mas mekim nem bilong God i stap holi na kamapim klia olsem i stret God i stap Nambawan Bikpela. (1 Jo 5:19) Satan i save pulim nabaut tingting bilong planti milion manmeri long dispela graun, na ating em inap pulim nabaut tingting bilong yumi tu na bai yumi lusim wok bilong Jehova. Sori tru! Sampela brata bilong yumi i bin larim Satan i pulim tingting bilong ol i go nabaut long kain kain samting. Long nau i gat kain kain samting bilong pulim nabaut tingting bilong man. Orait nau bai yumi stori long sampela.
3 Ol Hevi Bilong Mani na Laikim Tumas Mani Kago Samting: Long planti kantri, no gat wok na pe bilong ol samting i go antap na dispela i mekim na ol man i bel hevi na tingting planti. Tru yumi mas lukautim yumi yet na famili bilong yumi long kaikai, klos, na haus samting. Tasol sapos yumi tingting planti tumas long ol dispela samting, em bai kamap olsem namba wan samting long tingting bilong yumi. Nogut yumi tingim tumas ol samting bilong skin na yumi no helpim wok bilong Kingdom. Aposel Pol i stori long dispela samting long Hibru 13:5, 6. Na Jisas i tok promis long yumi, ol man i tingim Kingdom pastaim ol i no ken wari na tingting planti; Jehova bai givim olgeta samting long yumi i stret long yumi mas kisim. (Mt 6:25-34) Ol painia na ol narapela i mekim wok bilong Jehova long olgeta de, ol i save dispela tok em i tru.
4 Ol manmeri Satan i bosim ol i kirapim ol man long laikim tumas ol samting bilong skin. Planti milion manmeri i save givim bel long kisim planti samting moa o long lukautim ol samting bilong ol. Kain samting olsem bilong pulim nabaut tingting bilong man i bin i stap long taim bilong Jisas tu. Wanpela yangpela maniman i gat namba i askim Jisas, em i mas mekim wanem na bai em inap kisim laip i stap gut oltaim. Jisas i tokim em: “Sapos yu laik kamap stretpela olgeta, orait yu go salim olgeta samting bilong yu na dispela mani yu kisim yu mas givim long ol rabisman. Yu mekim olsem, na bai yu gat ol gutpela samting tru long heven. Na yu kam bihainim mi.” (Mt 19:16-23) Yangpela man hia i gat planti samting na dispela i pulim tingting bilong em na em i no givim bel olgeta long mekim wok bilong God. Em i givim bel long mani kago samting bilong em. Jisas i save sapos dispela man i lusim ol dispela samting i pulim nabaut tingting bilong em, dispela bai helpim em. Ol dispela samting i pasim em long givim bel olgeta long God. Olsem wanem long yu yet? Yu save lusim bikpela hap taim long mekim wok bilong skin long wanem yu no laik lusim gutpela sindaun na ol gutpela samting bilong yu? Yu ting dispela i mekim na yu no givim bikpela hap taim tumas long autim tok? Yu lusim bikpela hap taim na strong bilong lukautim ol dispela samting na yu no gat taim o strong long mekim wok bilong Kingdom? (Mt 6:24) Yu inap lusim sampela samting i save pulim bikpela hap taim na strong bilong yu na bai yu inap givim dispela hap taim long mekim wok bilong God?
5 Ol Samting Ol Manmeri i Save Mekim Long Olgeta De: Sapos yumi no was gut, ating bai yumi kirap long tingim tumas ol wok bilong olgeta de na yumi no tingim gut ol samting bilong spirit. Tingim ol man long taim bilong Noa. Ol i tingting tumas long sindaun bilong ol, na kaikai na dring, na marit, na stretim rot bilong ol pikinini bilong ol i ken marit; ol i no tingim strongpela toksave Noa i autim, olsem klostu Bikpela Tait bai kamap. Ol i stap olsem tasol na Bikpela Tait i kamap na i pinisim olgeta dispela manmeri. Ol i larim planti samting i pulim nabaut tingting bilong ol na dispela i mekim na ol i bagarap. Jisas i tok: “Wankain pasin tasol bai i kamap long taim Pikinini Bilong Man i kamap.” (Mt 24:37-39) Tru tumas, planti manmeri long nau ol i tingting tumas long i stap bilong ol na ol i no tingim strongpela toksave yumi autim long ol. Ol i les; ol i no tingim ol samting bilong spirit.
6 Olsem wanem? Yu tingting tumas long ol samting bilong amamas na yu no tingim tumas ol samting bilong spirit? Wanpela taim Jisas i go long haus bilong Marta na Maria. Maria i wok long putim gut yau long ol tok Jisas i mekim. Tasol Marta “em i tingting planti long bikpela wok em i mekim bilong redim kaikai samting.” Marta i tingting tumas long lukautim gut Jisas. Marta i no pilim olsem em i mas harim ol tok bilong em. Long pasin isi Jisas i tokim Marta, em i no ken lusim bikpela hap taim tumas long redim kain kain kaikai; mobeta em i tingim ol samting bilong spirit. Olsem wanem long yu? Dispela tok em i sutim yu? (Lu 10:38-42) Na Jisas i givim toksave long yumi olsem yumi mas was gut long yumi yet. Nogut yumi kaikai na dring planti tumas na yumi no tingting gut. Pinis i klostu, olsem na yumi mas was gut.—Lu 21:34-36.
Mekim Wok Bilong Jehova na Sakim Ol Samting i Laik Pulim Nabaut Tingting
(Namba 2 Hap)
1 Pasin Bilong Kisim Ol Amamas: Wanpela bikpela samting Satan i mekim wok long en bilong pulim nabaut tingting bilong yumi na bai yumi no tingim bikpela tok bilong Kingdom, em pasin bilong painim amamas. Planti milion manmeri i gat nem Kristen ol i save laikim tumas kain kain amamas bilong dispela graun na ol i no tingim God. Ol i laik kisim amamas long samting i pulim nabaut tingting bilong ol—ol i no tingim gut ol tok bilong Baibel. (2 Ti 3:4) Tasol pasin bilong mekim gutpela samting bilong kisim amamas, dispela pasin yet i no gat rong long en, nogat. Tasol sapos yumi lusim bikpela hap taim tumas long olgeta wik long lukim TV, piksa wokabaut, video, spot, o kaunim ol buk na nius samting i no bilong Baibel, o mekim sampela liklik wok yumi amamas long mekim, ating bel inap giamanim yumi na pulim yumi na bai yumi lusim Jehova. (Jer 17:9; Hi 3:12) Dispela samting inap kamap olsem wanem? Long taim bilong miting Kristen, sapos tingting bilong yu i wokabaut, o yu laik bai miting i pinis hariap na bai yu ken mekim sampela samting bilong amamas, orait, ating bai i no longtaim na bai yu painim rot bilong stap long haus—bai yu no kam long miting o go autim tok. Nau em taim bilong skelim gut ol dispela samting yu kisim amamas long en. Askim yu yet: ‘Ol dispela samting i pulim nabaut tingting bilong mi?’ (Lu 8:14) Hap taim yu lusim long kisim amamas, gutpela sapos yu givim dispela hap taim long helpim yu long kamap strong long ol samting bilong spirit, a?
2 Sampela Narapela Samting Bilong Pulim Taim Bilong Yumi: Sampela i bin go insait long wok bilong stretim ol hevi bilong nau. Olsem na taim ol man i gat hevi long sindaun bilong ol, ol i paitim toktok i go i kam, ol Kristen i no ken insait long dispela o long wok ol man i mekim bilong stretim ol rong. (Jo 17:16) Em wanpela pasin Satan i mekim wok long en bilong pulim tingting bilong ol man na bai ol i no ken tingim ol gutpela tok bilong Baibel, olsem Kingdom bilong God tasol i rot bilong helpim ol man long kisim gutpela sindaun. Na sapos narapela i bin rongim yumi na mekim pasin i no stret, yumi mas was gut, nogut yumi bel hevi o tingting long bekim rong na yumi lusim tingting olsem yumi ol Witnes Bilong Jehova. Tingim dispela: Man ol i bin rongim, em God Jehova, na nem bilong dispela man yumi mas mekim i stap holi.—Ais 43:10-12; Mt 6:9.
3 Olgeta man i laik bai skin bilong ol i stap gutpela na no ken kisim sik, tasol sapos man i tingting tumas long ol kain kain samting bilong oraitim ol sik, dispela inap kirapim em long tingim tumas skin bilong em. Planti man i save tokaut long kain kain kaikai na ol narapela kain samting bilong oraitim ol sik bilong skin na bilong helpim man em bel na tingting bilong em i no stap isi. Tru samting yu mekim bilong lukautim gut skin bilong yu, em samting bilong yu yet—tasol no ken kalapim lo bilong Baibel. Oltaim yumi mas bilip long Kingdom bilong God, em tasol i rot tru bilong oraitim ol sik.—Ais 33:24; KTH 21:3, 4.
4 Stap Strong, No Ken Surik Liklik: Pinis i klostu, olsem na Satan i wok strong moa yet long pulim nabaut tingting bilong yumi na bai yumi no mekim wok bilong Jehova. “Stap strong long bilip na sakim em.” (1 Pi 5:9) Bai yu stap strong olsem wanem? Yu mas kisim save long tingting bilong God. (Mt 4:4) No ken larim ol samting bilong dispela graun i stilim taim bilong yu wantaim famili bilong yu. Yupela i mas i gat hap taim bilong tingim ol tok bilong Baibel. Taim famili i kaikai, toktok wantaim ol long ol gutpela ekspiriens na long ol narapela gutpela samting bilong spirit. Bihainim gut sedyul na bai yu gat taim long stadi na redim ol tok bilong miting.
5 Taim ol hevi i mekim na tingting bilong yu i no stap isi, putim ol hevi yu karim long han bilong Jehova long rot bilong beten. Yu ken bilip olsem, God i wari long yu. (1 Pi 5:7) Larim God i mekim bel na tingting bilong yu i stap bel isi tru. (Fl 4:6, 7) No ken larim wanpela samting i pasim yu long tingim ol samting bilong spirit. Wankain olsem Jisas, oltaim yu tu yu mas pilim olsem Jehova i stap klostu tru long yu. (Ap 2:25) Lukluk stret i go long mak yu laik winim, olsem Sindaun 4:25-27 i kirapim yumi long mekim. “Yu mas lukluk stret long rot yu laik i go long en. Yu no ken lukluk nabaut. Tingting gut long wokabaut bilong yu, na olgeta pasin bilong yu bai i kamap gutpela. Yu no ken lusim gutpela rot yu wokabaut long en. Yu no ken i go long han sut o long han kais. Nogat.”
6 Kam oltaim long olgeta miting, na bosim gut skin na bai yu inap tingim gut ol tok yu lainim long Baibel. (Hi 2:1; 10:24, 25) No ken wok long painim ol amamas bilong dispela graun nogut, nogat; wok strong na bai wok autim tok bilong yu i ken karim gutpela kaikai. Dispela bai helpim yu long i stap bel gut na amamas. (1 Te 2:19, 20) Na las tru, no ken larim wanpela samting o wanpela man i pulim tingting bilong yu na yu no mekim wok bilong God. “Yupela i mas i stap strong, na i no ken surik liklik. Yupela i save olsem, hatwok yupela i save mekim long Bikpela, em bai i no inap lus nating. Olsem na oltaim yupela i mas wok strong long mekim wok bilong Bikpela.”—1 Ko 15:58.
[Questions for Part 1]
1. Ol Kristen i save mekim wanem bilong painim amamas long dispela taim bilong hevi?
2. Kolim wanpela samting Satan i mekim wok long en bilong giamanim ol manmeri.
3. Sapos yumi no was gut, Satan inap mekim wanem bilong pulim nabaut tingting bilong yumi na yumi lusim wok bilong Kingdom?
4. (a) Ol manmeri Satan i bosim ol i kirapim ol man long laikim wanem ol samting? (b) Yumi ken mekim wanem bilong kamapim klia olsem yumi givim bel olgeta long God Jehova?
5. Wanem samting inap mekim na yumi no tingim gut ol samting bilong spirit?
6. Bilong wanem yumi mas was gut, nogut yumi insait tumas long ol samting bilong amamas?
[Questions for Part 2]
1. Kolim wanpela bikpela samting Satan i mekim wok long en bilong pulim nabaut tingting bilong yumi na bai yumi lusim tok i tru?
2. Olsem wanem wok bilong stretim ol hevi inap giamanim yumi?
3. Olsem wanem pasin bilong tingting tumas long ol samting bilong oraitim sik inap bagarapim yumi long ol samting bilong spirit?
4. (a) Satan bai wok long mekim wanem? (b) Yumi ken mekim wanem bilong helpim famili?
5. Olsem wanem yumi ken sakim ol samting i laik pasim yumi long tingim ol samting bilong spirit?
6. Bilong wanem oltaim yumi mas wok strong na bai wok autim tok bilong yumi i ken karim gutpela kaikai?